ខេត្តកំពង់ឆ្នាំង ៖ កម្លាំងនគរបាលស្រុកកំពង់ត្រឡាច ដឹកនាំដោយលោក ហ៊ុល វាសនា អធិការនគរបាលស្រុក បានធ្វើការឡោមព័ទ្ធ និងឃាត់ខ្លួនមនុស្សចំនួន ៤នាក់ ពាក់ព័ន្ធនឹងករណីចែកចាយ និងប្រើប្រាស់គ្រឿងញៀន នៅចំណុចព្រៃមាត់បឹងភក់ ក្នុងភូមិកំពង់ត្រឡាចលើ ឃុំ
កំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង កាលពីវេលាម៉ោង ១៤ និង ៣០នាទីរសៀល ថ្ងៃទី២៥ ខែ តុលា ឆ្នាំ២០១៤ ។
លោក ហ៊ុល វាសនា អធិការនគរបាលស្រុកកំពង់ត្រឡច បានអោយដឹងថាជនសង្ស័យ ទាំង ៤នាក់ ដែលត្រូវសមត្ថកិច្ចឃាត់ខ្លួននោះមានទី១-ឈ្មោះ ប្រាក់ ភេន ភេទប្រុស អាយុ ៣០ ឆ្នាំ មានទីលំនៅភូមិដកស្និត ឃុំច្រេស ស្រុកកំពង់ត្រឡាច ខេត្តកំពង់ឆ្នាំង, ទី២-ឈ្មោះ ឃិត ភាព ភេទប្រុស អាយុ ២៥ឆ្នាំ, ទី៣-ឈ្មោះ លឹម សាលីន ភេទប្រុស អាយុ២២ឆ្នាំ និងទី៤ ឈ្មោះ ម៉ាត់ លី ភេទប្រុស អាយុ ៣១ឆ្នាំ រស់នៅភូមិច្រករមៀត ឃុំអូឬស្សី ស្រុកកំពង់ត្រឡាច ខេត្តកំពង់ឆ្នាំង ។
លោក ហ៊ុល វាសនា បន្តថា មុនពេលចាប់ខ្លួនជនសង្ស័យខាងលើ ដោយមានសេចក្តី រាយការណ៌ពីលោក យី សារ៉ា នាយប៉ុស្តិ៍រដ្ឋបាលកំពង់ត្រឡាចថា មានជនសង្ស័យកំពុងប្រព្រឹត្ត បទល្មើសពាក់ព័ន្ធនឹងគ្រឿងញៀននៅចំណុចខាងលើ លោកបានសុំគោលការណ៍ពីលោក ស្នងការនគរបាលខេត្ត រួចដឹកនាំកម្លាំងចុះបង្ក្រាប និងចាប់ឃាត់ខ្លួនបានតែម្តង ។
ក្នុងការចាប់ ខ្លួនជនសង្ស័យខាងលើ សមត្ថកិច្ចដកហូតបានវត្ថុតាងមានទូរស័ព្ទដៃ ៣គ្រឿង ឧបករណ៍ សម្រាប់សេពគ្រឿងញៀន និងថ្នាំញៀនមួយចំនួន ។បច្ចុប្បន្ន ជនសង្ស័យខាងលើ ត្រូវបានបញ្ជូនទៅសួរនាំនៅស្នងការដ្ឋាននគរបាលខេត្តកំពង់ឆ្នាំង រួចបញ្ជូនខ្លួនទៅសាលាដំបូងខេត្តកំពង់ឆ្នាំង នៅព្រឹកថ្ងៃទី២៦ ខែតុលា ឆ្នាំ២០១៤ ដើម្បីចាត់ការបន្តទៅតាមនិតិវិធី ៕ 
