ព្រះវិហារ៖ នៅរសៀលថ្ងៃទី០៧ ខែមីនា ឆ្នាំ២០១៤ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានដឹកនាំគណៈប្រតិភូក្រសួងមួយក្រុម ទៅកាន់ប្រាសាទកោះកែរ អតីតរាជធានីនៃចក្រភពខ្មែរ ដែលមានទីតាំងស្ថិតនៅភូមិកោះកែរ ឃុំស្រយ៉ង់ ស្រុកគូលែន ខេត្តព្រះវិហារ ដើម្បីជួបសំណេះសំណាលជាមួយក្រុមយុវជន ដែលបានចូលរួមជួយរៀបចំកិច្ចប្រជុំគណៈកម្មាធិការបេតិកភ័ណ្ឌពិភពលោកលើកទី៣៧ នៅកម្ពុជា កាលពីខែឧសភា ឆ្នាំ២០១៣។
អញ្ជើញអមដំណើរក្នុងឱកាសនោះ រួមមាន៖ ឯកឧត្តម សួស យ៉ារ៉ាតំណាងរាស្ត្រមណ្ឌលព្រះវិហារ ឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហាររួមទាំងមន្ត្រីក្រុមការងារពិសេសថ្នាក់ជាតិតំបន់ព្រះវិហារ មន្ត្រីអាជ្ញាធរជាតិប្រាសាទព្រះវិហារអាជ្ញាធរមូលដ្ឋាន និងកងកម្លាំងមានសមត្ថកិច្ចពាក់ព័ន្ធ។ គោលបំំណងសំខាន់នៃដំណើរទស្សនកិច្ចនេះគឺ ដើម្បីបំផុស លើកទឹកចិត្ត និងចលនាឱ្យយុវជនបានយល់ដឹងកាន់តែច្បាស់អំពីតម្លៃបេតិកភ័ណ្ឌវប្បធម៌ ប្រវតិ្តសាស្ត្រនិងធម្មជាតិរបស់ជាតិយើង។
ការជួបជុំនេះក៏ជាសក្ខីភាពបញ្ជាក់នូវការគាំទ្ររបស់យុវជនយើងចំពោះកិច្ចខិតខំប្រឹងប្រែងរបស់រាជរដ្ឋាភិបាល ក្នុងការប្រែក្លាយតំបន់តាមព្រំដែនឱ្យទៅជាតំបន់មានសន្តិភាព ស្ថិរភាព អភិវឌ្ឍន៍ និងសហប្រតិបត្តិការ។ ឯកឧត្តមរដ្ឋមន្ត្រីក៏បានបញ្ជាក់ថា ការអភិវឌ្ឍវិស័យកសិឧស្សាហកម្ម ការអភិវឌ្ឍវិស័យទេសចរណ៍ ក៏ដូចជាការអភិរក្សប្រាសាទបូរាណ ដែលជាដួងព្រលឹងខ្មែរ នៅតាមបណ្តាខេត្តភាគខាងជើងនេះ ពិតជាបានរួមចំណែកយ៉ាងសំខាន់ដល់ការលើកកម្ពស់ជីវភាពរបស់បងប្អូនប្រជាពលរដ្ឋ ជាពិសេសបងប្អូនជនជាតិដើមភាគតិច។
តាមរយៈសកម្មភាពអភិវឌ្ឍនិងអភិរក្សទាំងនេះ ប្រជាជនក្នុងមូលដ្ឋានឹងអាច ចាប់យកមុខរបរក្នុងវិស័យកសិកម្ម សេវាទេសចរណ៍ និងឧស្សាហកម្មជំនួសឱ្យការរកទទួលទានដោយពឹងផ្អែងទាំងស្រុងទៅលើអនុផលព្រៃឈើ។ ឯកឧត្តមរដ្ឋមន្ត្រីមានជំនឿយ៉ាងមុតមាំថា ការអភិវឌ្ឍដើម្បីអភិរក្ស និងការអភិរក្សដើម្បីអភិវឌ្ឍនេះនឹងរួមចំណែកយ៉ាងសំខាន់ដល់កិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិឱ្យបានសមស្រប។
លោក ឈឿង ចាន់
