កំពង់ធំៈ ប្រជាពលរដ្ឋ និងប្អូនកុមារាកុមារីមានសេចក្តីត្រេតអរ សប្បាយរីការាយយ៉ាងខ្លាំង ក្រោមការជួយឧបត្ថម្ភ សាលារៀនមួយខ្នង ៥បន្ទប់ ដែលជាអំណោងដោយ អង្គការកុមារស្រុកស្រែ ប្រចាំប្រទេសបារាំង ជូនដល់សិស្សានុសិស្ស អនុវិទ្យាល័យម្សាក្រង ស្ថិតនៅក្នុងឃុំម្សាក្រង ស្រុកស្ទោង ខេត្តកំពង់ធំ ។
សាលារៀនដែលអង្គការកុមារស្រុកស្រែ បានកសាងជូន ត្រូវបានធើ្វពិធីបញ្ចុះបឋមសិលាសាងសង់ នាព្រឹក ថ្ងៃទី ២៧ ខែ តុលា ឆ្នាំ ២០១៤ ក្រោមអធិតីភាព ឯកឧត្តម សុខ លូ អភិបាលរងខេត្តកំពង់ធំ និងលោកស្រី ម៉ារី ណូអែលវ្យូ នាយិការអង្គការកុមារស្រុកស្រែព្រមទាំងសហការីប្រចាំប្រទេសបារាំងនិងលោក ព្រឹម រដ្ឋា អភិបាលស្រុកស្ទោង ព្រមទាំងលោក លោកស្រី លោកតា លោកយាយ សិស្សានុសិស្សចូលរួមយ៉ាងអធឹកអធ័ម។
លោក ព្រឹម រដ្ឋា អភិបាលស្រុកស្ទោង បានសម្តែងនូវការអរគុណ ដល់អង្គការកុមារស្រុកស្រែ ដែមបានជួយ សាងសង់សាលារៀនជូនដល់ក្មួយៗ មានទាន់ពេលវេលា ខណៈពេលដែលក្មួយកំពុងតែត្រូវការចាំបាច់បំផុត ក្នុងការសិក្សារៀនសូត្រ ប្រៀបបានទៅនឹងចំណីអាហារ ដែលមិនអាចខ្វះបាន សម្រាប់ទ្រងទ្រង់រាងកាយ និងការបន្តវេណនៃការដឹកនាំប្រទេសទៅថ្ងៃអានាគត់ដូច្នេះការសិក្សាមានសារៈសំខាន់ខ្លាំងណាស់ សម្រាប់គ្រប់សម័យកាល ដែលពុំអាចខ្វះបាន ដូច្នេះការជួយរបស់អង្គការកុមារស្រុកស្រែ ប្រចាំប្រទេសបារាំង បានជួយសាលារៀនមួយខ្នងនេះ គឺជាគុណបំណាច់យ៉ាងធំធេងណាស់ ដែលអាចជួយឲ្យកុមារកម្ពុជា រាប់រយរាប់ពាន់នាក់ បានរៀនសូត្រ មានចំណេះដឹងគឺជាពន្លឺនៃជីវិតរបស់ពួកគេ។
លោក យ៉ន គឹមលន់ នាយកសាលាអនុវិទ្យាល័យ បានរាប់រៀបប្រវត្តន៍នៃការសាងសង់សាលារៀន អនុវិទ្យាល័យម្សាក្រង ក្រោមការខ្នះខ្នែងពីអាជ្ញាធរខេត្ត និងអាជ្ញាធរស្រុក រួមទាំងឃុំម្សាក្រង បានឈានដល់ ថ្ងៃនេះគឺជាថ្ងៃដំបូងដែលបានធ្វើពិធីបញ្ចុះបឋមសិលា សាងសង់អាគារសិក្សាអនុវិទ្យាល័យដំបូង ដែលជាអំណោយ របស់អង្គការកុមារស្រុកស្រែ ស្របពេលដែលឃុំម្សាក្រង កំពុងតែមានការខ្វះខាតនូវអាគារសិក្សា សម្រាប់ សិស្សក៏មានកំណើនរៀងរាល់ឆ្នាំ។
ឯកឧត្តម សុខ លូ អភិបាលរងខេត្តកំពង់ធំ បានថ្លែងអំណរគុណ ចំពោះទឹកចិត្តសម្បុរសជនរបស់លោក ស្រី ប្រធានអង្គការកុមារស្រុកស្រែ ដែលបានជួយរំលែកភារកិច្ច របស់រាជរដ្ឋាភិបាលកម្ពុជា ចូលរួមកសាង សាលារៀនជូនដល់ក្មួយៗ ស្របតាមគោលនយោបាយរបស់រាជរដ្ឋាភិបាល ដែលបានជម្រុញឲ្យមានការ សិក្សារៀនសូត្រ គ្រប់ច្រល្ហកនិងគ្រប់ទិសទី ដែលចាត់ទុកវិស័យសិក្សារៀនសូត្រជាកិច្ចការសំខាន់ ហើយថ្ងៃនេះប្អូនបានទទួលសាលារៀន ក៏សូមឲ្យជួយគ្នាថែរក្សាទ្រព្យសម្បត្តិ របស់សាលាដូចជាទ្រព្យ
របស់យើង និង ថែរក្សាអានាម័យ ឲ្យស្អាតឲ្យក្លាយទៅជាទីកន្លែងដែលសិក្សា និងគួរឲ្យចង់សិក្សា ព្រោះសម្បុរសជន បានសង្ឃឹមនិងជឿជាក់ថា សាលារៀនដែលបានកសាងជូននេះ បានជួយឲ្យមនុស្សជាច្រើនបានរៀនចេះដឹង ដូច្នេះកុំឲ្យម្ចាស់អំណោយគេអស់សង្ឃឹម និងសំណូមពរដល់ លោកយាយ លោកតា មីងមា ជួយនាំកូន ចុះឈ្មោះចូលរៀនកុំបណ្តែតបណ្តោយ ព្រោះចំណេះវិជ្ជាជាទ្រព្យនៅអានាគត់។ ដោយ ប៊ុន រដ្ឋា
