ខេត្តកណ្តាលៈ របាំងធ្នួសល្មើសច្បាប់នៅចំនុចស្ពានព្រែកឃ្លោកដែលជាតំបន់អតីតឡូត៍នេសាទលេខ៣ ស្ថិតក្នុងភូមិថ្កុល ឃុំត្រើយស្លា ស្រុកស្អាង ត្រូវបានឈ្មួញឈ្មោះ ឃាង តូ និងជនជាតិវៀតណាម ដាក់ស្បៃសាច់អួនចាប់យកត្រីលក់ជារៀងរាល់ថ្ងៃដោយមិនមានការបង្ក្រាបពីសមត្ថកិច្ចជំនាញជលផលទើបធ្វើឲ្យមានការសង្ស័យថាមន្ត្រីជលផលទាំងនោះមានការឃុបឃុតគ្នាជាមួយឈ្នួញ ។
ប្រជាពលរដ្ឋរស់នៅក្នុងភូមិថ្កុលមានការងឿងឆ្ងល់យ៉ាងខ្លាំងនៅពេល ដែលឃើញរបាំងធ្នួសដាក់បាំងជិតមាត់ព្រែកឃ្លោកជាប់ដងទន្លេបាសាក់អស់រយៈពេលជាច្រើនថ្ងៃមកហើយ ដោយគ្មានសមត្ថកិច្ចពាក់ព័ន្ធណាចុះមកធ្វើការបង្ក្រាប ។ ប្រជាពលរដ្ឋបានអះអាងថា អ្នកដែលផ្តើមគំនិតដាក់របាំងធ្នួសនោះមានឈ្មោះឃាងតូដែលជាអ្នកធ្លាប់ហ៊ុនធ្វើអា ជីវកម្មឡូត៍នេសាទលេខ៣នេះយ៉ាងដុះស្លែ តាំងពីសម្តេចតេជោ ហ៊ុន សែន មិនទាន់កាត់រំសាយឡូត៍នេសាទមកម្លេះ ហើយបច្ចុប្បន្ននេះឈ្មោះឃាង តូ បានសហការគ្នាជាមួយជនជាតិវៀតណាមដាក់របាំងធ្នួសចាប់យកត្រីលក់ ដោយពុំមានច្បាប់អនុញ្ញាតិ ។
ពាក់ព័ន្ធទៅនឹងការដាក់របាំងធ្នួសនេះដែរអ្នកយកព័ត៌មានយើងបានទូរស័ព្ទទៅលោក ឃឹម ពេញ នាយសង្កាត់ជលផលស្អាង លោកបានឆ្លើយថាការដាក់របាំងធ្នួសនៅចំណុចខាងលើពុំមានច្បាប់អនុញ្ញាតិនោះទេ ហើយកុំមកសួរខ្ញុំអី បើចង់ដឹងច្បាស់ទៅសួរអ្នកដាក់ទៅ ។
មហាជនបានអះអាងថា ការដែលឈ្នួញដាក់របាំងធ្នួសល្មើសច្បាប់នេះទៅបានទាល់តែមានការបើកភ្លើងខៀវពីមន្ត្រីជំនាញជលផល ទើបឈ្មួញហ៊ានដាក់ទាំងបំពាន់ច្បាប់យ៉ាងដូច្នេះ ។ ហើយចាប់តាំងពីរាជរដ្ឋាផិបាលកាត់រំសាយឡូត៍នេសាទទូទាំងប្រទេស ប្រគល់ឲ្យ
ប្រជាពលរដ្ឋធ្វើការនេសាទជាលក្ខណៈគ្រួសារមក ពុំដែលឃើញមានមន្ត្រីជំនាញជលផលគ្រប់លំដាប់ថ្នាក់ក្នុងខេត្តកណ្តាល ចុះធ្វើការបង្ក្រាបបទល្មើសនេសាទក្នុងដែនសមត្ថកិច្ចនោះទេ សូម្បីតែមកប្រចាំការក៏អត់មានឃើញមន្ត្រីជលផលមកប្រចាំការដែរ ។ ជាក់ស្តែងស្នាក់ការជលផលផ្នែកបាសាក់ដែលមានទីតាំងស្ថិតនៅភូមិទួលក្រសាំង ឃុំរកាខ្ពស់ ស្រុកស្អាង សង្កេតឃើញមានស្មៅដុះ និងពីងពាងព័ទ្ធជិតទៅហើយនោះដោយសារតែនាយផ្នែកមិនដឹកនាំមន្ត្រីមកប្រចាំការ
មន្ត្រីជលផលម្នាក់ដែលដាក់លក្ខណ៍សុំមិនបញ្ចេញឈ្មោះបានប្រាប់អ្នកយកព័ត៌យើងថា នាយ-នាយរងខណ្ឌ នាយ-នាយរងផ្នែក និងនាយ-នាយរងសង្កាត់មិនដែលមកស្នាក់ការដឹកនាំមន្ត្រីជលផលចុះធ្វើការបង្ក្រាបបទល្មើសនេសាទទេ តែបើដឹងកន្លែងបទល្មើសនេសាទគឺគេទូរស័ព្ទហៅអ្នកប្រព្រឹតបទល្មើសនេសាទទាំងអស់នោះមកជួបនៅតុកាហ្វេ ឬក៏ហាងផឹកស៊ីដើម្បីចរចារតម្លៃតាមទំហ៊ំនៃបទល្មើសទាំងអស់នោះរួចហើយធ្វើដូចជាមិនដឹងរឿង នៅពេលដែលកូនចៅសួរឆ្លើយប្រាប់វិញថា អត់មានគោលការបង្ក្រាបបបទល្មើសនេសាទទាំងអស់នោះទេ ។
មន្ត្រីខាងលើបានបន្តថា គាត់ចង់ធ្វើការដែរតែមេកើយមិនចុះដឹកនាំធ្វើ ទើបគាត់ឆ្លៀតរកស៊ីរបរផ្សេងៗ រីឯមន្ត្រីខ្លះឆ្លៀតរត់ម៉ូតូឌុបក៏មានដែរ ដើម្បីផ្គត់ផ្គង់ជីវភាពគ្រួសារ ។
ប្រជាពលរដ្ឋអះអាងថា មិនថាតែនៅក្នុងតំបន់អតីតឡូត៍នេសាទលេខ៣នេះទេ នៅតំបន់អតីតឡូត៍នេសាទទូទាំងខេត្តកណ្តាលសុទ្ធសឹងតែមានបទល្មើសនេសាទ ដោយសារតែនៅក្នុងទឹកដីខេត្តកណ្តាលនេះមានស្រះ និងបែរចិញ្ចឹមត្រីឆ្តោរាប់ពាន់កន្លែង ទើបបណ្តាលឲ្យមានបទល្មើសនេសាទដើម្បីចាប់យកត្រីតូចៗទៅផ្គត់ផ្គង់ជាអាហារសម្រាប់ត្រីឆ្តោស៊ីក្នុងមួយថ្ងៃៗមិនតិចជាង១០០តោននោះទេ ដែរជាហេតុធ្វើឲ្យធនធានមច្ឆជាតិវិនាសហិនហោចជារៀងរាល់ឆ្នាំ ទង្វើរដូច្នេះហើយគួរតែក្រសួងកសិកម្មរិតបណ្តឹងរឺចាត់វិធានការទៅលើមន្ត្រីទាំងអស់នោះផងទាន៕
