កំពង់ចាម: ប្រជាពលរដ្ឋក្នុងស្រុកស្រីសន្ធរ បានលើកឡើងជាសំណើរ សំណូមពរ និងកង្វល់សរុប ១៤ករណី ត្រូវបានអង្គវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្ត លើកទី១ អាណត្តិទី៤ ធ្វើការឆ្លើយតបភ្លាមៗបានមួយចំនួន ចំពោះករណីដែលនៅសេសសល់ត្រូវបានយកទៅពិភាក្សា ដើម្បីដោះស្រាយទៅតាមប្រភេទរដ្ឋបាលនិមួយៗ ពិធីនេះត្រូវបានធ្វើឡើងនាព្រឹក
ថ្ងៃទី៣ ខែធ្នូ ឆ្នាំ២០២៤ នៅវត្តព្រែកពោធិ៍មង្គល ស្ថិតក្នុងឃុំព្រែកពោធិ៍ ស្រុកស្រីសន្ធរ ក្រោមវត្តមាន ឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្តម ហេង វណ្ណនី អភិបាលរងខេត្ត តំណាងឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ។
ក្នុងអង្គវេទិកានេះ ឯកឧត្តម ហេង វណ្ណនី អភិបាលរងខេត្តកំពង់ចាម បានដឹកនាំការឆ្លើយតបសំណើរ និងសំណូមពរ ដែលប្រជាពលរដ្ឋបានលើកឡើងរួមមាន ការស្នេីសុំបិទល្បែងស៊ីសងអនឡាញក្នុងមូលដ្ឋាន សុំផ្គត់ផ្គង់អគ្គិសនីលើវិស័យកសិកម្ម សុំស្តារកំផ្លោក ដែលបង្កឱ្យមានការរាំងស្ទះផ្លូវទឹក សុំផ្លូវធ្វើដំណើរ និងសុំកសាងស្ពានឆ្លងកាត់ទន្លេមេគង្គ បញ្ហា គ្រោះមហន្តរាយបាក់ច្រាំទន្លេ បញ្ហាប្រជាពលរដ្ឋមានទំនាស់ជាមួយក្រុមហ៊ុនអគ្គិសនី បញ្ហាដាក់បញ្ចាំប្លង់ដី បញ្ហាសេវាកម្មប័ណ្ណកម្មសិទ្ធិដីធ្លី បញ្ហាដីធ្លីមានទំនាស់ បញ្ហាកង្វាសទឹកស្អាតប្រើប្រាស់ បញ្ហាចោលសំរាមពាសវាលពាសកាល បញ្ហាអភិវឌ្ឍន៍ឈូសឆាយទំនប់ និង ការដាក់សម្រាស ។ល ។
ជាមួយគ្នានោះ ឯកឧត្តម ខ្លូត ផន ប្រធានក្រុមប្រឹក្សាខេត្ត បានគូសបញ្ជាក់ថា ក្នុងវេទិកាផ្សព្វផ្សាយ និងពិគ្រោះយោបល់ យើងទាំងអស់គ្នា បានពិភាក្សា ពិគ្រោះយោបល់ ជាមួយអ្នកចូលរួមទាំងអស់ បានរកឃើញនូវបញ្ហាអាទិភាពសំខាន់ៗ សម្រាប់រដ្ឋបាលខេត្តយកទៅពិនិត្យ ពិចារណាក្នុងការឆ្លើយតប ដើម្បីលើកកម្ពស់ជីវភាពរស់នៅ របស់ប្រជាពលរដ្ឋក្នុងខេត្ត ជាពិសេសពង្រឹងការចូលរួមរបស់ប្រជាពលរដ្ឋ និងអង្គការសង្គមស៊ីវិល ក្នុងកិច្ចអភិវឌ្ឍន៍ខេត្តឱ្យកាន់តែល្អប្រសើរឡើង ក្នុងគោលបំណងពង្រឹងយន្តការ តម្លាភាព និងលើកកម្ពស់គោលការណ៍អភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ៕
