ខេត្តប៉ៃលិន៖ ព្រឹកថ្ងៃទី២៩ ខែតុលា ឆ្នាំ២០១៤ នៅសាលាខេត្តប៉ៃលិន មានរៀបចំពិធីបង្សុកូលរាប់បាត្រព្រះសង្ឃចំនួន៦១អង្គ ដើម្បីថ្វាយព្រះរាជកុសល ដល់ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសប្រារព្ធព្រះរាជពិធីបុណ្យខួបលើកទី១០ នៃការគ្រងរាជសម្បត្តិ (ថ្ងៃទី២៩ ខែតុលា ឆ្នាំ២០០៤-ថ្ងៃទី២៩ ខែតុលា ឆ្នាំ២០១៤) 
ក្រោមអធិបតីភាពលោក អៀង វុធ អភិបាលរងនៃគណៈអភិបាលខេត្តប៉ៃលិន ,លោក ម៉ី មគ្គ អភិបាលរងនៃគណៈអភិបាលខេត្តប៉ៃលិន ,លោក មៀវ សាម៉ៃ នាយករដ្ឋបាលស្តីទីសាលាខេត្ត លោកអភិបាល អភិបាលរងក្រុង/ស្រុក លោកស្រី មកពីគ្រប់មន្ទីរស្ថាប័នជុំវិញខេត្ត កងកម្លាំងប្រដាប់អាវុធ សិស្ស និស្សិត ព្រះសង្ឃ និងប្រជាពលរដ្ឋចំនួន១០៨០នាក់ ។
នៅក្នុងព្រះរាជពិធីដ៏មហាមង្គល បវរសួស្តីនៃព្រះរាជពិធីខួបលើកទី១០នៃការយាងឡើងគ្រង រាជសម្បត្តិដ៏ឧត្តុង្គឧត្តម របស់ព្រះករុណាជាអង្គម្ចាស់ជីវិតតម្កល់លើត្បូងព្រះមហាក្សត្រនៃព្រះរាជាណាចក្រកម្ពុជាជាទីសក្ការៈដ៏ខ្ពង់ខ្ពស់បំផុតនេះ អាជ្ញាធរខេត្ត មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ សិស្ស និស្សិត លោកតា លោកយាយ និងព្រះសង្ឃបានសម្តែងវន្ទាថ្វាយព្រះមហាករុណាទិគុណដ៏ជ្រាលជ្រៅបំផុតចំពោះព្រះរាជហឬទ័យ និងព្រះរាជកិច្ចប្រកបដោយព្រះគុណធម៌ មនុស្សធម៌ដ៏ថ្លៃថ្លាក្នុងគ្រប់កាលៈទេសៈចំពោះជាតិ មាតុភូមិនិងប្រជារាស្ត្រទូទាំងព្រះរាជាណាចក្រកម្ពុជា ។
ព្រះករុណាជាអង្គម្ចាស់ជីវិតតម្កល់លើត្បូងតែងតែបានប្រោសព្រះរាជទានព្រះឧបត្ថម្ភយ៉ាងពេញទំហឹង ដល់ប្រជារាស្ត្រក៏ដូចជាប្រោសព្រះរាជទានព្រះរាជទ្រព្យកសាងសមិទ្ធផលសង្គមនានា រួមចំណែកកសាងអភិវឌ្ឍន៍មាតុភូមិកម្ពុជាឲ្យបានរុងរឿងជាលំដាប់ ជាពិសេសព្រះអង្គបានយាងចុះជួបប្រាស្រ័យជួបផ្ទាល់សាកសួរសុខទុក្ខប្រជារាស្ត្រតាមបណ្តាខេត្តនានា និងព្រះរាជទានព្រះរាជអំណោយដល់ប្រជានុរាស្ត្រទីទ័លក្រ មានទុក្ខលំបាក រងគ្រោះដោយ
