ទូរទស្សន៍ អារ៉ាប់ អាល់ម៉ាយ៉ាឌីន របស់ស៊ីរី បានផ្សាយថា ក្រុមឧទ្ទាមរដ្ឋឥស្លាម (IS) បានចូលកាន់កាប់អណ្តូងឧស្ម័នចំនួន ០៣ នៅខេត្តហូម ភាគកណ្តាលប្រទេសស៊ីរីហើយ កាលពីថ្ងៃអង្គារ ទី២៨។
ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃពុធ ទី២៩ ខែតុលា ឆ្នាំ២០១៤ ដោយផ្អែកតាមការផ្សាយនោះថា ក្រុមឧទ្ទាម IS បានដណ្តើមបានអណ្តូង ឧស្ម័ននៅភាគខាងកើតទីក្រុង បុរាណ ប៉ាល់មីរ៉ា ក្នុងទីក្រុង ហូម បន្ទាប់ពីមានការប៉ះទង្គិចគ្នាយ៉ាងតឹងតែងជាមួយនឹងកងកម្លាំងស៊ីរី។
អណ្តូងឧស្ម័នទាំង០៣ ដែលឧទ្ទាមវាយដណ្តើមបាននោះ គឺនៅជិតនឹងកន្លែងជីកយកឧស្ម័នធម្មជាតិ អាល់ស៊ែរ ដែលពីមុនត្រូវក្រុម IS ដណ្តើមបានកាលពីថ្ងៃទី១៧ ខែកក្កដា ប៉ុន្តែក្រោយមកត្រូវបានកងកម្លាំងស៊ីរី វាយដណ្តើមបានមកវិញ នៅថ្ងៃទី២៦ ខែកក្កដាវិញ បន្ទាប់ពីវាយសម្រុកយ៉ាងខ្លាំងក្លា។
សូមបញ្ជាក់ថា ឧទ្ទាម រដ្ឋឥស្លាម នៅប្រទេស អ៊ីរ៉ាក់ និងលីវ៉ាន់ ជាតំបន់នៅភាគខាងកើត សមុទ្រម៉េឌីទ័ររ៉ាណេ បានចូលកាន់កាប់ដោយជោគជ័យ នៅកន្លែងខួងយកប្រេងភាគច្រើន នៅខេត្ត ដេអាល់ស៊ូ ដែលសម្បូរធនធានប្រេង ស្ថិតនៅភាគខាងកើតស៊ីរី តាមព្រំដែនជាមួយនឹងប្រទេសអ៊ីរ៉ាក់៕
