គ្រូបង្វឹកក្លិបមេឃខៀវ Manchester City លោក Manuel Pellegrini បានប្រាប់អ្នកសារព័ត៌មានថា ក្លិបរបស់លោកនៅតែមានឱកាសអាចការពារតំណែងជើងឯកបានទោះបីជាពួកគេប្រកួតចាញ់ក្លិបញញួរយក្ស West Ham United ក្នុងលទ្ធផល 2-1 កាលពីយប់ថ្ងៃសៅរ៍ក៏ដោយ ។
២គ្រាប់របស់ក្លិប West Ham ដែលរកបានដោយកីឡាករ Morgan Amalfitano និង Diafra Sakho បានធ្វើឲ្យក្លិបជើងការពារឯកចាស់មានគម្លាត៥ពិន្ទុពីក្រុមកំពូលតារាងគឺតោខៀវ Chelsea ហើយបើ Chelsea ប្រកួតឈ្នះ Manchester United នៅយប់នេះទៀតនោះ
បានន័យថា ក្រុមរបស់លោក Jose Mourinho នឹងវ៉ាដាច់ ក្រុមរបស់លោក Pellegrini ចំនួន៨ពិន្ទុ ។
ប៉ុន្តែទោះបីជាយ៉ាងណាក៏ដោយ លោក Pellegrini ប្រាប់ BBC Sport ថា “វាទើបតែចាប់ផ្តើមរដូវកាល តែប៉ុណ្ណោះ យើងនៅអាចរកបាន៨០ពិន្ទុទៀតហើយយើងនៅតែមានសង្ឃឹមថានឹងអាចការពារតំណែងជើងឯកបាន” ។
គួរបញ្ជាក់ថា Manchester City នឹងត្រូវជួបជាមួយគូសត្រូវរបស់ខ្លួនគឺ Manchester United នៅសប្តាហ៍ក្រោយ ៕
