លោកស្រី ប្រធានាធិបតីប្រេស៊ីល ឌីលម៉ា រួសេហ្វ ដែលទើបជាប់ឆ្នោតថ្មី កាលពីថ្ងៃអាទិត្យ ទី២៦ ខែតុលា ឆ្នាំ២០១៤ នោះ បានធ្វើការប្តេជ្ញាភ្លាមៗ ក្នុងពិធីអបអរជ័យជម្នះ របស់គណបក្សពលករ ថា នឹងធ្វើកំណែទម្រង់ នៅទូទាំងប្រទេស ជាពិសេសលោកស្រី សូមអំពាវនាវឲ្យមានការរួបរួមជាតិ ឡើងវិញ ដើម្បីជំរុញសេដ្ឋកិច្ចប្រទេសអាម៉េរិកឡាទីនមួយនេះ ឲ្យរួចចាកផុតពីបញ្ហាទាំងឡាយ ដែល ធ្លាប់កើតមានកន្លងមក ។
ថ្លែងចំពោះមុខប្រជាជាតិទាំងអស់ នៅក្នុងប្រទេស ដែលមានប្រជាជនសរុបជាង ២០២ លាននាក់ និង មានផ្ទៃធំបំផុត នៅលើសកលលោកលំដាប់ទី ៥នេះ លោកស្រី រួសេហ្វ បញ្ជាក់ ច្បាស់ៗថា “ខ្ញុំអំពាវនាវ ដល់ប្រជាជនប្រេស៊ីលទាំងអស់ ត្រូវរួបរួមគ្នា ដោយគ្មានលក្ខខណ្ឌ សម្រាប់អនាគតប្រទេសមួយនេះ។ ខ្ញុំចង់ធ្វើជាប្រធានាធិបតី ដែលប្រសើរថ្លៃថ្លាជាងអ្វីដែលខ្ញុំធ្លាប់ធ្វើតាំងពីមុនរហូតមកដល់ពេលនេះ” ។
គួរបញ្ជាក់ថា តាមសម្តីរបស់លោកស្រីប្រធានាធិបតី ពិតណាស់ថាចំណុចចម្បងបំផុត គឺការ ធ្វើកំណែ ទម្រង់នយោបាយ បន្ទាប់ពីលោកស្រី ត្រូវបក្សប្រឆាំងរិះគន់ថា បានប្រព្រឹត្តអំពើ ពុករលួយ ហើយប្រការ នេះលោកស្រីក៏បានប្តេជ្ញាផងដែរថា នឹងលុបបំបាត់អំពើពុករលួយ ព្រមទាំងនិទ្ទណ្ឌភាព តាមរយៈការ អនុវត្តច្បាប់ឲ្យបានតឹងរឹងបំផុត ។
លោកស្រីប្រធានាធិបតីប្រេស៊ី ឌីលម៉ា រួសេហ្វ វ័យ ៦៦ឆ្នាំបានជាប់ឆ្នោតលើគូ ប្រជែងរបស់ លោកស្រី គឺលោក អ៊ែស្យ៉ូ ណេវែស យ៉ាងប្រកៀកប្រកិតបំផុត ដោយសម្លេង គាំទ្រ ៥១,៦២ភាគរយ លើ៤៨,៣៨ ភាគរយ ជាហេតុនាំឲ្យលោកទទួលបានជោគជ័យ នឹង បន្តកាន់តំណែង របស់លោកស្រីមួយអាណត្តិ ដែលមានរយៈពេល ៤ទៀត ៕
Ads
