បុរសម្នាក់បានរងរបួសធ្ងន់ធ្ងរ ដោយសារតែរថយន្តប្រូសមួយគ្រឿង បើកក្នុងល្បឿនលឿន ជ្រុលចង្កួត ទៅបុកចំពេញទំហឹង ហេតុការណ៍នេះ បានកើតឡើងកាលពីវេលាម៉ោង៩នឹង៤០នាទីយប់ ថ្ងៃទី២៧ ខែតុលា ឆ្នាំ២០១៤ នៅតាមបណ្តោយផ្លូវលេខ៤៥៦ កែងនឹងផ្លូវលេខ១៣៥ ស្ថិតក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ ។
ប្រភពពត៌មានពីសាក្សី ដែលនៅកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេឃើញបុរសម្នាក់ ស្លៀកពាក់ជាមន្ត្រីយោធា ជិះម៉ូតូវីវ៉ាពណ៍ខ្មៅមួយគ្រឿង ពាក់ស្លាកលេខ ភ្នំពេញ1AG-2535 ធ្វើដំណើរតាមបណ្តោយផ្លូវលេខ១៣៥ ក្នុងទិសដៅពីជើងទៅត្បូង
នៅពេលដែលមកដល់ចំណុចកើតហេតុ ស្រាប់តែមានរថយន្តប្រូសពណ៍ស គ្មានស្លាកលេខ ជិះតាមបណ្តោយផ្លូវលេខ៤៥៦ ទិសដៅពីកើតទៅលិច បើកបរក្នុងល្បឿនយ៉ាងលឿន បណ្តាលឲ្យចាប់ហ្វ្រាំងមិនទាន់ ក៏ជ្រុលទៅបុកម៉ូតូវីវ៉ាពេញទំហឹងតែម្តង បណ្តាលឱ្យអ្នកជិះម៉ូតូ រងរបួសធ្ងន់ធ្ងរ បាក់ជើងខាងស្តាំម្ខាង និងបែកមុខ បែកមាត់ ។ រីឯម៉ូតូរបស់ជនរងគ្រោះ ត្រូវរងការខូចខាតយ៉ាងដំណំស្ទើរទាំងស្រុង ។
ក្រោយពេលកើតហេតុ សមត្ថកិច្ចមូលដ្ឋាន បានហៅរថយន្តសង្គ្រោះបន្ទាន់ មកដឹកយកជនរងគ្រោះ ទៅសង្គ្រោះ ចំណែកឯរថយន្តបង្ក និងម៉ូតូរបស់ជនរងគ្រោះ សមត្ថកិច្ចជំនាញ បានវាស់វែង និងយកទៅរក្សាទុក នៅអធិការដ្ឋាននគរបាល ខណ្ឌចំការមន ដើម្បីដោះស្រាយទៅតាមនីតិវិធី ៕
