កាលពីថ្ងៃទី២ ខែវិច្ឆិកា ឆ្នាំ២០១៤ ក្រុមផ្តាច់ខ្លួននិយមនៅភាគខាងកើតអ៊ុយក្រែនបានចាប់ផ្តើមបោះឆ្នោតប្រជាមតិ ដែលជាការបោះឆ្នោតប្រជាមតិមួយគាំទ្រដោយប្រទេសរុស្ស៊ី ប៉ុន្តែទីក្រុងគៀវ និងលោកខាងលិចមិនបានគាំទ្រនោះទេ ហើយដែលគេមើលឃើញស្ថានការណ៍នេះនឹងធ្វើឲ្យវិបត្តិកាន់តែជ្រៅថែមទៀត។
ការបោះឆ្នោតនៅទីក្រុងសំខាន់២ដែលក្រុមឧទ្ទាមដណ្តើមបានកាន់កាប់ ហើយប្រកាសខ្លួនឯងថា ជាសាធារណរដ្ឋប្រជាជន Donetsk និងសាធារណរដ្ឋប្រជាជន Lugansk នោះនឹងធ្វើឲ្យតំបន់ទាំងនេះក្លាយជាភាពស្របច្បាប់ស្ថិតក្រោមការដឹកនាំរបស់របបយោធា ដែលកម្លាំងទាហានទាំងនោះបានគ្រប់គ្រងនាពេលកន្លងមកហើយនោះ។
ប្រជាពលរដ្ឋម្នាក់ឈ្មោះ Tatyana Ivanovna អាយុ៦៥ឆ្នាំបាននិយាយថា «ខ្ញុំសង្ឃឹមថា ការបោះឆ្នោតរបស់យើងនឹងផ្លាស់ប្តូរអ្វីគ្រប់យ៉ាង ។ ប្រហែលជាទីបំផុតយើងទទួលឯករាជ្យយ៉ាងពិតប្រាកដ» ។ លោកស្រីបានថ្លែងបែបនេះខណៈដែលកំពុងឈរតម្រង់ជួរចូលទៅការិយាល័យបោះឆ្នោតលេខ១០៤ ក្នុងថ្នាក់រៀនមួយនៅទីក្រុង Donetsk ។ រីឯពលរដ្ឋម្នាក់ទៀត ឈ្មោះ Valery Vitaliyevich អាយុ៥០ឆ្នាំបាននិយាយថា «យើងត្រូវការរស់នៅដោយសុខសាន្ត ។ យើងមានការភ័យខ្លាចខ្លាំងណាស់នៅពេលដែលមានការវាយប្រហារមកលើក្រុមគ្រួសារ។ យើងនឹងបោះឆ្នោត ដោយសង្ឃឹមថា នឹងជួយដល់អាជ្ញាធរដើម្បីការពារផលប្រយោជន៍របស់យើងប្រឆាំងនឹងទីក្រុងគៀវ»។
ប៉ុន្តែប្រធានាធិបតីអ៊ុយក្រែន លោក Petro Poroshenko បានជំទាស់ប្រឆាំងការបោះឆ្នោតប្រជាមតិខាងលើនេះដោយលោកបានថ្លែងថា វាបានរំលោភលើកិច្ចព្រមព្រៀងដែលបានចុះហត្ថលេខាកាលពីថ្ងៃទី៥ ខែកញ្ញា ។ លោកបញ្ជាក់ថា «ការបោះឆ្នោតនេះ ក្រុមភេរវករ និងក្រុមចោរព្រៃធ្វើឡើងក្នុងបំណងចូលគ្រប់គ្រងទឹកដី(អ៊ុយក្រែន)តែប៉ុណ្ណោះ»។ ក្រុមនេះលេចមុខឡើង បន្ទាប់ពីមានការផ្ទុះអាវុធទ្រង់ទ្រាយធំនៅក្នុងតំបន់។
ប្រទេសរុស្ស៊ីដែលគាំទ្រក្រុមឧទ្ទាមនៅភាគខាងកើតអ៊ុយក្រែនក៏មែនពិត ប៉ុន្តែបានបដិសេធថា មិនបានបញ្ជូនកងទ័ព ឲ្យទៅវាយប្រហារនោះឡើយ, ទីក្រុងមូស្គូនិយាយថា ខ្លួននឹងទទួលស្គាល់លទ្ធផលបោះឆ្នោតប្រជាមតិខាងលើនេះ ។ សហរដ្ឋអាមេរិក និងសហភាពអឺរ៉ុបដែលដាក់ទណ្ឌកម្មសេដ្ឋកិច្ចយ៉ាងធ្ងន់ ទៅលើប្រទេសរុស្ស៊ីនោះបានប្រកាសគាំទ្រទីក្រុងគៀវ ដោយថ្កោលទោសការបោះឆ្នោតរបស់ក្រុមទាមទារផ្តាច់ខ្លួននៅភាគខាងកើតអ៊ុយក្រែននោះថា ជាការខុសច្បាប់ ៕
