កំពង់ចាម ៖ អំពើហិង្សាមួយបានកើតឡើងរវាងក្រុមកម្មករមួយក្រុមតូច ដែលទាមទារលក្ខខណ្ឌការងារហួសកំរិត ក្នុងចំណោមក្រុមកម្មករដទៃទៀតរាប់ពាន់នាក់កំពុងបន្តការងាររបស់ខ្លួនជាធម្មតា ដែលហេតុការណ៍ហិង្សានោះរហូតឈានដល់មានសមត្ថកិច្ចនិងក្រុមកម្មករជាច្រើននាក់រងរបួស
ទៀតផង តែក្រុមសមត្ថកិច្ចបានឃាត់ខ្លួនមេក្រុមបង្កការផ្ទុះហិង្សាចំនួន១០នាក់ផងដែរ។បើតាមលោកហេង វុទ្ធី អធិការនគរបាលស្រុកជើងព្រៃបានឲ្យដឹងថា ដើមឡើយមានក្រុមកម្មករប្រមាណ១០០នាក់បាននាំគ្នាធ្វើការតវ៉ាទាមទារលក្ខខណ្ឌការងារមួយចំនួន ពីរោងចក្រជូហួយ ហ្វូតវែ មានទីតាំងស្ថិតនៅក្នុងស្រុកជើងព្រៃ។
ប៉ុន្តែការតវ៉ានោះហាក់គ្មានមនុស្សចូលរួមដោយសារតែក្រុមកម្មករប្រមាណ២៧០០នាក់ នៅបន្តធ្វើការក្នុងរោងចក្រជាធម្មតា។ ដោយសារតែមានការខឹងសម្បារទើបក្រុមបង្កអសន្តិសុខប្រមាណ១០០នាក់នោះ បានផ្ទុះជាអំពើហិង្សា វាយទ្វាររោងចក្រ និងប្រើដុំថ្មគប់ទៅលើរោងចក្រ ហើយក្នុងដៃរបស់ក្រុមអ្នកតវ៉ាមានសុទ្ធតែចំពាមកៅស៊ូ កាំបិត ដំបង និងដបសាំង ធ្វើការគប់សំដៅទៅលើទ្វាររបងច្រកចូលរោងចក្របណ្ដាលឲ្យឆេះសន្ធោសន្ធៅ។លោកបន្តថា ដោយឃើញសកម្មភាពបែបអនាធិបតេយ្យនិងហិង្សាធ្ងន់ធ្ងរបែបនេះ ទើបកម្លាំងរបស់លោកបានសហការគ្នាទប់ស្កាត់និងចាប់ឃាត់ខ្លួនក្រុមបង្កអសន្តិសុខនោះចំនួន១០នាក់ ដែលក្នុងនោះមានមន្ត្រីរបស់សហជីព ស៊ីខូវឌូផងដែរ។
ចំណែកក្រុមសន្តិសុខដែលបង្ក្រាបការតវ៉ានោះ ក៏បានរងរបួសធ្ងន់ស្រាលចំនួន៤នាក់ និងសន្តិសុខយាមរោងចក្របានរងរបួស២នាក់ទៀតផង។ប្រភពព័ត៌មានឲ្យដឹងថា ការផ្ទុះអំពើហិង្សានោះមានក្រុមកម្មករដែលបម្រើការងារក្នុងរោងចក្រជាធម្មតាក៏បានរងរបួសផងដែរ។ក្រុមសមត្ថកិច្ចក៏បានទប់ស្កាត់ចំពោះអំពើហិង្សាដែលបង្កឡើងដោយក្រុមកម្មករជ្រុលនិយម និងសហជីពខ្លះនៅពីក្រោយខ្នង មិនឲ្យរាលដាលបន្តទៀតនោះទេ ហើយស្ថានភាពក៏បានស្ងប់ស្ងាត់ទៅរកភាពប្រក្រតីឡើងវិញ ក្នុងរយៈពេលប៉ុន្មានម៉ោងបន្ទាប់មកនោះ។
ក្រុមបង្កអសន្តិសុខទាំង១០នាក់ ត្រូវបានបញ្ជូនទៅសាកសួរនៅស្នងការដ្ឋាននគរបាលខេត្ត ដើម្បីចាត់ការតាមផ្លូវច្បាប់ ហើយខាងតុលាការក៏បានកោះហៅមនុស្សពាក់ព័ន្ធមួយចំនួនទៀតដើម្បីសាកសួរលើករណីនេះផងដែរ៕
