កំពង់ចាម: ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ និងអាជ្ញាធរមូលដ្ឋាន នាព្រឹកថ្ងៃទី២០ ខែវិច្ឆិកា ឆ្នាំ២០២៤នេះ បានអញ្ជើញចុះពិនិត្យវឌ្ឍនភាពនៃការស្ថាបនាផ្លូវ ស្ពាន គម្រោងក្រសួងអភិវឌ្ឍន៍ជនបទ នៅឃុំខ្ពបតាងួន ឃុំទួលសំបូរ ស្រុកស្ទឹងត្រង់ ឃុំស្ពឺ ឃុំ
ស្វាយទាប ស្រុកចំការលើ ឃុំបារាយណ៍ និងឃុំព្រៃឈរ ស្រុកព្រៃឈរ ដែលមានផ្លូវក្រាលគ្រួសក្រហម ផ្លូវកៅស៊ូ និងផ្លូវបេតុង សរុបជាង ២៥គីឡូម៉ែត្រ និងស្ពានបេតុងប្រវែង ៣០ម៉ែត្រ ។
ក្នុងដំណើរអញ្ជើញចុះពិនិត្យការស្ថាបនាផ្លូវខាងលើនេះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានធ្វើការសាកសួរសុខទុក្ខ និងអំពាវនាវដល់បងប្អូនប្រជាពលរដ្ឋ ដែលមានលំនៅដ្ឋានជាប់តាមបណ្តាផ្លូវ ឱ្យចូលរួមជាមួយអាជ្ញាធរ ដើម្បីបន្តការអភិវឌ្ឍន៍ ពោលគឺធ្វើយ៉ាងណាឱ្យស្របទៅតាមគោលនយោបាយអភិវឌ្ឍន៍ឃុំ សង្កាត់ របស់រាជរដ្ឋាភិបាលកម្ពុជា ដែលបានដាក់ចេញជាយុទ្ធសាស្ត្របញ្ចកោណដំណាក់កាលទី១ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានដាក់ចេញជាអាទិភាពគឺ មនុស្ស ផ្លូវ ទឹក ភ្លើង និងបច្ចេកវិទ្យា ។
ជាមួយគ្នានោះ ឯកឧត្ដមអភិបាលខេត្ត ក៏បានអញ្ជើញចុះទៅពិនិត្យដំណាំស្រូវ របស់ប្រជាកសិករ នៅស្រុកស្ទឹងត្រង់ ដែលពួកគាត់ទទួលបានពូជស្រូវពីរាជរដ្ឋាភិបាល ដោយឃើញថាការដាំដុះរបស់កសិករយើង មានការលូតលាស់ល្អ ដែលយើងរំពឹងទុកថា កសិករយើង និងទទួលបានទិន្នផលខ្ពស់ ពីស្រូវពូជដែលរដ្ឋាភិបាលបានផ្តល់ជូននាពេលកន្លងមកថ្មីៗនេះ ។
បើតាមលោក អ៉ឹង វិសុទ្ធ ប្រធានមន្ទីរអភិវឌ្ឍន៍ជនបទខេត្តកំពង់ចាម បានឱ្យដឹងថា ខ្សែផ្លូវ និងស្ពានដែលឯកឧត្ដមអភិបាលខេត្តចុះពិនិត្យការដ្ឋានសាងសង់ ឆ្នាំ២០២៤ រួមមាន ១- ការជួសជុលបន្ទាន់ផ្លូវក្រាលគ្រួសក្រហម ១ខ្សែ ប្រវែង ៨០០ម៉ែត្រ ទទឹង ៦ម៉ែត្រ នៅភូមិអូររុន ឃុំខ្ពប់តាងួន ស្រុកស្ទឹងត្រង់។ ២-ការសាងសង់ស្ពានបេតុង ១កន្លែង ប្រវែង ៣០ម៉ែត្រ ទទឹង ៨ម៉ែត្រ នៅភូមិវាលត្រដក់ពង ឃុំទួលសំបួរ ស្រុកស្ទឹងត្រង់។ ៣- ការស្ថាបនាផ្លូវបេតុង និងផ្លូវកៅស៊ូ២ជាន់ ប្រវែង ៦០០ម៉ែត្រ ទទឹង ៦ម៉ែត្រ ពីភូមិពព្រេង ទៅភូមិអូរវាយ ឃុំស្ពឺ ស្រុកចំការលើ។ ៤- ការជួសជុលផ្លូវកៅស៊ូ២ជាន់ ប្រវែង ១១ ៥២០ម៉ែត្រ ទទឹង ៦ម៉ែត្រ ពីភូមិថ្នល់បែក ទៅភូមិបុសថ្លាន់ ឃុំស្វាយទាប ស្រុកចំការលើ។ ៥- ការស្ថាបនាផ្លូវបេតុង និងការស្ថាបនាផ្លូវកៅស៊ូ២ជាន់ ប្រវែង ៧ ៧០០ម៉ែត្រ ទទឹង ៦ម៉ែត្រ ក្នុងឃុំខ្វិតធំ ឃុំព្រៃឈរ និងឃុំបារាយណ៍ ដែលមានប្រវែងផ្លូវសរុប ២ ៥២២០ម៉ែត្រ និងស្ពានប្រវែង ៣០ម៉ែត្រ ៕
