ខេត្តស្វាយរៀង៖ បេក្ខជនដែលប្រឡងជាប់និទ្ទេសAចំនួន៦នាក់ក្នុងស្រុករំដួលទទួលរង្វាន់ពីលោក រស់ ថុន អនុប្រធាន ស.ស.យ.ក ខេត្តស្វាយរៀងនិងជាប្រធានក្រុមការងារ ស.ស.យ.ក ចុះជួយស្រុករំដួលតំណាងលោក ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀង។
ពិធីនេះផងដែរមានការអញ្ជើញចូលពីលោក លោកស្រីជាអនុប្រធានក្រុមការងារ ស.ស.យ.ក ចុះជួយស្រុករំដួល លោកនាយកវិទ្យាល័យ លោកគ្រូ អ្នកគ្រូ សិស្សានុសិស្សជាច្រើននាក់ផងដែលធ្វើឡើងនៅថ្ងៃទី៦ខែវិច្ឆិកាឆ្នាំ២០២៤ស្ថិតក្នុងវិទ្យាល័យ កំពង់ចក ស្រុករំដួល ។
លោក រស់ ថុន អនុប្រធាន ស.ស.យ.ក ខេត្តស្វាយរៀងបានផ្តាំសួរសុខទុក្ខពីសំណាក់លោក ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀងសូមចូលរួមអបអរសាទរដល់ក្មួយៗសិស្សានុសិស្សទាំងអស់ដែលបានខិតខំប្រឹងតែរៀនសូត្ររហូតដល់ប្រឡងជាប់សញ្ញាបត្រមធ្យមសិក្សាទុតិយភូមិ ក្នុងឆ្នាំសិក្សា២០២៣– ២០២៤ ទទួលបាននិទ្ទេស Aដែលបានឆ្លុះបញ្ចាំងនូវស្មារតីខិតខំរៀនសូត្រ តាមរយៈសមិទ្ធផលដែលក្មួយទទួលបានពេលនេះ ពិតជាមានតម្លៃណាស់ និងមោទនភាពសម្រាប់យើងទាំងអស់គ្នា ជាពិសេសសម្រាប់ខ្លួនឯង ក្រុមគ្រួសារ លោកគ្រូ អ្នកគ្រូ និងសាលារៀនជាដើមហើយក្មួយៗទាំងអស់នេះ គឺជាអ្នកជំនាន់ក្រោយ សម្រាប់បន្តវេន ក្នុងការចូលរួមអភិវឌ្ឍប្រទេសជាតិទៅថ្ងៃអនាគត។
លើសពីនេះទៀតលោក រស់ ថុន បានថ្លែងអំណរគុណដល់លោកនាយកសាលា លោកគ្រូ អ្នកគ្រូទាំងអស់ ដែលមានការហត់នឿយខ្លាំងណាស់ក្នុងការបង្រៀន ប៉ុន្តែលោកគ្រូ អ្នកគ្រូ បានអនុវត្តភារកិច្ចដ៏ល្អនេះបានបំពេញតួនាទីជាលោកគ្រូល្អ អ្នកគ្រូល្អ ។
ជាមួយគ្នានោះដែរលោក រស់ ថុន បន្ថែមទៀតថា ជារៀងរាល់ឆ្នាំរដ្ឋបាលខេត្តស្វាយរៀង តែងតែរៀបចំឲ្យមានពិធីប្រគល់រង្វាន់ដល់សិស្សានុសិស្សដែលប្រឡងជាប់មធ្យមសិក្សាទុតិយភូមិនិទ្ទេស A ដើម្បីជាការលើកទឹកចិត្ត និងបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំគ្រប់ជាន់ថ្នាក់ជាពិសេសប្រមុខរដ្ឋាភិបាលចំពោះក្មួយៗសិស្សានុសិស្ស ដែលទទួលបានជ័យលាភី។
