កំពង់ឆ្នាំង៖ មុខសញ្ញាចែកចាយគ្រឿនញៀនដ៍សកម្មម្នាក់ ដែលបានកាប់បុរសម្នាក់អោយ រងរបួសធ្ងន់កាលពី៣ថ្ងៃមុន ត្រូវបានសមត្ថកិច្ចចាប់ខ្លួន។ករណីចាប់ខ្លួននេះបានធ្វើឡើងនៅថ្ងៃទី០៤ ខែវិច្ឆិកា ឆ្នាំ២០១៤ ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំង។
លោក ម៉ា យន់ ប្រធានផ្នែកព្រហ្មទណ្ឌនគរបាលក្រុងកំពង់ឆ្នាំងបាននិយាយអោយ ដឹងថា៖ជនសង្ស័យខាងលើមានឈ្មោះ ស៊ឹម ចាន់ធី ហៅ ឆឺន អាយុ២៦ឆ្នាំ រស់នៅក្នុងភូមិ ស្រែព្រីង សង្កាត់កំពង់ឆ្នាំង រូបគេជាមុខសញ្ញាចែកចាយគ្រឿងញៀនដ៍សកម្មនៅក្នុងមូលដ្ឋាន។
នៅវេលាម៉ោង១១និង១០នាទីយប់ថ្ងៃទី០១ ខែវិច្ឆិកា ឆ្នាំ២០១៤ នៅចំណុចសួនច្បារនាងកង្រី មុខមន្ទីរពេទ្យខេត្ត ក្នុងភូមិឡទឹកត្រី សង្កាត់កំពង់ឆ្នាំង គេបានយកដាវ កាប់ចំចង្កេះខាងស្តាំរបស់ឈ្មោះ មាស ប៊ុនណារុន អាយុ២១ឆ្នាំ រស់នៅភូមិទី៧ សង្កាត់ខ្សាម បណ្តាលរងអោយរងរបួសធ្ងន់ ព្រោះតែសងសឹកគំនុំចាស់។ ក្រោយពេលកើតហេតុ ជនល្មើសបានគេចខ្លួនបាត់ ចំណែកជនរងគ្រោះ ត្រូវបានគេបញ្ជូនមកកាន់មន្ទីរពេទ្យខេត្ត ដើម្បីសង្គ្រោះព្យាបាល ហើយគេបាស្គាល់មុខជនសង្ស័យ ដែលបានកាប់រូបគេយ៉ាងច្បាស់រាយការណ៍ជូនសមត្ថកិច្ច។
នៅក្នុងសំណុំរឿងនេះ ក្រោយពីធ្វើការស៊ើបអង្កេតស្រាវជ្រាវកំណត់បានយ៉ាងច្បាស់នូវមុខសញ្ញាជនសង្ស័យ នៅវេលាម៉ោង៩ព្រឹកថ្ងៃទី០៤ ខែវិច្ឆិកា ឆ្នាំ២០១៤ សមត្ថកិច្ចនគរបាលព្រហ្មទណ្ឌក្រុងកំពង់ឆ្នាំង សហការជាមួយសមត្ថកិច្ចមូលដ្ឋាន ធ្វើការឡោមព័ទ្ធចាប់ខ្លួនជនសង្ស័យឈ្មោះ ស៊ឹម ចាន់ធី បាននៅក្នុងលំនៅដ្ឋាន ហើយបានកសាងសំណុំរឿងបញ្ជូនមកកាន់ស្នងការដ្ឋាននគរបាលខេត្ត។
នៅចំពោះមុខសមត្ថកិច្ច ជនសង្ស័យខាងលើនេះមិនបានសារភាពនូវបទល្មើសបង្ក របួសស្នាមដោយចេតនាខាងលើនេះឡើយ ប៉ុន្តែជនរងគ្រោះបានចង្អុលបង្ហាញថារូបគេពិតបានកាប់ខ្លួនមួយដាវអោយមានរបួសធ្ងន់ពិតមែន ដោយសាតែធ្លាប់មានគំនុំពីមុនមក។
នៅព្រឹកថ្ងៃទី០៤ ខែវិច្ឆិកា ឆ្នាំ២០១៤ លោកនាយការិយាល័យនគរបាលព្រហ្មទណ្ឌ កំរិតស្រាលខេត្តបានអោយដឹងថា៖ទោះបីជនសង្ស័យមិនសារភាពក៍ដោយ សមត្ថកិច្ចនឹង កសាងសំណុំរឿងតាមនីតិវិធីបញ្ជូនទៅកាន់អយ្យកាសាលាដំបូងខេត្តនៅល្ងាចថ្ងៃល្ងាចនេះហើយ៕
