កំពង់ឆ្នាំង៖មនុស្សប្រុសស្រី និងក្មេងស្រីម្នាក់ រងរបួសធ្ងន់សន្លប់ស្តូកស្តឹងក្នុងករណីគ្រោះថ្នាក់ចរាចរណ៍ម៉ូតូវ៉េវ បុកម៉ូតូសណ្តោងរ៉ឺម៉កដឹកស្ករ ហេតុការណ៍នេះបានកើតឡើងវេលាម៉ោងជិត៥ល្ងាចថ្ងៃទី៣១ ខែតុលា ឆ្នាំ២០១៤ នៅក្នុងភូមិត្រពាំងធំ ឃុំពង្រ ស្រុករលាប្អៀរ ខេត្តកំពង់ឆ្នាំង។
ប្រភពពីសមត្ថកិច្ចនៅកន្លែងកើតហេតុបានអោយដឹងថា៖ជនរងគ្រោះទាំង៤នាក់នេះមានឈ្មោះ ១. នូ ភឺន ភេទស្រី អាយុ៦១ឆ្នាំ, ២.ឈ្មោះតាំ វ៉ុន ភេទប្រុស អាយុ៦៣ឆ្នាំ ទាំងពីរនាក់ប្តីប្រពន្ធនេះរស់នៅក្នុងភូមិខ្វិត ឃុំពង្រ ស្រុករលាប្អៀរ , ៣.ឈ្មោះ ធុច សំណាង ភេទប្រុស អាយុ៣៥ឆ្នាំ និង៤.ឈ្មោះ ឈឺន ស៊ីតា ភេទស្រី អាយុ៤ឆ្នាំ ទាំងពីរនាក់ឪពុក និងកូននេះរស់នៅភូមិស្វាយជ្រុំចាស់ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
ប្រភពពីប្រជាពលរដ្ឋនៅកន្លែងកើតហេតុបានអោយដឹងថា៖នៅមុនពេលកើតហេតុ មានម៉ូតូមួយគ្រឿងម៉ាកស៊ុយហ្ស៊ុយគីវីវ៉ា ពណ៌ខ្មៅ គ្មានស្លាកលេខសណ្តោងរ៉ឺម៉កពីក្រោយ និងមានជិះគ្នាពីរនាក់ប្តីប្រពន្ធធ្វើដំណើរពីលិចទៅកើត ពេលបើកមកដល់ចំណុចកើតហេតុ ក៏ស្រាប់តែមានម៉ូតូមួយគ្រឿងម៉ាកហុងដាវ៉េវ អត់ស្លាកលេខ ជិះគ្នាពីរនាក់ឪពុក និងកូនស្រីតូចម្នាក់ក្នុងទិសដៅច្រាស់គ្នា ហើយក៏បានបុកម៉ូតូរ៉ឺម៉កពេញទំហឹង បណ្តាលជនរងគ្រោះទាំង៤នាក់ប៉ើងខ្ទាតចេញពីលើម៉ូតូរៀងៗខ្លួនហើយសន្លប់ស្តូកស្តឹងនៅលើផ្លូវក្រាលកៅស៊ូ។ 
ក្រោយពេលកើតហេតុ ជនរងគ្រោះទាំង៤នាក់ត្រូវបានគេដឹកយកមកសង្គ្រោះនៅមន្ទីរពេទ្យខេត្តកំពង់ឆ្នាំង ។ ចំណែកមធ្យោបាយទាំងត្រូវបានសមត្ថកិច្ច ដឹកយកទៅរក្សាទុកនៅអធិការដ្ឋាននគរបាលស្រុករលាប្អៀរ ដើម្បីកសាងសំណុំរឿងតាមផ្លូវច្បាប់ និងរង់ចាំដោះស្រាយតាមនីតិវិធីនៅពេលក្រោយ៕
