កំពង់ឆ្នាំង បុរសម្នាក់បានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍មួយ បានកើតឡើង រវាងម៉ូតូស្កុបពី បុកជាមួយម៉ូតូឌ្រីមសង់ កាលពីវេលាម៉ោង៩និង១៥នាទីព្រឹក ថ្ងៃទី២៨ ខែតុលា ឆ្នាំ២០១៤ នៅត្រង់ចំណុចផ្លូវបំបែកជាបួន ទល់មុខអាហារដ្ឋានបូរី ស្ថិតក្នុងភូមិម៉ុងបារាំង សង្កាត់ប្អេរ ក្រុង
កំពង់ឆ្នាំង ខេត្តកំពង់ឆ្នាំង ។ ប្រភពពីប្រជាពលរដ្ឋ នៅកន្លែងកើតហេតុ បានអោយដឹងថា មុនពេលកើតហេតុ គេបានឃើញម៉ូតូស្កុបពី ពណ៌ក្រហម ពាក់ស្លាកលេខ កំពង់ឆ្នាំង 1C-7344 បើកបរក្នុងល្បឿនលឿន ដោយបុរសម្នាក់ ទិសដៅពីកើតទៅលិច លុះមកដល់កន្លែងកើតហេតុ ស្របពេលម៉ូតូឌ្រីមសង់ ពណ៌ខ្មៅ ពាក់ស្លាកលេខ កំពង់ស្ពី 1B-4620 បើកបរឌុបគ្នា២នាក់ ក្នុងទិសដៅពីជើងទៅត្បូង ក៍បុកគ្នាចំពីមុខពេញមួយហឹងតែម្តង បណ្តាលអោយម្ចាស់ម៉ូតូស្កុបពី បើកបរអត់ពាក់មួកសុវត្ថិភាព រងរបួសធ្ងន់ ។
មន្ត្រីនគរបាលចរាចរណ៍ នៅកន្លែងកើតហេតុ បានអោយដឹងថា ម្ចាស់ម៉ូតូស្កុបពី ដែលរងរបួសធ្ងន់ឈ្មោះ លី ណា ភេទប្រុស អាយុ២៦ឆ្នាំ រស់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង រីឯអ្នកបើកបរម៉ូតូឌ្រីមសង់ ឈ្មោះ ប្រាក់ យន ភេទប្រុស អាយុ៣៥ឆ្នាំ និងអ្នកជិះពីក្រោយឈ្មោះ សេង ចន្ធូ ភេទប្រុស អាយុ៣៤ឆ្នាំ រស់នៅភូមិត្រពាំងចឹកសារ សង្កាត់កំពង់ឆ្នាំង ក្រុងកំពង់ឆ្នាំង ។
ក្រោយកើតហេតុ ជនរងគ្រោះត្រូវបានរថយន្តសាមុយ ដឹកយកទៅសង្គ្រោះ នៅមន្ទីរពេទ្យបង្អែក ខេត្តកំពង់ឆ្នាំង រីឯមធ្យោបាយបង្កទាំងសងខាង ត្រូវបានយកមករក្សាទុក នៅអធិការដ្ឋាននគរបាលក្រុងកំពង់ឆ្នាំង រងចាំដោះស្រាយនៅពេលក្រោយ ៕
