(ខេត្តព្រៃវែង) ស្ពានអ្នកលឿងក្រោមជំនួយរាជរដ្ឋាភិបាលជប៉ុនស្ថាបនាបាន ៩០% រំពឹងថានៅដើមឆ្នាំ២០១៥ នឹងត្រូវស្ថាបនារួចរាល់ជាស្ថាពរតាមការគ្រោងទុក។ ទន្ទឹមនឹង នោះក៏មានបញ្ហាប្រឈមជាច្រើន ដែលអ្នកធ្វើការស្ពានមួយនេះលួចយកគ្រឿងសំភារៈ សព្វបែបយ៉ាងដែលធ្វើអោយ
ម្ចាស់ជំនួយ(ជប៉ុន)ខកបំណង ។ កន្លងមកនេះ ក្រុមអ្នកធ្វើការស្ពានអ្នកលឿងលួចយក ដែក ស៊ីម៉ង់ត៍ ទុយោ ប្រេងសាំង។ទំហំនៃការបាត់បង់គ្រឿងសំភារៈរបស់ក្រុមហ៊ុនជប៉ុន នាពេលកន្លងមកនេះរាប់សែនដុល្លារ។
ដោយឡែកសមត្ថកិច្ចនៅតំបន់នោះមិនបានរំខានដល់ក្រុមជនខិលខូចទាំងនោះម្តងណាមួយ ។ គ្រឿងសម្ភារៈដែលកម្មករ និងអ្នកគ្រប់គ្រងធ្វើស្ពានអ្នកលឿងលួចចេញពីការដ្ឋាននាពេល កន្លងមក យកទៅលក់ឲ្យអ្នកមានឥទ្ធិពលតំបន់អ្នកលឿងត្រើយខាងលិច និងត្រើយខាងកើត រាល់យប់។ ពាក់ព័ន្ធនៃការបាត់បង់សំភារៈសាងសង់ស្ពានអ្នកលឿង លោក សេង ពន្លក អធិការនគរបាលស្រុកពាមរក៍ ខេត្តព្រៃវែង បានបញ្ជាក់ថា ដោយសារភាគីខាងក្រុមហ៊ុន ជប៉ុនមិនបានទំនាក់ទំនងសហការជាមួយអាជ្ញាធរមានសមត្ថកិច្ចនោះឡើយ។
ហេតុនេះ កំលាំងប៉ូលីសស្រុកពាមរក៍ ក៏មិនហ៊ានទៅក្បែរកន្លែងការដ្ឋានស្ពាននោះទេ។ គួរបញ្ជាក់ថា កាលពីពាក់កណ្តាលខែ កញ្ញា ឆ្នាំ ២០១៤ កន្លងទៅនេះ នៅតំបន់ អ្នកលឿងត្រើយខាងលិច ស្ថិតនៅស្រុកលើកដែក មានចោរលួចទុយោទឹកដ៏មានតំលៃ តែត្រូវក្រុមហ៊ុនជប៉ុនរកឃើញ ហើយបានប្តឹងសមត្ថកិច្ចជួយបទអន្តរាគមន៍រហូតរឹបអូស ទុយោទឹកនោះបានមកវិញ។ តែជនល្មើសមិនត្រូវបានឃាត់ខ្លួននោះទេ ។
