លោកនាយករដ្ឋមន្ដ្រី វៀតណាម លោកង្វៀន តាន់យុង បានចេញដំណើរទៅបំពេញ ទស្សនកិច្ច នៅសាធារណរដ្ឋឥណ្ឌា នៅថ្ងៃទី២៧ ខែតុលានេះ ដើម្បីផ្លាស់ប្ដូរនូវយុទ្ធសាស្ដ្រ ក្នុងភាពជា ដៃគូនឹងគ្នា ។
តាមសារព័ត៌មាន វៀតណាមចេញផ្សាយ នៅថ្ងៃចន្ទ ទី២៧ ខែតុលា ឆ្នាំ២០១៤ នេះឲ្យដឹងថា ក្នុង ដំណើរទស្សនកិច្ច របស់លោក ង្វៀន តាន់យុង នៅពេលនេះ នឹងមានរយៈពេល៣ថ្ងៃ ចាប់ពីថ្ងៃទី២៧-២៩ ខែតុលា ដើម្បីបង្កើនកិច្ចសហប្រតិបត្ដិការ កាន់តែស្អិតរមួតបន្ថែមទៀត តទៅថ្ងៃអនាគត រវាងភាគី ទាំងពីរ ។
ជាងនេះទៅទៀត បន្ទាប់ពីទំនាក់ទំនងជាលក្ខណៈការទូត រវាងប្រទេសទាំងពីរ រំលឹកកាលពីខែមករា ឆ្នាំ១៩៧២ វៀតណាម និងឥណ្ឌា បានបង្កើនទំនាក់ទំនងនឹងគ្នាលើយុទ្ធសាស្ដ្រ ជាមិត្ដភាព និងកាន់តែ រីកចំរើនបន្ថែមទៀត តាំងពីឆ្នាំ២០០៧ មក ។
សូមបញ្ជាក់ថា ប្រទេសវៀតណាម និងឥណ្ឌា បានប្រើយុទ្ធសាស្ដ្រជាសរសរគ្រឹះចំនួនប្រាំ ក្នុងឆាក នយោបាយ គឺការពារសន្ដិសុខជាតិ សេដ្ឋកិច្ចពាណិជ្ជកម្ម វិទ្យាសាស្ដ្រ បច្ចេកវិទ្យា និងវប្បធម៌ ព្រមទាំង ការបណ្ដុះបណ្ដាល ធនធានមនុស្ស ចាប់តាំងពីឆ្នាំ ២០០៧មកម្ល៉េះ ៕
