ខេត្តបន្ទាយមានជ័យ៖ចៅហ្វាយខេត្តបន្ទាយមានជ័យ ព្រមានមន្ត្រីគយម្នាក់ដែលមានលំនៅដ្ឋានក្នុងក្រុងសិរីសោភណ័ជាលើកទី២ ក្នុងករណីរំលោភយកដីស្ទឹងធ្វើជាកម្មសិទ្ធរបស់ខ្លួនបន្ទាប់មកក៏មានការព្រមានរួចម្តងទៅហើយពីសំណាក់អាជ្ញាធរខេត្តខាងលើ តែមន្ត្រីរូបនេះមិនព្រមអនុវត្តតាមបទ
បញ្ជានោះទេ បែរជារឹងទទឹងជាមួយនិងចៅហ្វាយខេត្ត ហើយហ៊ានលួចដាំចេក និងដើមស្វាយជាច្រើនពេញមាត់ស្ទឹងទៀតផង ។
សូមបញ្ជាក់ដែលថា ក្នុងហេតុការរំលោភយកដីស្ទឹងនោះ គឺកើតមាននៅដើមខែតុលា ឆ្នាំ២០១៤នេះតែម្តង ស្ថិតនៅចំណុចភូមិក្បាលស្ពាន សង្កាត់ព្រះពន្លា ក្រុងសិរីសោភណ័ ខេត្តបន្ទាយមានជ័យ ខាងកើតផ្លូវជាតិលេខ៥ ចម្ងាយ៥ម៉ែត្រប៉ុណ្ណោះ ស្របតាមដងស្ទឹងសែសិនជាប់ស្ពានថ្មសែសិនតែម្តង ដែលបង្កឡើងពីសំណាក់ម្ចាស់ហាងលក់នំបញ្ជុកដែលមានមុខមាត់ជាមន្ត្រីគយរដ្ឋាករ ប្រចាំនៅច្រកភ្នំដី ស្រុកសំពៅលួនខេត្តបាត់ដំបងឯណោះ ។តាមប្រភពព័ត៏មានជុំវិញកន្លែងកើតហេតុបានអោយដឹងថា ម្ចាស់ទីតាំងដែលមានឈ្មោះបូរគុណ និងប្រពន្ធឈ្មោះទួចសុខា បានរំលោភយកដីស្ទឹងក្នុងទំហំ៤៥ម៉ែត្រ គុណនិង១០ម៉ែត្រធ្វើជាកម្មសិទ្ធរបស់ខ្លួន បែបអាណាធិបតេយ្យ ដោយលួចចាក់ដីចូលក្នុងស្ទឹងខាងលើនៅពេលយប់ប្រភពដ៏ដែលក៏បានអះអាងទៀតថា លោកបូរគុណ ដែលជាមន្ត្រីគយរដ្ឋាករមានលុយមានអំណាច
ក្រាស់គួរសំហើយបានទិញដីមួយកន្លែង ដែលមានច្បាប់អនុញ្ញាតិត្រឹមត្រូវរួចទៅហើយ ចេញពីអាជ្ញាធរមូលដ្ឋាននិងក្រសួងរៀបចំដែនដីទៀតផង ប្រភពដ៏ដែលបានបន្តទៀតថា លោកបានទិញដីបន្ថែមពីឈ្មោះជោគវាសនា ដែលគ្មានច្បាប់អនុញ្ញាតិត្រឹមត្រូវតែនោះគ្រាន់តែជាលេសមួយដោះសារតែប៉ុណ្ណោះ ការពិតទៅគឺលោកគយខាងលើបានចាក់ដីចូលក្នុងស្ទឹងសែសិន ទាំងបំពានហើយលួចដាំដើមចេកនិងដើមស្វាយជាបន្តបន្ទាប់ទៀតផងក្នុងនោះដែរក៏ធ្លាប់មានការព្រមានរួចម្តងទៅហើយ ពីសំណាក់លោកអភិបាលខេត្តបន្ទាយមានជ័យដើម្បីអោយរូបលោកបញ្ឃប់សកម្មភាពខ្លួនឯងជាបន្ទាន់ តែលោកនៅតែរឹងទទឹងបន្តធ្វើលួចដាំចេកនិងដាំស្វាយទាំងកំរោល នៅលើដីដែលខ្លួនបានរំលោភក្នុងដីស្ទឹងខាងលើនោះ ហើយលោកហ៊ានចំណាយថវិការយ៉ាងសន្ធឹកសន្ធាប់សម្រាប់ទៅញាត់មាត់អ្នកកាសែតមួយចំនួនទៀតផង។
លោកវៃ គេងលីអភិបាលរងក្រុងសិរីសោភណ័ តំណាងអោយអាជ្ញាធរខេត្តបន្ទាយមានជ័យ បានប្រាប់អ្នកយកព័ត៏មានកាលពីព្រឹកថ្ងៃទី២៥នេះថា មេគយនិងភរិយារបស់គាត់ពិតជាមិនបានស្តាប់បទបញ្ជារបស់អភិបាលខេត្តនោះទេ ឥឡូវនេះលោកអភិបាលខេត្តបានបញ្ជាជាលើកទី២ គឺសុំអោយលោកដកដើមចេក និងដើមស្វាយ និងកាយដីចេញពីកន្លែងកើតហេតុជាបន្ទាន់ ពុំនោះទេខេត្តនិងមានវិធានការដ៏តឹងរឹងមួយ ដោយមិនយោគយល់ថាជននោះជាអ្នកណានោះទេ គឺត្រូវតែប្រឈមជាមួយនិងផ្លូវច្បាប់ទាំងអស់ដោយខានមិនបាន ។
លោកបូរគុណ មន្ត្រីគយខាងលើនោះ បានប្រាប់កម្ពុជាថ្មីតាមទួរស័ព្ទថា ការពិតទៅដីនោះ មិនមែនជាដីរបស់លោកទេ គឺលោកទិញអោយកូនរបស់លោកសម្រាប់ធ្វើហាងនំបញ្ជុកលក់ផ្ទាល់ខ្លួនតែប៉ុណ្ណោះ ខណះពេលនេះកូនរបស់លោកមិននៅកន្លែងកើតហេតុនោះទេ លោកបូរគុណបានបន្តទៀតថា បើអាជ្ញាធរខេត្តបញ្ជាអោយលោកដកដំណាំចេញលោកក៏ព្រមធ្វើដែរព្រោះលោករស់នៅក្នុងមូលដ្ឋាន ក្រោមឪវ៉ាតគ្រប់គ្រងរបស់អាជ្ញាធរគឺត្រូវតែគោរពលើអាជ្ញាធរមិនអាចរឹងទទឹងបានទេ ដោយឡែកមហានជនជាច្រើនកំពុងរងចាំមើលថាតើអំណាចរបស់អាជ្ញាធរ និងគយរដ្ឋាករខាងលើនោះ នណារខ្លាំងជាងនណារ៕
