កំពង់ឆ្នាំង៖នៅក្នុងក្រុងកំពង់ឆ្នាំងនាល្ងាចថ្ងៃទី២៤ ខែតុលា ឆ្នាំ២០១៤ គេពិនិត្យឃើញវត្តមានយុវជនយុវនារីរាប់ពាន់នាក់ មកពីបណ្តាខេត្តផ្សេងៗមកជួលបន្ទប់ផ្ទះសំណាក់និងសណ្ឋាគារស្នាក់នៅគ្មានសល់ អ្នកខ្លះគ្មានបន្ទប់ជួលស្នាក់នៅក៍បានសុំវត្តអារាមនៅក្នុងមូលដ្ឋានស្នាក់នៅ ដើម្បីចូលរួម
ការប្រឡងភាសាកូរ៉េរយះពេល២ថ្ងៃ នៅក្នុងមណ្ឌលប្រ ឡងទាំង២ក្នុងក្រុងកំពង់ឆ្នាំង។ លោក ឡៅ គឹមសល្យ ប្រធានមណ្ឌលប្រឡងភាសាកូរ៉េនៅក្នុងសាលាបឋមសិក្សា គំរូក្រុងកំពង់ឆ្នាំងបាននិយាយអោយក្រុមអ្នកសារព័ត៌ដឹងនៅព្រឹកថ្ងៃទី២៥ ខែតុលា ឆ្នាំ២០ ១៤ នេះថា៖មណ្ឌលប្រឡងភាសាកូរ៉េនៅក្រុងកំពង់ឆ្នាំងមាន២មណ្ឌលគឺ៖ ១.សាលាបឋមសិក្សាគំរូក្រុងកំពង់ឆ្នាំង និង២.វិទ្យាល័យព្រះបាទសុរាម្រឹត ការប្រឡងមានរយះពេល២ថ្ងៃគឺថ្ងៃទី២៥និងថ្ងៃទី២៦ ខែតុលា ឆ្នាំ២០១៤នេះ។
លោក ឡៅ គឹមសល្យ បានអោយដឹងទៀតថា៖ នៅក្នុងមណ្ឌលប្រឡងសាលាគំរូក្រុងក្នុងមួយថ្ងៃត្រូវប្រឡង២ពេល និងក្នុងមួយពេលៗ មានបេក្ខជនប្រឡងចំនួន៨៦៤នាក់ ចំណែកនៅមណ្ឌលប្រឡងវិទ្យាល័យព្រះបាទសុរាម្រឹត មានបេក្ខជនប្រឡងក្នុងមួយពេលៗ ចំនួន៩៦០នាក់ ហើយបេក្ខជនម្នាក់មានសិទ្ធចូលប្រឡងតែមួយលើកប៉ុណ្ណោះ។ដូច្នេះក្នុងរយះពេល២ថ្ងៃខាងលើនេះបេក្ខជនដែលត្រូវមកចូលរួមប្រឡងភាសាកូរ៉េសរុបមានចំនួនជាង៧ពាន់នាក់។ចំពោះការប្រឡងភាសាកូរ៉េនៅក្នុងទូទាំងប្រទេស មានបេក្ខ ជនដាក់ពាក្យប្រឡងចំនួនជាង៤ម៉ឺននាក់ ហើយមណ្ឌលប្រឡងទូទាំងប្រទេសមានចំនួន១១មណ្ឌល។
លោក អនុប្រធានមន្ទីរការងារនិងបណ្តុះបណ្តាលវិជ្ជាជីវៈខេត្តកំពង់ឆ្នាំងបាននិ យា យអោយដឹងថា៖ការប្រឡងភាសាកូរ៉េខាងលើនេះ ដោយសារតែមានបេក្ខជនប្រឡងច្រើនទើបក្រសួងការងារនិងក្រុមការងារប្រឡងរបស់ប្រទេសកូរ៉េ បានតំរូវអោយបេក្ខជនធ្វើការប្រឡង៤ពេល រយះពេល២ថ្ងៃ ទើបអាចបញ្ជប់ការប្រឡងនេះបាន។ចំណែកលោក អនុរក្ស និងមេប្រយោគប្រឡង ក្រសួងការងារបានសំរេចជ្រើសរើសយកលោកគ្រូអ្នកគ្រូបង្រៀននៅតាមវិទ្យាល័យក្នុងខេត្ត ធ្វើជាមេប្រយោគប្រឡងដោយសហការជាមួយមន្ត្រីរបស់ក្រសួងការងារ។ 
ការប្រឡងភាសាកូរ៉េខាងលើនេះនៅក្នុងក្រុងកំពង់ឆ្នាំង យើងសង្កេតឃើញ មានសមត្ថកិច្ចចូលរួមការពារសន្តិសុខនិងសណ្តាប់ធ្នាប់ទាំងនៅក្នុងមណ្ឌលប្រឡង និងទាំងនៅក្នុងកន្លែងស្នាក់នៅយ៉ាងយកចិត្តទុកដាក់ ដើម្បីអោយដំណើរការប្រឡងភាសាកូរ៉េប្រព្រឹត្តទៅបានជោគជ័យតាមផែនការរបស់ក្រសួថការងារ៕
h
