ភ្នំពេញ៖ បុរស៣នាក់បានរងរបួស ធ្ងន់ធ្ងរ នៅនឹងកន្លែងកើតហេតុ ខណៈពួកគេជិះម៉ូតូសេ១២៥មួយគ្រឿងឌុបគ្នា ហើយត្រូវរថយន្តតាកូម៉ាមួយគ្រឿង បើកក្នុងល្បឿនលឿន រេចង្កូតបុកពេញទំហឹង ហើយរថយន្តបង្កនេះ បើកគេចខ្លួនបាត់ស្រមោល កាលពីកាលពីវេលាម៉ោង០២និង១០នាទី យប់ឈានចូលថ្ងៃទី០៩ខែ មិនា ឆ្នាំ២០១៤ នៅចំណុចស្តុបអាងទឹក តាមបណ្តោយ ផ្លូវមុនីរ៉េត កែងផ្លូវ ២១៥ ស្ថិតក្នុងសង្កាត់វាលវង់ ខណ្ឌ ៧មករា ។
តាមសាក្សីពីកន្លែងកើតហេតុបានឲ្យដឹងថា មុនពេលកើតហេតុបុរសរងគ្រោះខាងលើ ជិះម៉ូតូមួយគ្រឿង ម៉ាកសង់សេ១២៥ ពណ៌ខ្មៅ ពាក់ស្លាកលេខ ក្រុង.កែប 1A-0915 បានជិះធ្វើដំណើរតាម បណ្តោយផ្លូវមុនីរ៉េត ពីទិសដៅពី លិចទៅកើត ក្នុងល្បឿនយ៉ាងលឿន លុះមកដល់ចំណុច
កើតហេតុស្របពេលដែលមានរថយន្ត មួយគ្រឿង ម៉ាកតាកូម៉ា ពណ៌ទឹកប្រាក់មិនចាំស្លាកលេខ ដែលធ្វើដំណើរក្នុងទិសដៅ បញ្ជ្រាសគ្នាជាមួយម៉ូតូ ហើយដោយសារអ្នកបើករថយន្តមានសភាពស្រវឹង ទើបបណ្តាលឲ្យរេចង្កូតរថយន្តបុកចំម៉ូតូសង់សេ១២៥ ពេញទំហឹងតែម្តងបណ្តាលឲ្យបុរសជាម្ចាស់ម៉ូតូ ត្រូវខ្ទាត់ផ្លោងហោះបុកនិងថ្នល់រងរបួស់ធ្ងន់ធ្ងរ ត្រូវបានរថយន្ត សាមុយដឹកយកទៅមន្ទីរពេទ្យភ្លាមៗ ផងដែរ។
ចំណែកម៉ូតូរបស់ជនរងគ្រោះត្រូវរងការខូចខាត ស្ទើរទាំងស្រុង រីឯរថយន្តបង្កបានបានបើករត់គេចខ្លួនបាត់ស្រមោលតែម្តង ។ ក្រោយពេលកើតហេតុសមត្ថកិច្ចបានចុះដល់កន្លែងកើតហេតុ និងយកម៉ូតូជនរងគ្រោះទៅរក្សាទុកនៅខណ្ឌ ៧មករា រងចាំបងប្អូនមកទទួលយកទៅវិញ៕
