កំពង់ចាម: ក្នុងឱកាសដឹកនាំក្រុមការងារ មន្ទីរ អង្គភាពពាក់ព័ន្ធ និងអាជ្ញាធរមូលដ្ឋាន ចុះពិនិត្យស្ថានភាពទឹកជំនន់ទន្លេមេគង្គ នៅចំណុចព្រែកតាឃ្លោក ស្ថិតក្នុងឃុំកោះសូទិន ស្រុកកោះសូទិន នាព្រឹកថ្ងៃទី១៩ ខែកញ្ញា ឆ្នាំ២០២៤នេះ ឯកឧត្ដម អ៊ុន ចាន់ដា អភិបាល នៃគណៈអភិបាល ខេត្តកំពង់ចាម បានណែនាំដល់លោកអភិបាលក្រុង ស្រុក និងស្ថាប័នពាក់ព័ន្ធទាំងអស់ ត្រូវយកចិត្តទុកដាក់ ដល់សុវត្ថិភាពប្រជាពលរដ្ឋ នៅក្នុងមូលដ្ឋាន ខណៈពេលដែលជំនន់ទឹកភ្លៀង និងជំនន់ទន្លេមេគង្គ កំពុងបន្តហក់ឡើង ។
ឯកឧត្ដម អ៊ុន ចាន់ដា មានប្រសាសន៍បញ្ជាក់ថា ផ្អែកតាមស្ថានភាពកម្ពស់ទឹកទន្លេមេគង្គ ខេត្តកំពង់ចាម នាថ្ងៃទី១៩ កញ្ញា នេះ បានឡើងដល់កម្ពស់ជិត ១៣ម៉ែត្រ និងហូរចូលក្នុងព្រែកចំនួន ២៧ លើ ៤១ព្រែក នៅក្នុងភូមិសាស្ត្រ ខេត្តកំពង់ចាម ។
ឯកឧត្ដម សង្កត់ធ្ងន់ថា ជាមួយនឹងស្ថានភាពកម្ពស់ទឹកនេះដែរ អាចបង្កឲ្យគ្រោះថ្នាក់ជាយថាហេតុ នៅតាមបណ្ដាព្រែក ក៏ដូចជា ទីកន្លែងមួយចំនួន ដែលមានទឹកជំនន់ហូរចូល និងភ្លៀងធំដក់លិចនោះ ។
យកឱកាសនោះ ឯកឧត្ដមអភិបាលខេត្ត បានធ្វើការណែនាំ ដល់លោកអភិបាលក្រុង ស្រុក ទាំងអស់ និងស្ថាប័នពាក់ព័ន្ធ ឲ្យបន្តយកចិត្តទុកដាក់ក្នុងការចុះពិនិត្យកន្លែងដែលមានទឹកហូរចូលព្រែក និងកន្លែងទឹកភ្លៀងដក់ ដែលមានប្រជាពលរដ្ឋ មកលេងកំសាន្ត សូមធ្វើការណែនាំឲ្យពួកគាត់ ប្រុងប្រយ័ត្នខ្ពស់ពីសុវត្ថិភាពផ្ទាល់ខ្លួន ជាពិសេស មាតាបិតា អាណាព្យាបាល ត្រូវមើលថែទាំកូនចៅ ឬក្មេងតូចៗ ឲ្យបានហ្មត់ចត់។ ចំពោះម្ចាស់ទូកដរ ប្រកបអាជីវកម្មចម្លង នៅតាមទីកន្លែងព្រែកដែលបានលិច សូមពិនិត្យមើលបច្ចេកទេស ឲ្យបានត្រឹមត្រូវ និងធ្វើកិច្ចសន្យា ចំពោះ សុវត្ថិភាពប្រជាពលរដ្ឋ ដែលធ្វើដំណើរឆ្លងកាត់ ។
ជាមួយគ្នានោះ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានណែនាំឲ្យបន្តតាមដាន ពីសកម្មភាពបង្កបង្កើនផល របស់ប្រជាកសិករ ជាពិសេស លើផលប៉ះពាល់ទឹកជំនន់ទឹកទន្លេមេគង្គ និងជំនន់ទឹកភ្លៀង ដោយរាយការណ៍បន្ទាន់ មកថ្នាក់ខេត្ត ដើម្បី ដាក់វិធានការ និងចុះអន្តរាគមន៍ ទាន់ពេលវេលា ។ ចំណែកក្រុមការងារគណៈកម្មាធិការគ្រោះមហន្តរាយខេត្ត និងមន្ទីរសុខាភិបាល សូមរៀបចំផែនការធានានូវកិច្ចការសង្គ្រោះបន្ទាន់ ទៅដល់ប្រជាពលរដ្ឋ ដែលមានបញ្ហាសុខភាព ខណៈពេលដែលទឹកជំនន់ កំពុងតែកើតមានឡើងនេះ ផងដែរ ៕
