បាត់ដំបង: មុខសញ្ញាសង្ស័យចំនួនពីរនាក់ត្រូវបានកំលាំងមូលដ្ឋានកងរាជអាវុធហត្ថក្រុងបាត់ដំបងឃាត់ខ្លួនបានកាលពីវេលាម៉ោង 6-10 នាទីល្ងាចថ្ងៃទី 24-10-14 នៅត្រង់ចំនុចភូមិព្រែកព្រះស្តេចសង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ខណ:ដែលជនទាំងពីរនាក់នេះកំពុងលក់
ទិញគ្រឿងញៀននៅច្រកចូលខាងមុខផ្ទះ. ។ លោក សំ វិឡុង មេបញ្ជាការរងកងរាជអាវុធហត្ថក្រុងបានគូសបញ្ជាក់ថា នៅមុនពេលកើតហេតុលោកបានទទួលព៌តមានពីកំលាំងសំងាត់ថាមានករណីចែកចាយគ្រឿងញៀនខុសច្បាប់មួយកំពុងប្រព្រឹត្តឡើងនៅត្រង់ចំនុចកើតហេតុខាងលើ. ។
លោកមេបញ្ជាការរងបានបន្តថាក្រោយពីទទួលបានព៌តមាននេះភ្លាមលោកបានចាត់កំលាំងអោយចុះទៅត្រួតពិនិត្យគឺសង្គេតឃើញថាមានយុវជនម្នាក់កំពុងចូលទៅទិញគ្រឿងញៀនពីយុវជនម្នាក់ទៀតដែលកំពុងឈរលក់យ៉ាងសង្ហារនៅច្រកចូលខាងមុខផ្ទះដោយគ្មានខ្លាចរអារដល់ផ្លូវច្បាប់អ្វីបន្តិចទាល់តែសោះ ទើបកំលាំងបានស្ទុះចូលទៅឃាត់ខ្លួនជនទាំងពីរនាក់នេះតែម្តងព្រមទាំងបានធ្វើការឆែកឆេរទៅលើខ្លួនអ្នកទិញមានគ្រឿងញៀនប្រភេទម៉ាទឹកកកចំនួនមួយកញ្ចប់ដោយឡែកនៅលើខ្លួនអ្នកចែកចាយក៏មានគ្រឿងញៀនប្រភេទម៉ាទឹកកកចំនួនមួយកញ្ចប់តូច និងមួយកញ្ចប់ធំផងដែរ. ។
មុខសញ្ញាដែលជាអ្នកចែកចាយដ៏សង្ហារនៅខាងមុខច្រកចូលផ្ទះនេះមានឈ្មោះ រុំ បូរ៉ាភេទប្រុស អាយុ 20ឆ្នាំ រស់នៅត្រង់ចំនុចកើតហេតុ ចំណែកអ្នកដែលចូលទៅទិញដើម្បីយកទៅលក់បន្តនោះមានឈ្មោះ រឿម បូរី ភេទប្រុស អាយុ 28 ឆ្នាំរស់នៅភូមិតាក្រី ឃុំតាក្រី ស្រុកកំរៀងដែលមុខសញ្ញាទាំងនេះបានធ្វើសកម្មភាពជាយូរមកហើយដែលធ្វើអោយកំលាំងតាមប្រមាញ់គ្រប់ពេលវេលាផងដែរ. ។
យោងតាមចំលើយរបស់ជនទាំងពីរព្រមទាំងវត្ថុតាងផងនោះ បច្ចុប្បន្នកំលាំងកងរាជអាវុធហត្ថក្រុងបាត់ដំបងកំពុងរៀបចំឯកសារដើម្បីបញ្ជូនខ្លួនជនទាំងពីរទៅកាន់សាលាដំបូងខេត្តចាត់ការទៅតាមផ្លូវច្បាប់. ៕
