សមត្ថកិច្ចថៃបានបញ្ជូនសពពលរដ្ឋខ្មែរម្នាក់ មកតាមច្រកអន្តរជាតិអូរស្មាច់ ប្រគល់ឱ្យអាជ្ញាធរកម្ពុជា ប្រចាំច្រកអូរស្មាច់។
លោក ជ័យ វាសនា នាយប៉ុស្កិ៍រដ្ឋបាលអូរស្មាច់បានឱ្យដឹងថា សាកសពពលរដ្ឋខ្មែរដែលទាហ៊ានថៃបាញ់ស្លាប់ឈ្មោះហេង មេងអ៊ី ភេទប្រុសអាយុ២៤ឆ្នាំ រស់នៅភូមិព្រែកតាឡី ឃុំព្រែក
អំបិល ស្រុកស្អាង ខេត្តកណ្តាលដែលត្រូវសមត្ថកិច្ចថៃបាញ់ស្លាប់នៅវេលាម៉ោង ៣ និង៣៥នាទីនាថ្ងៃទី២៣ខែតុលាឆ្នាំ២០១៤កន្លងទៅហើយសមត្ថកិច្ចថៃបានបញ្ជូនមកប្រគល់ឱ្យសមត្ថកិច្ចកម្ពុជាតាមច្រកអន្តរជាតិអូរស្មាច់នៅវេលាម៉ោង៩ យប់ថ្ងៃដដែល។
លោកបន្តថា សមត្ថកិច្ចយើងបានធ្វើការត្រួតពិនិត្យសាកសពពលរដ្ឋខ្មែរដែលស្លាប់នោះពិនិត្យទៅឃើញមានស្លាក់ស្នាម ត្រូវគ្រាប់កាំភ្លើងចំនួន៣គ្រាប់ គឺបាញ់ចំក្បាល១គ្រាប់ និងខ្លួនមួយគ្រាប់ ហើយនឹងត្រូវចំភ្លៅ១គ្រាប់។
នាយកប៉ុស្តិ៍បន្តថា តាមរបាយការណ៍របស់ទាហ៊ានថៃបានផ្តល់មកឱ្យសមត្ថកិច្ចខាងកម្ពុជាបានឱ្យដឹងថា មានពលរដ្ឋខ្មែរ២នាក់បាននាំគ្នាចូលទៅតាមច្រកអូរខ្លាឃ្មុំ ប្រមាណជាង៤០០ម៉ែត្រ ពីព្រំដែនចូលទៅលួចម៉ូតូអ្នកភូមិថៃ ហើយប្រជាពលរដ្ឋថៃ បានប្តឹងទៅទាហានថៃ ដោយទាហ៊ានថៃស្ទាក់បាញ់ស្លាប់ម្នាក់ ចំណែកឯម្នាក់ទៀតបានរត់គេចខ្លួនរួចពីការបាញ់ប្រហាររបស់ទាហានថៃ។
