កំពង់ឆ្នាំង៖ បន្ទាប់ពីលោកនាយប៉ុស្តិ៍ឃុំកំពង់ព្រះគគីរ ត្រូវដកយកមកបញ្ឈរជើងនៅខេត្ត បានបង្កអោយកើតឡើងនូវរឿងចំរ៉ូងចំរ៉ាស់២ ធ្វើអោយអាជ្ញាធរខេត្តកំពង់ឆ្នាំងឈឺក្បាលយ៉ាងខ្លាំង ស្រាប់តែលេចធ្លាយថាមានបទល្មើសដាក់សំរ៉ាស់ជាច្រើននៅក្នុងតំបន់អភិរក្សពូជត្រី ស្តីពាក់កន្ទេល ស្ថិតនៅក្នុងភូមិកោះតាម៉ូវ ឃើកំពង់ព្រះគគីរ ស្រុកបរិបូណ៌ ខេត្តកំពង់ឆ្នាំង ហើយក៍មានការចុះផ្សាយពីសារព័តមានជាបន្តបន្ទាប់ដែលអាជ្ញាធរជំនាញបានចេញមុខបញ្ជាក់ថាពិតជាមានមែនតែចំនួនតិចតួចទេ ។
សូមរម្លឹកថា លោក ប៉ាង ពុំសែន នាយប៉ុស្តិ៍រដ្ឋបាលឃុំកំពង់ព្រះគគីរ ស្រុកបរិបូណ៌ ត្រូវបានស្នងការនគរបាលខេត្តដកយកមកបញ្ឈរជើងនៅស្នងការដ្ឋាននគរបាលខេត្តកំពង់ឆ្នាំង កាលពីថ្ងៃទី៧ ខែតុលា ឆ្នាំ២០១៤កន្លងទៅនេះ ក្រោយពីទទួលបានរបាយការណ៍ពីលោកមេឃុំកំពង់ព្រះគគីរ និងបណ្តឹងរបស់ប្រជាពលរដ្ឋចំនួន៨២គ្រួសារ សុំអោយផ្លាស់ប្តូរលោកមេប៉ុស្តិ៍ និងមន្ត្រីនគរម្នាក់ទៀតឈ្មោះ ទុំ សារ៉ុន ត្រូវជាប្អូនថ្លៃលោក ប៉ាង ពុំសែន ដោយរួមគ្នាធ្វើបាបកៀបសង្កត់ប្រជាពលរដ្ឋក្នុងមូលដ្ឋានធ្វើអោយប្រជាពលរដ្ឋមានការថ្នាំងថ្នាក់នាពេលកន្លងមក តែការដក លោក ប៉ាង ពុំសែន មកបញ្ឈរជើងនោះ លោក ទុំ សារ៉ុន មិនត្រូវបានដកឡើយ ដោយគ្រាន់តែជាមន្ត្រីក្រោមឱវាទ ម្យ៉ាងទៀត ខ្វះកម្លាំងប្រចាំប៉ុស្តិ៍ផង ។
ប្រភពពត៌មានពីមន្ត្រីជលផលបានអោយដឹងថា ក្រោយពីការដកលោកមេប៉ុស្តិ៍បានប៉ុន្មានថ្ងៃ លោកទុំ សារ៉ុន ជាមន្ត្រីនគរបាលប៉ុស្តិ៍ បាននាំអ្នកសារពត៌មានចំនួន២នាក់ទៅថតបទល្មើសនេសាទដាក់សម្រាស់ នៅតំបន់អភិរក្សពូជត្រីស្តីពាក់កន្ទេល ស្ថិតក្នុងភូមិកោះតាម៉ូវ ឃុំកំពង់ព្រះគគីរ ហើយយកមកធ្វើការចុះផ្សាយ ។ ក្រោយពីការចុះផ្សាយ មន្ត្រីជលផលបានអោយលោក ទុំ សារ៉ុន ជូនទៅមើលបទល្មើសនេសាទដាក់សម្រាស់នៅចំណុចខាងលើ ប៉ុន្តែពេលទៅដល់រកមិន ឃើញសម្រាស់ទេ ឃើញតែកំសួលកំពិសប៉ុណ្ណោះ ។ ពេលនោះមន្ត្រីជលផលបានរាយការណ៍ ទៅថ្នាក់លើ ស្រាប់តែនៅថ្ងៃទី១៩ខែតុលា ឆ្នាំ២០១៤ លោក ទុំ សារ៉ុន រួមដំណើរជាមួយប្អូនប្រុសម្នាក់ទៀត បានជូនអ្នកសារពត៌មាន និងជនជាតិវៀតណាមដោយមានម៉ាស៊ីនខ្យល់ទៅចំណុច តំបន់អភិរក្សពូចត្រី ស្តីពាក់កន្ទេល ដើម្បីមុជយកសម្រាស់មកដាក់លើទូក ហើយទូរស័ព្ទប្រាប់ អាជ្ញាធរខេត្ត មន្ត្រីរដ្ឋបាលជលផល ដើម្បីចុះទៅពិនិត្យមើល ។
