(កំពង់ធំ)÷ នៅព្រឹកថ្ងៃទី៣១ ខែសីហា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានគណៈបញ្ជាការឯកភាពរដ្ឋបាលខេត្តកំពង់ធំ បានដឹកនាំសហការី ក្រុមការងាររបស់រាជរដ្ឋាភិបាលចុះមូលដ្ឋានឃុំដងកាំបិត ស្រុកសណ្ដាន់ បានផ្សព្វផ្សាយគោលនយោបាយភូមិ.ឃុំមានសុវត្ថិភាព និងបានឧបត្ថម្ភកុំព្យូទ័រ ម៉ាស៊ីនព្រីនធ័រ សម្ភារៈការិយាល័យ ជូនប្រធានក្រុមប្រឹក្សាឃុំ សម្រាប់បម្រើការងាររដ្ឋបាល ព្រមទាំងស្បៀងអាហារគ្រឿងឧបភោគបរិភោគ និងថវិកាមួយចំនួន ដែលអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនក្រុមគ្រួសារអតីតយុទ្ធជន និងគ្រួសារប្រជាការពារ ដែលមានជីវភាពលំបាកខ្វះខាតនៅឃុំដងកាំបិត ស្រុកសណ្ដាន់ ខេត្តកំពង់ធំ ។
ឧត្តមសេនីយ៍ទោ សោម ស៊ុន ក្នុងនាមគណៈបញ្ជាការឯកភាពរដ្ឋបាលខេត្តកំពង់ធំ បានផ្សព្វផ្សាយខ្លឹមសារគោលនយោបាយភូមិឃុំ មានសុវត្ថិភាពទាំង៧ចំណុច ដោយផ្តោតសំខាន់ៗ ត្រូវយកចិត្តទុកដាក់ ការពារទប់ស្កាត់ឲ្យខាងតែបាន នូវការជួញដូរ ចែកចាយ និងប្រើប្រាស់គ្រឿងញៀនខុសច្បាប់ ។ បង្រ្កាបឲ្យបានក្រុមក្មេងទំនើងដែលបង្កអសន្តិសុខនៅក្នុងមូលដ្ឋានព្រមទាំងទប់ស្កាត់ មិនឲ្យមានការលេងល្បែងស៊ីសងគ្រប់ប្រភេទនៅក្នុងមូលដ្ឋាន ។ ជាមួយនេះដែរ ឧត្ដមសេនីយ៍ទោសោម ស៊ុន ក៏បានពង្រឹងតួនាទីភារកិច្ច របស់ប្រជាការពារ ក្នុងការចូលរួមចំណែកជាមួយប៉ុស្តិ៍នគរបាលរដ្ឋបាល ក្នុងការការពារថែរក្សាសន្តិសុខ សុវត្ថិភាព ជូនប្រជាជនឲ្យបានល្អប្រសើរ ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានប្រគល់ជូនកុំព្យូទ័រ ចំនួន មួយគ្រឿង ម៉ាស៊ីនព្រីន្ទធ័រចំនួនមួយគ្រឿង និងសម្ភារៈការិយាល័យ មួយចំនួន ដែលមានតម្លៃសរុបជាទឹកប្រាក់ ជាង ៥៦៥ ដុល្លារ។ ដោយឡែកនៅក្នុងឱកាសនេះផងដែរ មេបញ្ជាការតំបន់ប្រតិបត្តិការសឹករងកំពង់ធំ ប្រធានក្រុមការងាររាជរដ្ឋាភិបាលចុះមូលដ្ឋានឃុំ បានប្រគល់ស្បៀងអាហារ គ្រឿងឧបភោគបរិភោគ អំណោយមនុស្សធម៌របស់សម្តេចមបវរធិបតី ហ៊ុន ម៉ាណែត និងលោកជំទាវ ជូនក្រុមគ្រួសារអតីតយុទ្ធជន ប្រជាការពារ និងក្រុមគ្រួសារ ដែលមានជីភាពលំបាកខ្វះខាតចំនួន២០គ្រួសារ ដោយក្នុង១គ្រួសារ ទទួលបានអង្ករចំនួន២៥គីឡូក្រាម មីជាតិចំនួន១កេស ទឹកត្រីទឹកស៊ីអ៊វចំនួន១យួរ និងត្រីខកំប៉ុងចំនួន១យួរ ដោយឡែកប្រជាការពារចំនួន២២នាក់ផ្សេងទៀត ដែលបានចូលរួមក្នុងពិធីនេះ ទទួលបានថវិកាមួយចំនួនផងដែរ ។
លោក លន់ យេន ប្រធានក្រុមប្រឹក្សាឃុំ បានថ្លែងអំណរគុណដ៏ជ្រាលជ្រៅជាទីបំផុត ចំពោះសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលតែងតែយកចិត្តទុកដាក់ជួយដោះស្រាយនូវរាល់ទុក្ខលំបាករបស់ក្រុមគ្រួសារអតីតយុទ្ធជន ប្រជាជននៅតាមមូលដ្ឋាននានា ពិសេសនៅឃុំដងកាំបិត ស្រុកសណ្តាន់ និងសូមគោរពថ្លែងអំណរគុណចំពោះឧត្តមសេនីយ៍ទោ សោម ស៊ុន និងក្រុមការងារចុះមូលដ្ឋានឃុំដងកាំបិត ដែលបានឧបត្ថម្ភកុំព្យូទ័រ ម៉ាស៊ីនព្រីនធ័រ និងសម្ភារៈការិយាល័យ សម្រាប់បម្រើការងាររដ្ឋបាលក្នុងឃុំ និងសូមគោរពជូនពរ សម្តេច លោកជំទាវ ឯកឧត្តម អស់លោក លោកស្រីទាំងអស់ សូមទទួលបាននូវពុទ្ធពរទាំង៤ប្រការ កុំបីឃ្លៀងឃ្លាតឡើយ។
អត្ថបទតំបន់សឹករងកំពង់ធំ