ចុងក្រោយលោក រស់ ថុន ក៏បានផ្តាំផ្ញើដល់ក្មួយៗ សិស្សានុសិស្សទាំងអស់ ត្រូវជៀសវាងឲ្យ ឆ្ងាយពីគ្រឿងញៀន និង ចាប់យកការសិក្សាជាកត្តាចំបង ដែលចម្លងនូវវាសនា និងក្រុមគ្រួសាររបស់ខ្លួន បានទៅដល់ត្រើយសុភមង្គល ជាពិសេស សូមចូលរួមគោរពច្បាប់ ចរាចរណ៍ផ្លូវគោក ពេលបើកបរត្រូវ ពាក់មួកសុវត្ថិភាព។ ទន្ទឹមនឹងនោះ លោកក៏បានក្រើនរំលឹកដល់ក្មួយៗសិស្សានុសិស្សទាំងអស់ ត្រូវត្រៀម លក្ខណៈទុកជាមុន ក្នុងចូលរួមពិធីសំណេះសំណាលជាមួយ សម្តេចតេជោនាថ្ងៃខាងមុខនេះ។
សូមបញ្ជាក់ផងដែរថា៖ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម័យប្រឡង៖ ០៨ តុលា ២០២៤ នៅខេត្តស្វាយរៀងមានមណ្ឌលប្រឡងទាំង៨ មណ្ឌល បេក្ខជនជាប់និទ្ទេសA ចំនួន៣៧នាក់ស្រី២០នាក់។
បើតាមមន្ត្រីមន្ទីរអប់រំយុវជននិងកីឡាខេត្តស្វាយរៀងបានឲ្យដឹងថា យោងតាមការបិតបញ្ជីឈ្មោះ បេក្ខជន ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៨ តុលា ២០២៤នៅខេត្តស្វាយរៀង ចំនួនបេក្ខជនសរុបចំនួន ៤.១៣៣នាក់ក្នុងនោះស្រី ២.២៤១ នាក់ បេក្ខជនដែលបានមកប្រឡង៖៤,០៦៨នាក់ត្រូវជាភាគរយ៩៨.៤២%ស្រី២,២១៩នាក់ត្រូវជាភាគរយ៩៩.០១%។
បេក្ខជនអវត្តមានសរុប៦៥នាក់ស្រី២២នាក់។បេក្ខជនប្រឡងជាប់សរុបចំនួន ២.៩៥២ នាក់ត្រូវជាភាគរយ៧២,៥៦%ស្រី១,៦៦៧នាក់ ត្រូវជាភាគរយ៧៥.១២%។ ហើយ បេក្ខជនជាប់តាមនីទ្ទេស៖ បេក្ខជន ទទួលបាននិទ្ទេសA ចំនួន៣៧ នាក់ ក្នុងនោះស្រី២០នាក់ ត្រូវជាភាគរយ១,២៥%ស្រី១,១៩%។និទ្ទេសB៖២០៦នាក់ស្រី១២៥នាក់ត្រូវជាភាគរយ៦,៩៧%៧,៤៩%។
និទ្ទេសC បក្ខជន៥៨៨នាក់ស្រី៣៦៥នាក់ត្រូវជាភាគរយ១៩,០១%ស្រី២១,៨៩%។និទ្ទេសDបេក្ខជនចំនួន១,០៤២ នាក់ស្រី៦០៧នាក់ត្រូវជាភាគរយ៣៥,២៩%ស្រី៣៦,៤១%។និទ្ទេសE៖ បេក្ខជនចំនួន១,០៧៩នាក់ស្រី៥៥០នាក់ត្រូវជាភាគរយ៣៦,៥៥%ស្រី៣២,៩៩%។បេក្ខជនប្រឡងធ្លាក់ និទ្ទេសFបេក្ខជនចំនួន១,១១៦នាក់ស្រី៥៥២នាក់។ ហើយអ្វីដែលជាមោទនភាពសម្រាប់ខេត្តស្វាយរៀងមានសិស្សប្រឡងជាប់និទ្ទេសAចំនួន៣៧នាក់ស្រី២០នាក់៕ដោយលោក គឹម សេង
