ប៉ៃលិន៖ ព្រឹកថ្ងៃទី៩ ខែវិច្ឆិកា ឆ្នាំ២០១៤ នៅបរិវេនវិមានឯករាជ្យ ខេត្តប៉ៃលិន មានរៀបចំពិធីអបអរសាទរទិវាខួបអនុស្សាវរីយ៍លើកទី៦១ ទិវាបុណ្យឯករាជ្យជាតិ ៩ វិច្ឆិកា ១៩៥៣- ៩ វិច្ឆិកា ២០១៤ និងទិវាខួបកំណើតកងយោធពលខេមរភូមិន្ទឆ្នាំ ២០១៤ ក្រោមអធិបតីភាព ឯកឧត្តម
កើត សុធា អភិបាលនៃគណៈអភិបាលខេត្តប៉ៃលិន ឯកឧត្តម ឡៃ ចាន់ឆាយ ប្រធានក្រុមប្រឹក្សាខេត្តប៉ៃលិន ព្រមទាំងមន្ត្រីរាជការ កងកំលាំងប្រដាប់អាវុធ លោកគ្រូអ្នកគ្រូសិស្សានុសិស្ស ព្រះសង្ឃនឹងបងប្អូនប្រជាពលរដ្ឋនៅទូទាំងខេត្តប៉ៃលិន យ៉ាងច្រើនកុះករ ។
ឯកឧត្តម កើត សុធា អភិបាលនៃគណៈអភិបាលខេត្តប៉ៃលិន បានថ្លែងក្នុងឪកាសដ៏មហោឡារិកនេះថា៖ ថ្ងៃនេះជាថ្ងៃមោទនភាពដែលប្រជាជាតិខ្មែរយើង នៅទូទាំងព្រះរាជាណាចក្រកម្ពុជា ដែលយើងទាំងអស់គ្នាបាន រួមចិត្តរួមថ្លើម ប្រារព្ធមីទិញ អបអរសាទរទិវាខួបអនុស្សាវរីយ៍លើកទី៦១ ទិវាបុណ្យឯករាជ្យជាតិ ៩ វិច្ឆិកា ១៩៥៣- ៩ វិច្ឆិកា ២០១៤ និងទិវាខួបកំណើតកងយោធពលខេមរភូមិន្ទឆ្នាំ ២០១៤ ផងដែរ ។
ឯកឧត្តម ថ្លែងថា៖ ថ្នាក់ដឹកនាំខេត្ត និងមន្ត្រីរាជការកងកម្លាំងប្រដាប់អាវុធ លោកគ្រូអ្នកគ្រូសិស្សានុសិស្ស ព្រះសង្ឃនឹងបងប្អូនប្រជាពលរដ្ឋនៅទូទាំងខេត្តប៉ៃលិន មានមោទនភាពណាស់ចំពោះស្មារតី មហាសាមគ្គីជាតិ ដែលយើងទាំងអស់គ្នាបានរួបរួមគ្នាកសាង នូវវិមានឯករាជ្យ នេះឡើង ដោយគំនិតផ្តួចផ្តើមរបស់ឯកឧត្តមអ៊ី ឈាន និងលោកជំទាវ បាន ស្រីមុំ តំណាងរាស្ត្រខេត្តប៉ៃលិន សំរាប់យើងទាំងអស់គ្នា ក្នុងពេលដ៏មានអត្ថន័យនាថ្ងៃនេះ ។
ដូច្នោះ យើងជួបជុំគ្នានៅថ្ងៃនេះ ចំពោះមុខវិមានឯករាជ្យ ដោយតំណាងឲ្យឯករាជ្យ ជាតិខ្មែរទាំងមូល ជាស្នាមព្រះហស្ថ ដ៏មហាថ្លៃថ្លា របស់ព្រះករុណា ព្រះមហាវិរៈក្សត្រ ព្រះនរោត្តម សីហនុ ព្រះបរមរតនៈកោដ្ឋ ព្រះវីរៈបីតាឯករាជ្យ ជាតិខ្មែរ គឺដើម្បីបង្ហាញពីទឹកចិត្តដឹងគុណ ភក្តីភាព និងការប្តេជ្ញាចិត្តការពារដាច់ខាត នូវរបររាជានិយម ។
ថ្វីត្បិតតែព្រះមហាវិរៈក្សត្រ ព្រះបរមរតនៈកោដ្ឋ ព្រះវីរៈបីតាឯករាជ្យ ជាតិខ្មែរ ព្រះអង្គទ្រង់សោយទីវង្សគត់ ក៏ពិតមែន ក៏ព្រះអង្គបានបន្សល់ទុកនូវស្នាមព្រះហស្ថ ដ៏មហាថ្លៃថ្លា គឺរាជបូជនីយកិច្ច តស៊ូដើម្បីទាមទារឯករាជ្យជាតិខ្មែរ ពីនិមអាណានិគមនិយមបារាំងសេស ហើយបាននាំកម្ពុជាយើងចូលទៅក្នុងប្លុកប្រទេសមិនចូលបក្សសម្ព័នថែមទៀត ដែលធ្វើឲ្យប្រទេសសកម្ពុជា យើងមានមុខមាតនៅលើឆាកអន្តរជាតិ ។
ឯកឧត្តមបន្តថា៖ យើងទាំងអស់គ្នាបន្ត ចង់ចាំ មិនអាចបំផ្លេចបានឡើយ ចំពោះគុណូបការៈដ៏មហាថ្លៃថ្លា របស់ព្រះមហាវិរៈក្សត្រ ព្រះបរមរតនៈកោដ្ឋ ព្រះវីរៈបីតាឯករាជ្យ ជាតិខ្មែរ ។ ក្នុងពិធីនេះថ្នាក់ដឹកនាំខេត្ត និងមន្ត្រីរាជការកងកម្លាំងប្រដាប់អាវុធ ក៏ បានដាក់កម្រងផ្កា ដុតទៀនជ័យគោរពព្រះវិញ្ញាណន្ខព្រះមហាវិរៈក្សត្រ ព្រះនរោត្តម សីហនុ ព្រះបរមរតនៈកោដ្ឋ និងគោរពព្រះវិញ្ញាណ្ខន្តយុវជន យុវនារី ដែលពលីជីវិតក្នុងបុព្វហេតុការពារជាតិ មាតុភូមិកម្ពុជា បន្តមកក៏មានការបង្ហេះពេងពោង លែងសត្វព្រាប ជានិមិត្តរូប នៃការទទូលបានឯករាជ្យផងដែរ ៕
