ខេត្តរតនគិរីៈ អំណោយជាអាវរងាររបស់សម្តេចតេជោហ៊ុន សែន ត្រូវបានស្នងការនគរបាលខេត្តរតនគិរីយកទៅចែកជូនដល់កម្លាំងនគរបាលការពារព្រំដែនគោកចំនួន២វរៈ គឺវរៈលេខ៦២៣ និងវរៈលេខ២០៣ដែលឈរជើងការពារក្រវ៉ាត់ព្រំដែននៅក្នុងភូមិសាស្ត្រខេត្តរតនគិរី នាព្រឹកថ្ងៃទី២៣
ខែតុលា ឆ្នាំ២០១៤ នៅទីបញ្ជាការវរៈលេខ៦២៣ ព្រំដែនស្រុកអូរយ៉ាដាវ។
បន្ទាប់ពីលោកវរៈសេនីយ៍ត្រី អ៊ុយ សារ៉ាត់ បានឡើងអានរបាយការណ៍អំពីលទ្ធផលការងារកន្លងមក និងស្ថានភាពភូមិសាស្ត្រដែលស្ថិតនៅក្នុងដែនគ្រប់គ្រង និងសភាពការទូរទៅរួចមក លោកឧត្តមសេនីយ៍ត្រីងួន គឿន បានមានប្រសាសន៍ កោតយសសើរចំពោះកងកម្លាំងបានប្រឹងប្រែងកន្លងមក និងសាកសួរសុខទុក្ខពីការលំបាកចំពោះកងកម្លាំងនគរបាលការពារព្រំដែនគោកទាំងអស់ ព្រមទាំងក្រើនរំលឹកដល់កងកម្លាំងអោយខិតខំប្រឹងប្រែងបំពេញភារកិច្ចរបស់ខ្លួន ធ្វើខ្លួនសមជាកងកម្លាំងនគរបាលជាតិ ចេះសាមគ្គីផ្ទៃក្នុង និងគោរពពិន័យអោយបានម៉ឺងម៉ាត់ ហើយចេះស្រលាញ់អាណិតប្រជាពលរដ្ឋរស់នៅក្នុងដែនគ្រប់គ្រងរបស់ខ្លួន និងជួយទប់ស្កាត់រាល់បទល្មើសទាំងឡាយដែលកើតមានឡើងអោយបាន១០០%។ 
លោកស្នងការបានបន្តទៀតថា ថ្វីត្បិតថាអំណោយទាំងនេះមានលក្ខណៈតិចតួចក្តី តែនេះគឺជាទឹកចិត្តដ៏ថ្លៃថ្លារបស់សម្តេច និងសម្តេចគតិព្រិទ្ធបណ្ឌិត ដែលតែងតែគិតគួរដល់សុខទុក្ខពីការលំបាករបស់កងកម្លាំងយើងដែលឈរជើងជួរមុខដើម្បីការពារបូរណភាពទឹកដីនៃព្រះរាជាណាចក្រកម្ពុជា ហើយស្របពេលដែជិតឈានចូលរដូវរងារនេះ គឺជាការគិតគួរជាដរាបដល់ជីវភាពរស់នៅរបស់យើងទើបថ្ងៃនេះបាននាំយកអំណោយជាអាវរងារមកចែកជូនបងប្អូនសំរាប់រដូវរងារដែលជិតឈានចូលមកដល់នាពេលដ៏ខ្លីខាងមុខនេះ។ បន្ទាប់មកលោកស្នងការ ស្នងការរង បានអញ្ជើញចែកអំណោយជាអាវរងារជូនដល់កងកម្លាំង៕
