ខេត្តបាត់ដំបង យុវជន៣នាក់ បានរងរបួសធ្ងន់ស្រាល កំពង់សង្គ្រោះនៅមន្ទីពេទ្យ ដោយសារឡានកូរ៉េ បុកម៉ូតូ ក្នុងទិសដៅបញ្ច្រាសគ្នា ខណៈដែលជិះវ៉ាឡានមួយគ្រឿង ផ្សេងទៀតស្របគ្នា ។ ចំណែកអ្នកបើកបរ រថយន្តបង្ក រត់គេចខ្លួនបាត់ បន្សល់ទុកតែរថយន្តចោល នៅ
កន្លែងកើតហេតុ ។ ហេតុការណ៏ គ្រោះថ្នាក់ចរាចរនេះ បានកើតឡើង នៅតាមបណ្តោយផ្លូវជាតិលេខ៥ ត្រង់ចំណុចមុខវត្តពោធិ៍ ស្ថិតក្នុងភូមិកន្សៃបន្ទាយ ឃុំមោង ស្រុកមោងឬស្សី ខេត្តបាត់ដំបង ។
លោក សោម រ៉ាវុធ មន្ត្រីប៉េអឹមស្រុកមោងឬស្សី បានឲ្យដឹងថា យុវជន៣នាក់រងគ្រោះ ទី១ឈ្មោះ ធី សុផល អាយុ២៥ឆ្នាំ រងរបួសស្រាល ទី២ឈ្មោះ ហាត ថើន អាយុ២២ឆ្នាំ រងរបួសធ្ងន់ (បែកក្បាល) ទី៣ឈ្មោះ ម៉ៅ កាន់ អាយុ២២ឆ្នាំ រងរបួសធ្ងន់ (បែកមុខ បែកមាត់ ដៃនិងជើង) អ្នកទាំង៣នាក់ មានមុខរបរធ្វើស្រែ រស់នៅភូមិស្រែបល្ល័ង្គ ឃុំធិបតី ស្រុកគាស់ក្រឡ ខេត្តបាត់ដំបង ។ ចំណែកម៉ូតូខូចខាតដែលយុវជនទាំង៣នាក់ ជិះម៉ាកហុងដាឌ្រីម ពណ៌ខ្មៅ ស៊េរី២០០៩ ពាក់ស្លាកលេខ បាត់ដំបង ១Y-៧៥១៤ ។
រីឯអ្នកបើកបររថយន្ត ម៉ាកកូរ៉េ១តោនកន្លះពណ៌លឿង ពាក់ស្លាកលេខ ២S៦០២៤ (មិនទាន់ស្គាល់ឈ្មោះ) បានរត់គេចខ្លួនបាត់ទាំងយប់ ។ សាក្សីបានប្រាប់សមត្ថកិច្ចថា មុនពេលកើតហេតុ គេឃើញម៉ូតូ១គ្រឿង ជិះឌុបគ្នា៣នាក់ ធ្វើដំណើរពីទិសខាងកើតទៅលិច ។ ពេលនោះម៉ូតូជនរងគ្រោះ បានជិះវ៉ារថយន្ត១គ្រឿង នៅពីខាងមុខ ។
ភ្លាមនោះគេឃើញរថយន្តកូរ៉េ ពណ៌លឿង បើកបញ្ច្រាសទិសគ្នា បានបើកវ៉ារថយន្ត១គ្រឿងទៀត ពីមុខដែរ ជ្រុលទៅបុកម៉ូតូ នៅចំគំនូសកណ្តាលថ្នល់ បណ្ដាលឲ្យដួលមនុស្ស ប្រកាច់រណូករណែលលើថ្នល់តែម្តង ។ ចំណែកតៃកុងរថយន្តកូរ៉េ បានឈប់ចតឡានចោល ហើយបើកទ្វារចុះរត់គេចខ្លួនបាត់ ទាំងយប់តែម្ដង ។
ជនរងគ្រោះធ្ងន់ស្រាល ទាំង៣នាក់ ត្រូវបានសមត្ថកិច្ច ជួយដឹកយកទៅសង្គ្រោះ នៅមន្ទីរពេទ្យភ្លាមៗដែរ ។ បច្ចុប្បន្នមធ្យោបាយទាំង២គ្រឿង ត្រូវបានខាងប៉ូលិសចរាចរណ៍ ស្រុកមោងឬស្សី អូសយកទៅរក្សាទុក នៅអធិការដ្ឋាននគរបាល ស្រុកមោងឬស្សី រង់ចាំស្រាវជ្រាវរកម្ចាស់ឡាន ចូលខ្លួនមកធ្វើការដោះស្រាយ ទៅតាមផ្លូវច្បាប់ ៕
