ខេត្តសៀមរាប៖យុវជនម្នាក់បានស្លាប់ភ្លាមៗនៅនឹងកន្លែងកើតហេតុនិងម្នាក់ទៀតបានស្លាប់ពេលបញ្ជូនដល់មន្ទីរពេទ្យខេត្តបន្ទាប់ពីពួកគេបានបើកម៉ូតូលើផ្លូវជាតិលេខ៦មិនប្រយ័ត្នទៅបុកគូតឡានដឹកស៊ីម៉ង់ត៍កាលពីវេលាម៉ោង២២យប់ថ្ងៃទី២៩ខែតុលានេះត្រង់ចំនុចខាងកើតសាលាបឋមសិក្សាជ័យ
ក្នុងភូមិជ័យ សង្កាត់ទឹកវិល ក្រុង-ខេត្តសៀមរាប។
ជនរងគ្រោះជាអ្នកឌុបដែលបានស្លាប់ភ្លាមៗនៅនឹងកន្លែងកើតហេតុមានឈ្មោះ ស៊ុន ប៉ូលីនភេទប្រុសអាយុ២៥ឆ្នាំ បច្ចុប្បន្នស្នាក់នៅភូមិប្រិយថ្មីសង្កាត់ទឹកវិល ក្រុងសៀមរាបនិងម្នាក់ទៀតដែលដឹកដល់ពេទ្យខេត្តស្លាប់ឈ្មោះ លុន លឿន ភេទប្រុស អាយុ២៣ឆ្នាំ ស្នាក់នៅភូមិឃុំជាមួយគ្នា។មន្ត្រីប៉ូលិសការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាបបានអោយដឹងថាមុនពេលកើតហេតុជនរងគ្រោះទាំងពីរនាក់នោះបាននឹងកំពុងជិះម៉ូតូC125ពណ៌ពណ៌ខ្មៅពាក់ស្លាកលេខសៀមរាប1M-6395មកពីលិចទៅកើតក្នុងល្បឿនលឿនពេលមកដល់ចំណុចកើតហេតុទំនងជាជាន់ហ្វាំងមិនស៊ីក៏ជ្រុលទៅបុកចំពីក្រោយឡានFUSOដឹកស៊ីម៉ង់ត៍មកពីខេត្តបន្ទាយមានជ័យពាក់ស្លាកលេខស្វាយរៀង3A-0549 ដែលកំពុងតែបើកបរក្នុងទិសដៅស្របគ្នានោះពេញទំហឹងតែម្តង។
រីឯអ្នកបើកបរឡានដឹកស៊ីម៉ង់ត៍ពេលដឹកថាមានគេជិះម៉ូតូបុកគូតឡានគាត់ពីក្រោយ ក៏បានជាន់ហ្គាបន្ថែមល្បឿនគេចចេញពីកន្លែងកើតហេតុតាមផ្លូវក្រវ៉ាត់ក្រុងពេលមកដល់ចំណុចស្ពានកុងម៉ុចត្រូវប៉ូលីសហៅឲ្យឈប់ រួចក៏ចុះបើកទ្វាររត់បាត់តែម្តង។
មន្ត្រីប៉ូលិសចរាចរបញ្ជាក់ថាក្រោយពេលធ្វើការឃាត់បានរថយន្តស៊ីម៉ង់តិ៍កម្លាំងជំនាញបានយកទៅរក្សាទុកនៅស្នងការដ្ឋានផ្នែកចរាចរផ្លូវគោកដើម្បីដោះស្រាយតាមច្បាប់ចំណែកសាក សពយុវជនទាំងពីរត្រូវបានសមត្ថកិច្ចធ្វើការប្រគល់ឲ្យ ក្រុមគ្រួសារយកទៅធ្វើបុណ្យតាមប្រពៃណី។រីឯម៉ូតូសមត្ថកិច្ចបានប្រគល់ឲ្យក្រុមគ្រួសារសពវិញនៅកន្លែងកើតហេតុ៕ ដោយ ខេងឧត្តម
