សៀមរាប អង្គកឋិនទានសាមគ្គីមួយ ដែលផ្តួចផ្តើមឡើងដោយលោក ឃឹម ប៊ុនសុង ប្រធានគណៈកម្មាធិការនៃគណបក្ស ប្រជាជនកម្ពុជាខេត្ត និង ជាអភិបាលនៃគណៈអភិបាលខេត្តសៀមរាប និង លោកម៉ន សាម៉ុន ប្រធានក្រុមការងារថ្នាក់ ខេត្តចុះជួយស្រុកប្រាសាទបាគង ខេត្តសៀមរាប និង
លោកជំទាវ ព្រមទាំងអស់លោក លោកស្រីសមាជិកក្រុមការងារ និង អាជ្ញាធរស្រុក ឃុំ និង ប្រជាពុទ្ធបរិស័ទចំណុះជើងវត្ត បានធ្វើការអង្ហែយកទៅវេប្រគេនព្រះសង្ឃដែលគង់ចាំព្រះវស្សាអស់កាលត្រីមាសក្នុងពុទ្ធ សីមាវត្ដបាគង ស្ថិតក្នុងភូមិឪឡោ ឃុំបាគង ស្រុកប្រាសាទបាគង ដើម្បីប្រមូលបច្ច័យកសាងសមិទ្ធផលផ្សេងៗក្នុងវត្ត កាលពីព្រឹកថ្ងៃទី ២៥ ខែ តុលា ឆ្នាំ២០១៤ ។
នៅពេលក្បួនអង្គកឋិនទាន មកពីតាមក្រុមបានដង្ហែរមកជួបជុំនៅក្នុងបរិវេណទីវត្តរួចមក អង្គកឋិនទាំង០៣ក្រុម ក៏បានធ្វើការដង្ហែរប្រទក្សិណចំនួន ០៣ជុំព្រះវិហាររួចមក អង្គកឋិនទានទាំងមូលបានធ្វើការវេរប្រគេនដល់ព្រះសង្ឃ ដើម្បី បានព្រះសង្ឃក្រាលគ្រង ទទួលយកកឋិនជីវ័រ ទៅតាមពុទ្ធានុញ្ញាតិ និង អនុមោនាយកអនិសង្ឃផលបុណ្យ ដែលកើតមានឡើង ពីបុណ្យអង្គកឋិនទានសាមគ្គីនេះ ។
អង្គកឋិនទានសាមគ្គីដែលបានដង្ហែរយកមកវេរប្រគេន ចំពោះព្រះសង្ឃក្នុង ឱកាសនេះ មិនត្រឹមមានលក្ខណៈសមស្រប តាមរដូវកាលទានប៉ុណ្ណោះទេ គឺស្របពេលដែលព្រះសង្ឃ គណៈកម្មការអាចារ្យវត្ត រដ្ឋអំណាចមូលដ្ឋាន ប្រជាពុទ្ធបរិស័ទចំណុះជើងវត្តបាគង មានសេចក្តីជ្រះថ្លាមូលមតិជាឯកច្ឆ័ន ក្នុងគោលបំណង ប្រមូលបច្ច័យយកទៅធ្វើការជួសជុលកុដ្ឋិ ក្នុងការអភិរក្សនូវសម្បត្តិមរតក ដែលមានអាយុកាលយូរឆ្នាំមកហើយ ព្រមទាំង កសាងសមទ្ធិផលផ្សេងៗក្នុងទីវត្តនេះផងដែរ ។
មានប្រសាសន៍សំណេះសំណាលជាមួយព្រះសង្ឃ បងប្អូនប្រជាពុទ្ធបរិស័ទចំណុះជើងវត្ត ដែលបានចូលរួមបុណ្យអង្គកឋិននេះលោក ឃឹម ប៊ុនសុង បានគូសបញ្ជាក់ថា វិស័យព្រះពុទ្ធសាសនា ដែលរស់ឡើងវិញដល់បច្ចុប្បន្ន ក៏ដោយ គុណបុណ្យស្មារតី ២ធ្នូ ១៩៧៨ និង ជ័យជំនះ ៧មករា ១៩៧៩ ក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចអគ្គមហាទាំងបី ពិសេសសម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យវិស័យព្រះពុទ្ធសាសនាមានការ អភិវឌ្ឍន៍រីកចម្រើនទូទាំងប្រទេស ក្រោមគោលនយោបាយឈ្នះៗ នៃយុទ្ធសាស្ត្រចតុកោណរបស់រាជរដ្ឋាភិបាល កម្ពុជា បានធ្វើឲ្យបងប្អូនប្រជាពុទ្ធបរិស័ទខ្មែរយើង នៅគ្រប់មូលដ្ឋានបានប្រារព្វធ្វើ បុណ្យទានទៅតាមប្រពៃណីព្រះពុទ្ធសាសនា សំខាន់បុណ្យអង្គកឋិនទានដែលដង្ហែរមកកាន់វត្តបាគងនេះស្រាប់ ។
