ខេត្តកណ្តាលៈដីទំនាស់ជាង១៤ហិកតាមានទីតាំងស្ថិតនៅជាប់ទំនប់អភិវឌ្ឍន៍សម្តេច ជា ស៊ីម ក្នុងឃុំឈើទាល ស្រុកកៀនស្វាយ ខេត្តកណ្តាល ត្រូវបានម្ចាស់ពិតប្រាកដដែលមានលិខិតផ្ទេរសិទ្ធចំនួន១៤ប្លង់ស្មើនឹងជា១៤ហិកតាបានដាក់ពាក្យបណ្តឹងទៅសាលាដំបូងខេត្តកណ្តាល ក្រោយមក
ត្រូវបានសាលាដំបូងខេត្តចេញដីកាសម្រេចរក្សាការពារលេខ៩៦ចុះថ្ងៃទី១៩ ខែកញ្ញា ឆ្នាំ២០១៤ ចេញដោយលោក សាយ សម្ផស្សសេរី ចៅក្រមទទួលបន្ទុករឿងក្តីសាលាដំបូងខេត្ត ហើយត្រូវបានតំណាងអយ្យការអមសាលាដំបូងខេត្តសហការជាមួយអាជ្ញាធរសមត្ថកិច្ចមូលដ្ឋាន និងដើមបណ្តឹងចុះអនុវត្តដីកាសម្រេចរក្សាការពារនោព្រឹកថ្ងៃទី០៣ ខែវិច្ឆិកា ឆ្នាំ២០១៤ នៅចំណុចទីតាំងដីទំនាស់ ។
សកម្មភាពចុះអនុវត្តដីការក្សាការពារខាងលើនេះដឹកនាំដោយលោក ហេង ផេង ព្រះរាជអាជ្ញារងអមសាលាដំបូងខេត្ត និងមានការចូលរួមពីលោក អ៊ុង ឆាង អភិបាលរងស្រុកកៀនស្វាយ ,លោក ធូ សាខន អធិការរងស្រុក ,លោក នៅ នឿន នាយប៉ុស្តិ៍នគរបាលរដ្ឋបាលឈើទាល និងមន្ត្រីសាលាឃុំឈើទាល តែអវត្តមានលោកស្រីមេឃុំ លោក សេក សិទ្ធិ ជាចុងបណ្តឹងដែលជាអ្នករៀបដីរបស់ដើមបណ្តឹងយកទៅលក់ឲ្យក្រុមហ៊ុនដោយមានការឃុបឃិតជាមួយអាជ្ញាធរឃុំស្រុក ។
ក្នុងការអនុវត្តដីកានេះដែរលោក ហេង ផេង ព្រះរាជអាជ្ញារងអមសាលាដំបូងខេត្តបានហៅអ្នកមើលការខុសត្រូវផ្នែកគ្រឿងចក្រមកធ្វើការណែនាំ និង ចេញបំរាមហាមដាច់ខាតមិនឲ្យយកគ្រឿងចក្រធ្វើសកម្មភាពជីកកកាយលើដីទំនាស់នេះ ។ ប្រសិនបើរឹងទទឹងមិនអនុវត្តតាមការសម្រេចរបស់លោកចៅក្រមសាលាដំបូងខេត្តទេនោះ អ្នកដែលប្រព្រឹតនឹងត្រូវចាប់ខ្លួនចាត់ការតាមផ្លូវច្បាប់ ។
ក្នុងពេលចុះអនុវត្តដីការក្សាការពារនេះពុំមានអំពើហិង្សាកើតឡើងនោះទេ ដោយសារតែភាគីចុងបណ្តឹងឈ្មោះ សេក សិទ្ធិ និងប្រពន្ធឈ្មោះ លុយ បុរ៉ាណ មិនបានចូលខ្លួនក្នុងការអនុវត្តនេះទេ គឺធ្វើឡើងដោយភាគីដើមបណ្តឹងប៉ុណ្ណោះ សូម្បីតែលោកស្រីមេឃុំក៍មិនបានមកចូលរួមដែរ ។
តាមប្រភពព័ត៌មានក្រៅផ្លូវការបានឲ្យដឹងថា ដីចំនួនជាង១៤ហិកតាមានលិខិតផ្ទេរសិទ្ធត្រឹមត្រូវ ហើយមានដើមបណ្តឹងឈ្មោះ លឹម សុផា ភេទប្រុស អាយុ២៩ឆ្នាំ មានទីលំនៅសង្កាត់តាខ្មៅ ក្រុងតាខ្មៅ គឺបានប្រមូលទិញពីប្រជាពលរដ្ឋសរុបចំនួន១៤ប្លង់ ដែលកិច្ចសន្យាផ្ទេរសិទ្ធទិញតាំងពីឆ្នាំ២០០៥មកម្លេះ ដោយមានការចុះហត្ថលេខាលើកិច្ចសន្យាមាន មេភូមិ និងលោក ប៉ែន វុធ អតីតមេឃុំឈើទាល ហើយក្រោយមកបានទទួលមរណភាព ។
ក្រោយពីមេឃុំចាស់ទទយលមរណភាពឈ្មួញរៀបដីលក់ឈ្មោះ សេក សិទ្ធិ បានឃុបឃិតជាមួយនឹងអាជ្ញាធរឃុំដែលមានលោកស្រី អ៊ុក សឿន ជាមេឃុំទើបឡើងថ្មី និងអាជ្ញាធរស្រុកកៀនស្វាយ រៀបចំឯកសារជាប្រព័ន្ធយកដីចំនួន១៤ប្លង់នេះទៅលក់ឲ្យក្រុមហ៊ុនផ្សេង ក្រោយមកក្រុមហ៊ុនដែលទិញនោះក៍បានប្រើប្រាស់គ្រឿងចក្រជាច្រើនគ្រឿងឈូសឆាយកាយលើកទំនប់តែត្រូវបែកការណ៍ដឹងដល់ម្ចាស់ដីដើម ដាក់ពាក្យបណ្តឹងទៅសាលាដំបូងខេត្ត ដោយឲ្យឈ្មោះ លឹម សុផា ជាដើមបណ្តឹងត្រូវបានសាលាដំបូងខេត្តចេញដីការក្សាការពារយកមកអនុវត្តនៅពេលនេះក្នុងគោលបំណងទប់ស្កាត់ កុំឲ្យភាគីចុងបណ្តឹងធ្វើសកម្មភាពជីកគាស់កកាយលើដីទំនាស់តទៀតរងចាំដល់សម្រេចអង្គសេចក្តីពីតុលាការ ៕
