ខេត្តកំពង់ធំ: ប្រជាពលរដ្ឋនិយាយថា ដែនជម្រកសត្វបឹងពែរ ដែលមានទំហំរាប់ម៉ឺនហិតា នៅព្រុំទល់៣ខេត្តគឺខេត្តកំពង់ធំ.ព្រះវិហារនិងខេត្តសៀបរាបនោះ បាននិងកំពុងទទួល រងការកាប់ បំផ្លាញកាន់តែខ្លាំង ដោយសមត្ថកិច្ចបរិស្ថាន ជាឆ្មាំនៅទីនោះ ចាំតែយកលុយពីបទល្មើសនេះ
តែប៉ុណ្ណោះ ហើយគ្មានបទ ល្មើសណាមួយ ដែលមិនទំនាក់ទំនង ជាមួយពួកគេនោះទេ។ 
ដោយឡែកដែនជម្រកសត្វព្រៃបឹងពែរ នៅខេត្តកំពង់ធំ សកម្មភាពបំផ្លាញព្រៃឈើដ៏ក្ដៅ គគុក មាននៅចំណុចក្បាលអួរ រមាស.ក្បាលអូរសោម.ក្បាលអូរបេង.ទន្លេជ្រៃ.ក្បាលអូរល្អក់.ក្រាំង ដូង.អូរចិញ្ជៀន.ខាងលិចជាំកន្ធាយនិងក្បាលអូរទន្សាយ។ល។ ក្រៅពីនេះមានសកម្មភាពកាប់ ទន្ទ្រានព្រៃ រំលោភយកដីធ្វើចំការផងដែរ នៅទន្លេម្រេច។
ប្រភពនេះបានបន្តឲ្យដឹងថា ឈើទាំងនោះត្រូវបានជនប្រព្រឹត្តបទល្មើស ដឹកតាមរទេះ គោ-ក្របីនិងគោយន្ត ចេញមកច្រក ផ្លូវខាងជើងកោះល្វា ច្រកផ្លូវកប់ទូកនិងច្រកផ្លូវកន្ទាក ស្ថិតនៅឃុំសាគ្រាម ស្រុកប្រាសាទបាល្ល័ង្គ ដោយបង់ឲ្យសមត្ថកិច្ចបរិស្ថាន នៅស្នាក់ការបុស្ស ស្ថិតនៅឃុំសាគ្រាមនេះ ក្នុង១គ្រឿងពី៩០០០០រៀលទៅ១២០០០០រៀល ចំណែកការអារផ្ដួលនិង ច្រៀកឈើនៅក្នុងព្រៃគឺបង់ឲ្យផ្សេង ហើយមានមន្ត្រីបរិស្ថានខ្លះមានរណាយន្ត ជួលឲ្យកម្មករអារនិង ខ្លះទៀតរត់ការ កាងឈើដឹកចេញនោះទៀតផង។
ប្រភពនេះបានបន្តឲ្យដឹងទៀតថា ការដឹកឈើហុបមូលនិងឈើហុបជ្រុងធំ ចេញមកគឺយក ទៅដាក់អារច្រៀកនៅកន្លែងអាថ៌កំបាំងក្បែរផ្លូវឬក្នុងភូមិ ដែលរថយន្តចូលដឹកបាន ហើយឈ្មួញ ដឹកបន្តទៅស្រុកស្ទោង និងមកដេប៉ូឈើក្នុងទីរួមខេត្តកំពង់ធំ។ ប្រភពនេះបានបញ្ចាក់ថា ឈ្មួញដឹកឈើនៅទីនោះធំជាងគេមានឈ្មោះរ៉យនិងប្រពន្ធឈ្មោះអូនមានដេប៉ូឈើធំមួយ នៅថ្នល់បំបែកកំពង់ធំ-ព្រះវិហារ ស្ថិតនៅក្នុងឃុំត្រពាំងឬស្សី ស្រុកកំពង់ ស្វាយ ។ លោកលាង ដែលប្រជាពលរដ្ឋនៅនោះ ស្គាល់ថា ជាមេស្នាក់បុស្សស្ថិតនៅ ឃុំសាគ្រាមនោះ ពុំបានត្រូវអ្នកសារព័ត៌មានសុំបំភ្លឺបានទេនៅពេលនេះ។
ចំណែកលោក លី ស្រេង នាយកដែនជម្រកសត្វព្រៃបឹងពែរ បានប្រាប់ឲ្យដឹងថា លោកកំពុង មានវិធានការទប់ស្កាត់ការកាប់ព្រៃទន្ទ្រាន រំលោភយកដីធ្វើចំការ ឯការអារ -កាប់ដើមឈើ នៅ បណ្ដាចំណុចខាងលើ លោកក៏កំពុងចាត់ការដែរ ហើយចាប់បានរណាយន្ត ៏កំពុងចាត់ការដែរ ហើយចាប់បានរណាយន្ត បណ្ដើរៗហើយ។
ប្រជាពលរដ្ឋសុំឲ្យរាជរដ្ឋាភិបាល ពិនិត្យករណីនេះផង បើពុំនោះសោត ក្នុងពេលដ៏ខ្លីព្រៃ ឈើនិងសត្វព្រៃនៅដែនជម្រកសត្វព្រៃបឹងពែរនេះ និងហិនហោចទាំងស្រុកហើយ បច្ចុប្បន្នដើម ឈើមានតែនៅខាងក្រៅតែប៉ុណ្ណោះ ចំណែកខាងក្នុងខ្ទេចខ្ទីលឺសូរតែសម្លេងទ្រហឹងអឺងកង នៃរយន្ត ពេញព្រៃ ពោលសកម្មភាពបំផ្លាញមានទម្ងន់ធ្ងន់ធ្ង ចំណែកការបង្ក្រាប មានលទ្ធផលតិចតួចស្ដូច ស្ដើង ណាស់មិនតុល្យភាពគ្នាទេ៕
