កោះកុង៖ តាមការបង្ហើបរបស់អាជ្ញាធរខេត្តកោះកុងឲ្យដឹងថា នៅបំណាច់ខែនេះ តូបលក់ដូរដែលបង្កភាពអនាធិបតេយ្យនៅប៉ែកខាងលិចផ្សារដងទង់ នឹងត្រូវចុះធ្វើការរុះរើហើយ។លោក ប៉ែន ប៊ុនឈួយ អភិបាលស្តីទីក្រុងខេមរភូមិន្ទឲ្យដឹងថា ការរុះរើនេះ គឺធើ្វឡើងបន្ទាប់ពីមានការណែនាំ
របស់ ឯកឧត្តម ប៊ុន លើត អភិបាលខេត្តកោះកុង ក្នុងបំណងដើម្បីរៀបចំសណ្តាប់ធ្នាប់ និងយកទីកន្លែងនោះធើ្វជាចំណតរថយន្តសាធារណៈ សម្រាប់ភ្ញៀវមកកំសាន្តនាឱកាសបំណាច់ឆ្នាំខាងមុខនេះ ខណៈខេត្តកោះកុងនឹងធើ្វជាម្ចាស់ផ្ទះ នៃទិវាបុណ្យសមុទ្រ។
បើតាម លោក ប៊ុនឈួយ ការរុះរើនឹងចែកចេញជាពីដំណាក់ការ គឺនៅពេលព្រឹកអាជ្ញាធរទុកឱកាសឲ្យអាជីវកររុះរើចេញដោយស្ម័ក្រចិត្ត រួចយកទៅដាក់តាំងលក់នៅទីធ្លាខាងក្នុងផ្សារដែលអាជ្ញាធរ បានរៀបចំជូន ចំណែកពេលល្ងាចកម្លាំងអាជ្ញាធរនឹងចុះធើ្វការរុះរើបើសិន
អាជីវករណាមិនព្រម អនុវត្តតាម។សូមបញ្ជាក់ថា តូបលក់ដូរនៅប៉ែកខាងលិចផ្សារដងទង់នោះ មានប្រមាណជិត១០០តូប ត្រូវបានអ្នកវិនិយោគផ្សារជួលឲ្យទៅក្រុមអាជីវករលក់ដូរបណ្តោះអាសន្ន៕
