កំពង់ឆ្នាំង ៖ កាលពីវេលាម៉ោង ១១និង២០នាទីព្រឹក ថ្ងៃទី២៦ ខែតុលា ឆ្នាំ២០១៤សមត្ថកិច្ចនគរបាល បានឃាត់ខ្លួន ជនស្ស័យចំនួន៤នាក់ ក្រោយពីបានរក ឃើញភាពមិនប្រក្រតី មួយ ចំនួននៅចុងម៉ោងប្រឡងតេស្តិ៍ភាសាកូរ៉េ ។ លោក ម៉ា យ៉ុន ប្រធានផ្នែក ព្រហ្មទណ្ឌ នៃ
អធិការដ្ឋាននគរបាលក្រុងកំពង់ឆ្នាំង បានអោយដឹងថា ជនសង្ស័យទាំង៤នាក់ ត្រូវបានគេជួលប្រឡងជំនួស ក្នុងតម្លៃម្នាក់ៗចាប់ពី ៥០០ដុល្លាអាមេរិក ទៅ ១០០០ដុល្លាអាមេរិក ប៉ុន្តែមិនទាន់បានទទួលប្រាក់ទេ លោកបានបន្តអោយដឹងទៀតថា អ្នកទាំងបួននាក់ខាងលើទទួលបានត្រឹមតែថ្លៃបាយ ១០ដុល្លា ក្នុងម្នាក់ៗប៉ុណ្ណោះ ។
ជនសង្ស័យទាំង៤នាក់ មានឈ្មោះ ទី១- ឈ្មោះ សិន វិមាន ភេទប្រុស អាយុ៣២ឆ្នាំ រស់នៅសង្កាត់វាលវង់ ខណ្ឌ៧មករា ភ្នំពេញ ទី២-ឈ្មោះ ភួស វណ្ណា ភេទ ប្រុស អាយុ៣០ឆ្នាំ រស់នៅសង្កាត់ ទួលសង្កែ ខណ្ឌឬស្សីកែវ ភ្នំពេញ ទី៣-ឈ្មោះ ទួន កុសល ភេទប្រុស អាយុ២៩ឆ្នាំ រស់នៅភូមិគ្រួស ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង និងទី៤-ឈ្មោះ ផុន សុភណ្ឌ ភេទប្រុស អាយុ២៥ឆ្នាំ រស់នៅសង្កាត់បឹងសាឡាង ខណ្ឌទួលគោក រាជធានីភ្នំពេញ ។
ជនសង្ស័យទាំង៤នាក់នេះ ទទួលការព្រមព្រៀងចូលប្រឡងជំនួសបេក្ខជន ដែលត្រូវចូលប្រឡងដែលត្រូវអនុរក្សរកឃើញភាពមិនប្រក្រតីនោះគឺឯកសារប្រឡងមានឈ្មោះម្ចាស់ដើមនៃបេក្ខជនត្រូវប្រឡង ប៉ុន្តែបុគ្គលដែលចូលប្រឡងគឺមានមុខមាត់ និងភិនភាគ និងអត្តសញ្ញាណប័ណ្ណផ្សេងទៅវិញហើយពួកគេបានធ្វើកិច្ចសន្យាព្រមព្រៀងគ្នាថានឹងប្រគល់លុយដល់ដៃពេលធ្លាក់ឈ្មោះ បានទៅធ្វើការនៅប្រទេសកូរ៉េ ។
ជនសង្ស័យត្រូវបានបញ្ជូនទៅកាន់ស្នងការដ្ឋាននគរបាលខេត្ត ដើម្បីសាកសួរកសាងសំណុំរឿងបញ្ជូនទៅសាលាដំបូងខេត្ត តាមនីតិវិធី។សូមរម្លឹកថា នៅក្នុងក្រុងកំពង់ឆ្នាំងនៅថ្ងៃទី២៥-២៦ ខែតុលា ឆ្នាំ២០១៤គេពិនិត្យឃើញវត្តមានយុវជនយុវនារីរាប់ពាន់នាក់ មកពីបណ្តាខេត្តនានា មកជួលបន្ទប់ផ្ទះសំណាក់និងសណ្ឋាគារស្នាក់នៅគ្មានសល់អ្នកខ្លះគ្មានបន្ទប់ជួលស្នាក់នៅក៏បានសុំវត្តអារាមស្នាក់នៅ ដើម្បីចូលរួមការប្រឡងភាសាកូរ៉េ នៅក្នុងមណ្ឌលប្រឡងទាំង២ក្នុងក្រុងកំពង់ឆ្នាំង។ប្រធានមណ្ឌលប្រឡងភាសាកូរ៉េ បានអោយដឹងថា មណ្ឌលប្រឡងភាសាកូរ៉េនៅក្រុងកំពង់ ឆ្នាំងមាន២មណ្ឌលគឺ ១.សាលាបឋមសិក្សាគំរូក្រុងកំពង់ឆ្នាំង និង២.វិទ្យាល័យព្រះបាទសុរាម្រឹត ការប្រឡងមានរយៈពេល២ថ្ងៃគឺថ្ងៃទី២៥និងថ្ងៃទី២៦ ខែតុលា ឆ្នាំ២០១៤។
នៅក្នុងមណ្ឌលប្រឡងនីមួយៗ ក្នុងមួយថ្ងៃត្រូវប្រឡង២ពេល គឺពេលព្រឹក និងពេលរសៀល បេក្ខជនម្នាក់មានសិទ្ធចូលប្រឡងតែមួយលើកប៉ុណ្ណោះ។ ក្នុងរយៈពេល២ថ្ងៃខាងលើនេះបេក្ខជនដែលត្រូវមកចូល រួមប្រឡងភាសាកូរ៉េសរុបមានចំនួនជាង៧ពាន់នាក់ ។ចំពោះការប្រឡងភាសាកូរ៉េនៅក្នុងទូទាំងប្រទេស មានបេក្ខជនដាក់ពាក្យប្រឡងចំនួនជាង៤ម៉ឺននាក់ ហើយមណ្ឌលប្រឡងទូទាំងប្រទេសមានចំនួន១១មណ្ឌល។