ទឹកជំនន់ ដោយគ្រោះធម្មជាតិនានា ប្រកបដោយព្រះរាជហឫទ័យមេត្តា ករុណា មុទិតា ឧបេក្ខា ជាអនេកធ្វើឲ្យប្រជារាស្ត្រជាកូនចៅតែងតែចងចាំជានិច្ចនូវព្រះរាជគុណូបការៈដ៏ឧត្តុង្គឧត្តមថ្លៃថ្លា របស់ព្រះករុណាព្រះមហាក្សត្រជាទីសក្ការៈដ៏ខ្ពង់ខ្ពស់បំផុតនៃប្រជារាស្ត្រខ្មែរ ។គួររំលឹកថា ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់ប្រសូតនៅថ្ងៃទី១៤ ខែឧសភា ឆ្នាំ១៩៥៣ ។ទ្រង់ជាព្រះរាជបុត្ររបស់ព្រះករុណា ព្រះបាទសម្ដេច ព្រះនរោត្តម សីហនុ និងសម្ដេចព្រះរាជអគ្គមហេសី នរោត្ដម មុនិនាថ សីហនុ ។ ព្រះអង្គត្រូវបានក្រុមប្រឹក្សារាជសម្បត្តិជ្រើសតាំងជាព្រះមហាក្សត្រនៃព្រះរាជាណាកម្ពុជា បន្តពីព្រះបិតា ដែលព្រះអង្គបានដាក់រាជ្យ កាលពីថ្ងៃទី៧ ខែតុលា ឆ្នាំ២០០៤ ។ មុនពេលដែលព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ទ្រង់ក្លាយជាព្រះមហាក្សត្រ ព្រះអង្គមានគោរម្យ៍ងារជា “ស្ដេចក្រុមឃុន” ដែលព្រះមហាក្សត្រ ព្រះបាទសម្ដេចព្រះនរោត្ដម សីហនុ ទ្រង់ព្រះរាជទាន នាថ្ងៃទី១ ខែកុម្ភៈ ឆ្នាំ១៩៩៤ បន្ទាប់មកត្រូវបានដំឡើងជា “សម្ដេចព្រះបរមនាថ” នាថ្ងៃទី៣១ ខែសីហា ឆ្នាំ២០០៤ ។
ព្រះរាជពិធីរាជាភិសេកព្រះអង្គជាផ្លូវការ ត្រូវបានប្រារព្ធឡើងនៅក្នុងព្រះបរមរាជវាំង រាជធានីភ្នំពេញ នាថ្ងៃទី២៩ ខែតុលា ឆ្នាំ២០០៤ ។ព្រះបរមនាមក្នុងរាជ្យរបស់ព្រះករុណា ព្រះបាទសម្ដេចព្រះបរមនាថ នរោត្តម សីហមុនី គឺ៖ “ព្រះករុណា ព្រះបាទសម្តេច ព្រះបរមនាថ នរោត្តម សីហមុនី សមានភូមិ ជាតិ សាសនា រក្ខតខត្តិយា ខេមរារដ្ឋរាស្ត្រ ពុទ្ធិន្ទ្រាធរាមហាក្សត្រ ខេមរាជនា សមូហោភាស កម្ពុជឯករាជ រដ្ឋបូរណសន្តិ សុភមង្គលា សិរីវិបុលា ខេមរាស្រីពិរាស្ត្រ ព្រះចៅក្រុងកម្ពុជាធិបតី” ប្រែសេចក្ដីថា៖ “អ្នកបម្រើមាតុភូមិ សាសនា ប្រជាជាតិ និងប្រជារាស្ត្រខ្មែរ ដោយស្វាមីភក្តិ និងភក្ដីភាព។ មហាក្សត្រដែលព្រះពុទ្ធ និងព្រះឥន្ទ្រលោកឧបត្ថម្ភ ។
អ្នករួបរួមខេមរជនទាំងអស់ ។ អ្នកការពារឯករាជ្យ បូរណភាពទឹកដី និងសន្តិភាពរបស់កម្ពុជា ព្រមទាំងសុភមង្គល សេរីភាព និងវិបុលភាពរបស់ប្រជារាស្ត្រ ខ្មែរ” ។ ចាប់តាំងពីព្រះករុណា ទ្រង់បានឡើងគ្រងរាជសម្បត្តិអស់រយៈពេល១០ឆ្នាំកន្លងមកនេះ ព្រះអង្គបានគង់នៅជាម្លប់ដ៏ត្រជាក់របស់ ប្រជារាស្ត្រ ខ្មែរ ប្រកបដោយសុខសន្តិភាព ការបង្រួបបង្រួមជាតិ ស្ថិរភាពនយោបាយ ការអភិវឌ្ឍជាតិមាតុភូមិ ប្រជាធិបតេយ្យបរិបូរណ៍និងបានលើកតម្កើងមុខមាត់ប្រទេសជាតិ នៅលើឆាកអន្តរជាតិ ទាំងក្នុងតំបន់ និងនៅលើពិភពលោក ៕ អត្ថបទសេង សុវណ្ណារិទ្ធ
