ភ្នំពេញ៖ បុរសម្នាក់ត្រូវរងរបួសធ្ងន់និងស្រាល ខណៈដែលជិះម៉ូតូស្មាស់វី មួយគ្រឿង ត្រូវរថយន្ត អូឌី មួយគ្រឿងបើកបុកពីក្រោយ យ៉ាងពេញទំហឹង ហើយរថយន្តបង្ក បើករត់គេចបាត់ស្រមោលឈឹង កាលពីវេលាម៉ោង១១និង២០ នាទីយប់ថ្ងៃទី០៨ ខែមិនា ឆ្នាំ២០១៤ ស្ថិតតាមបណ្តោយផ្លូវកម្ពុជាក្រោម កែងផ្លូវលេខ២១៥ ស្ថិតក្នុងសង្កាត់មិត្តភាព ខណ្ឌ ៧មករា ។
យោងតាមសាក្សីពីកន្លែងកើតហេតុបានឲ្យដឹងថា មុនពេលកើតហេតុគេឃើញមានបុរស៣នាក់បានជិះម៉ូតូមួយគ្រឿងម៉ាកស្មាស់វី ពណ៌ឈាមជ្រូក ពាក់ស្លាកលេខ ភ្នំពេញ1BO-7205 ធ្វើដំណើរតាមបណ្តោយផ្លូវកម្ពុជាក្រោម ក្នុងទិសដៅពីកើតទៅលិច លុះមកដល់ចំណុចកើតហេតុ
ខាងលើ ស្រាប់តែមានរថយន្តអូឌីមួយគ្រឿង ពណ៌ស មិនចាំស្លាកលេខ បានធ្វើដំណើរស្របទិសគ្នា ក្នុងល្បឿនយ៉ាងលឿនក៏ជ្រុលល្បឿនមកបុកម៉ូតូពីក្រោយយ៉ាង ពេញទំហឹងធ្វើឲ្យអ្នកជិះម៉ូតូរងរបួសធ្ងន់ស្រាល ចំណែកឯម៉ូតូរងការខូចខាតខ្ទិចផ្នែកខាងក្រោយ ហើយរថយន្តបង្កវិញបានរត់គេចខ្លួនបាត់ស្រមោលបន្ទាប់ពីបង្កហេតុហើយ។ ក្រោយកើតហេតុសមត្ថកិច្ចបានចុះធ្វើការអន្តរាគមន៍នៅកន្លែងកើតហេតុ ក៏ប៉ុន្តែដោយជនរងគ្រោះជាម្ចាស់ម៉ូតូមិនចង់វែងឆ្ងាយក៏ឡើងជិះម៉ូតូរបស់ខ្លួនបន្តទៅមុខទៀតដោយមិនចង់រំខានសមត្ថកិច្ច ៕
