កំពង់ធំៈ បទល្មើសដឹកជញ្ជូនឈើគ្រញូងនាពេលបច្ចុប្បន្ន ត្រូវបានគេសង្កេតឃើញ មានការប្រើប្រាស់រូបភាពប្លែក និងប្រើប្រាស់ល្បិចកលក្នុងការបន្លំភ្នែកសមត្ថកិច្ច ក្នុងការដឹកជញ្ជូនបទល្មើសឈើប្រណិតដោយ ខុសច្បាប់ តែទោះជាប្រើរូបភាពបែបនេះក្តី ក៏មិនអាចលាក់បាំងពីសមត្ថកិច្ចបានដែរ ជាក់ស្តែងរថយន្តកូរ៉េ ដឹកទឹកកមួយគ្រឿងនេះ ប្រហែលជាអាជីពដឹកទឹកកកមិនសូវកាក់កប បានជាមកដឹកឈើគ្រញូង ក៏ត្រូវបាន ជាប់អន្ទាក់សមត្ថកិច្ចកងរាជអាវុធហត្ថស្រុកស្ទោង ។
លោកវរៈសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោង បានដឹកនាំកម្លាំងមន្ត្រីក្រោមឳវាទ ឃាត់រថយន្តកូរ៉េឃ្លុបមួយគ្រឿង តាមបញ្ជារបស់លោក អ៊ុត សុធា ព្រះរាជអាជ្ញា អមសាលាដំបូង ខេត្តកំពង់ធំ ដោយសង្ស័យថារថយន្តកូរ៉េឃ្លុប ដឹកជញ្ជូនបទល្មើសខុសច្បាប់ កាលពីវេលាម៉ោង ២.៥០នាទីយប់ ថ្ងៃទី ២៨ ខែតុលា ឆ្នាំ២០១៤ នៅមុខទីបញ្ជាការកងរាជអាវុធហត្ថស្រុកស្ទោង ស្ថិតនៅភូមិត្នោត ឃុំកំពង់ចិនត្បូង ស្រុកស្ទោង ខេត្តកំពង់ធំ ។
លោកវរៈសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោង បានឲ្យដឹងថា មុនឈានដល់ការ បង្ក្រាបរថយន្តខាងលើ លោកបានទទួលពត៌មានពី បណ្តាញថាមានរថយន្តកូរ៉េឃ្លុប ក្បាលពណ៌ ស ទ្រុងពណ៌ទឹកប្រាក់ ពាក់ស្លាកលេខ ភ្នំពេញ 3C-4229 បានដឹកបទល្មើសចេញពីខេត្តសៀមរាប ឆ្ពោះទៅខេត្តកំពង់ចាម ទើបលោកបានសុំយោបល់ លោកឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ និងលោក ព្រះរាជអាជ្ញាខេត្តកំពង់ធំ ដើម្បីសុំការត្រួតពិនិត្យនឹងឆែកឆេរ។
លោកឃុន ប៊ុនហូ បានបញ្ជាក់ថានៅពេលរថយន្តសង្ស័យមកដល់ចំនុចត្រួតពិនិត្យ តៃកុងឡាន និងព្រូឡានម្នាក់ បានចុះពីលើឡានហើយ បានអញ្ជើញជនសង្ស័យទាំងពីនាក់អង្គុយ តាមសម្រួល តែត្រូវបានតៃកុងឡានគំរាមមន្ត្រីរបស់លោកថា ខ្ញុំដឹកតែសម្ភារៈរបស់ក្រុមពុំមានអ្វីខុសច្បាប់នោះទេ និងសូមអញ្ជើញត្រួតពិនិត្យតាមចំណងចំណូលចិត្តទៅ លោកប៉េអ៊ឹម ក្រោយមកសមត្ថកិច្ចរបស់កងរាជអាវុធហត្ថ ឆែកឆេរឃើញសុទ្ធតែម្នាងសិលាពេញឡាន
តែត្រូវបានតៃកុងឡាននិយាយសំដីគ្រអើតគ្រទមដាក់កងកម្លាំង តែដោយការព្យាយាមរបស់កងរាជអាវុធហត្ថ បាននាំគ្នាលើផ្ទាំងម្នាងសិលាដើម្បីមើលបាតក្រោម ក៏បានរាយការជូនលោកថា ពិតជាមានបទល្មើសមែន តៃកុងឡាន និងព្រូលឺតែឆែកឃើញហើយ ក៏ស្ទុះហក់តាមជញ្ជាំងដោយមិនខ្លាចស្លាប់ តាត់វាលស្រែទាំងក្បាលយប់រួចខ្លួនម្នាក់ រីឯម្នាក់ទៀតផ្លោះរបសងកម្ពស់ជិតពីម៉ែត្រធ្លាកដួល តែត្រូវមន្ត្រីកងរាជអាវុធហត្ថ ស្ទុះចាប់ជើងបានជាប់ដាក់ខ្នោះដោយសុវត្តិភាព ។
ចំណែកឈើទាំងអស់ជាប្រភេទឈើគ្រញូងសុទ្ធ ចំនួន១៧២៩ដុំ ស្មើរនឹងជាង២តោន ក្រោយពីធ្វើការវាស់វែងរួច ក៏បានប្រគល់ឲ្យលោក ស្រុន ផេង នាយសង្កាត់រដ្ឋបាលព្រៃឈើស្ទោង ដើម្បីដឹកយកទៅរក្សាទុកនៅ ផ្នែករដ្ឋបាលព្រៃឈើស្ទោង ព្រមទាំងរថយន្ត និងជនសង្ស័យឈ្មោះ សុខ ចំរើន ភេទប្រុស អាយុ ២៩ឆ្នាំ សញ្ញាតិខ្មែរ រស់នៅភូមិអណ្តូង ពោធិ ឃុំត្រពាំងបន្ទាយ ស្រុករមាសហែក ខេត្តស្វាយរៀង បច្ចុប្បន្នរស់នៅភូមិ តាហ៊ឹម ឃុំព្រែកដាច់ ស្រុកលើកដែក ខេត្តកណ្តាល ត្រូវបានប្រគល់ជូនសមត្ថកិច្ចជំនាញចាត់ការតាមនិតិវិធីនៃច្បាប់។
មហាជនទូទៅបានកោតសរសើរចំពោះការខិតខំប្រឹងប្រែង របស់លោកវរៈសេនីយ៍ត្រី ឃុន ប៊ុនហូ រាល់ការបំពេញភារៈកិច្ចទាំងការចុះជួយមូលដ្ឋាន និងការសហការជាមួយសមត្ថកិច្ចជំនាញជលផល និងជំនាញរដ្ឋបាលព្រៃឈើ និងចូលរួមអនុវត្តន៍ គោលនយោបាយភូមិ ឃុំមានសុវត្តិភាព ក្នុងការទប់ស្កាត់រាល់សកម្មភាពល្មើសច្បាប់ រហូតទទួលបានជោគជ័យជាបន្តបន្ទាប់ និងចាត់ទុកជាគំរូដ៏ឆ្នើមមួយ ក្នុងការចូល រួមគ្រប់សកម្មភាព ដែលរាជរដ្ឋភិបាលប្រគល់ជូន ។
ដោយ ប៊ុន រដ្ឋា