លោក ឃឹម ប៊ុនសុង ក៏បានលើកឡើងផងដែរថា ក្នុងពេលបច្ចុប្បន្ននេះ វិស័យសាសនាបានកំពុងទាក់ទាញនូវភ្ញៀវទេសចរណ៍ ចូលមកទស្សនា បដិបត្តិសាសនាព្រះពុទ្ធ នៅតាមទីវត្តអារាមនានា ។ ម្យ៉ាងទៀតទីវត្តបាគងនេះ គឺទីរមណីយដ្ឋានប្រវត្តិសាស្ត្រ ដែលមានភ្ញៀវទេសចរណ៍ជាតិ និង អន្តរជាតិចូលមកទស្សាន្តកម្សាន្ត សំខាន់ដែលមានព្រះវិហារ ប្រកបដោយរូបគំនូរបុរាណ ដែលត្រូវបានធ្វើការអភិរក្សឡើង ដោយអង្គការយូនីស្កូ ។ ដូច្នេះយើងទាំងអស់គ្នាត្រូវធ្វើការអភិវឌ្ឍន៍នៅតាមទីវត្តអារាម ដែលជាជង្រុកនៃវប្បធម៌ និង អក្សរ សាស្ត្រជាតិខ្មែរយើង ហើយក៏ជាថ្នាលបណ្តុះបណ្តាលនូវធនធានមនុស្សផងដែរ ។ ឯកឧត្តមបានបញ្ជាក់ថា ការធ្វើបុណ្យកឋិនទាននេះ ជាកម្លាំងមហាសាមគ្គីមួយ ដែលកើតចេញឡើងពីព្រះសង្ឃ សប្បុរសជន ប្រជាពុទ្ធបរិស័ទជិតឆ្ងាយ ។
លោកឃឹម ប៊ុនសុង ក៏បានថ្លែងអំណរគុណដល់ថ្នាក់ដឹកនាំ មន្ត្រីរាជការ អាជ្ញាធរស្រុក កងកម្លាំងប្រដាប់អាវុធ និង បងប្អូន ប្រជាពុទ្ធបរិស័ទ ដែលបានចូលរួមដង្ហែរអង្គកឋិនទាននេះ សូមឲ្យទទួលបានមគ្គផល កុសលផលបុណ្យ ដែលកើតឡើងពី អង្គកឋិនទាននាថ្ងៃនេះ ។ផ្តើមចេញពីបុណ្យអង្គកឋិនទានទាំង០៣ក្រុមនេះ បច្ច័យដែលទទួលបានពីការចូលរួមចាប់មគ្គផលរបស់ ឯកឧត្តម លោកឧកញ៉ា លោកជំទាវ អស់លោក លោកស្រី សប្បុរសជន ពុទ្ធរិស័ទ ក្នុងការសង្កត់ត្រ័យ មានចំនួនសរុប ជាប្រាក់ខ្មែរ ២៨លាន ២៤៤ពាន់៣០០៛ ប្រាក់ដុល្លា ៧ពាន់៧៨៥ដុល្លា ក្នុងកឋិនទានដឹកនាំដោយលោក ឃឹម ប៊ុនសុង មានបច្ច័យ សរុប ២០លាន២សែនរៀល ប្រាក់ដុល្លា ៧ពាន់៧៨៥ដុល្លា អង្គកឋិនទានរបស់សមណៈនិស្សិត ដួង សាមុត បច្ច័យ សរុប ២លាន៣៥០ពាន់រៀល និង កឋិនបងប្អូនប្រជាពុទ្ធបរិស័ទចំណុះជើងវត្ត ចំនួន ៥លាន៦៩៤ពាន់៣០០រៀល ។ ហើយ បច្ច័យទាំងត្រូវបានវេរប្រគេនដល់ព្រះសង្ឃ គណៈកម្មការវត្ត តំកល់ទុកសម្រាប់កសាងសមទ្ធិផលនានាក្នុងទីវត្តផងដែរ ៕