លោក សេង ប៊ុនឈឿន នាយខណ្ឌរដ្ឋបាលជលផលកំពង់ឆ្នាំងបាននិយាយងោយដឹងថា លោកបានទទួលបញ្ជាពីលោកអភិបាលខេត្តអោយដឹកនាំមន្ត្រីជំនាញទៅពិនិត្យមើល ។ លោកក៍បានអោយមន្ត្រីជំនាញរបស់លោកចុះទៅពិនិត្យមើល ថាមានពិតដែរឬទេ? វាមានទំហំប៉ុនណា? វាបង្កវិនាសកម្មដែរឬទេ? ពេលទៅដល់ឃើញសម្រាស់មាន១ទូកដែលយកឡើងពីទឹក ហើយយកមកដាក់លើទីទួលវត្តកំពង់ព្រះគគី កាប់ជាកមណាត់តូចៗប្រគល់អោយព្រះសង្ឃធ្វើអុសដុត លោកនាយខណ្ឌបានបញ្ជាក់ថាសម្រាស់ពិតជាមានមែន ហើយវាមានចំនួនតិចតួចមិនច្រើនរាប់ហិកតាដូចការនិយាយនោះទេ ។
លោក ថាន់ សារុំ អភិបាលស្រុកបរិបូណ៌បានងោយដឹងថា លោកបានទទួលបញ្ជាអោយ ចុះមកពិនិត្យមើលជាមួយគេដែរ ពេលដល់ចំណុចនោះលោកពិតជាឃើញសម្រាស់មែន ប៉ុន្តែវាស្ថិតនៅលើខ្នងកោះដែលប្រជាពលរដ្ឋកាប់ធ្វើចំការពីពេលកន្លងមក គែមិនស្ថិតនៅក្នុងព្រែក អភិរក្សនោះទេ ។ លោកបានចោទជាសំណួរថា ពេលដែលអតីតមេប៉ុស្តិ៍នៅ ហេតុអ្វីបានជាមិនឮថាមានសម្រាស់នៅទីនោះផង ពេលដកមេប៉ុស្តិ៍ប៉ុន្មានថ្ងៃប៉ុណ្ណោះ ម៉េចក៍លេចឮថាមាន? ហើយការដែលជួនជនជាតិវៀតណាមយកម៉ាស៊ីនខ្យល់ទៅមុជទឹករកសម្រាស់នោះវាហាក់ដូចជារៀបចំផែនការទុកជាមុនស្រេច ។ លោកបានបន្តថា បើលោកចាំមិនខុសទេពេលប្រជាពលរដ្ឋផ្តិតមេដៃសុំដកមេប៉ុស្តិ៍នោះគឺជួបជុំគ្នានៅផ្ទះលោកផាន់ផល្លា ជាប្រធានសហគមន៍នេសាទ ។ ប៉ុន្តែក្រោយពីមានការដកមេប៉ុស្តិ៍ បែរជាមានការចោទប្រកាន់ ប្រធានសហគមន៍នេសាទឃុបឃិតជាមួយ អ្នកដាក់សម្រាស់ រឿងនោះលោកសង្ស័យថាជារឿងគំនុំ និងលាងកំហុសអោយមេប៉ុស្តិ៍ដែលត្រូវដកចេញប៉ុណ្ណោះ ។
ប្រធានសហគមន៍នេសាទ លោក ផាន់ ផល្លា ត្រូវបានរងការចោទប្រកាន់ថា យកលុយពីការដាក់សម្រាស់ក្នុងដែនអភិរក្សខាងលើ ចំនួន៥០ម៉ឺនរៀលក្នុង១កន្លែងៗ តែលោកបានបដិសេធថាមិនពិតដូចការចោទប្រកាន់មកលើរូបលោកនោះទេ ។
រឿងរ៉ាវខាងលើ សាធារណៈជនបានធ្វើការសន្និដ្ឋានថា ជាការហែកហួរគ្នារឿងការ ទទួល លាភសក្ការៈ ព្រោះក្រោយពីពេលដែលដកលោកមេប៉ុស្តិ៍ ប៉ាង ពុំសេនចេញ ទើបមានការបែកធ្លាយរឿងនេះជាបន្តបន្ទាប់ ពីពេលមុនគឺសម្ងំទទួលលាភសក្ការៈទាំងអស់គ្នា តែពេលនេះនាំគ្នា រកកលហែកហួរកកាយ ជះទឹកដាក់គ្នាប៉ុណ្ណោះ ។
