កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានអះអាងថា ផ្ទៃដីបង្កបង្កើនផលកសិកម្មចំនួន ៣២០ហ.ត ក្នុងឃុំព្រែកក្របៅ ទទួលបានទឹកពីអូរដំណាក់សង្កែ សម្រាប់ប្រើប្រាស់ស្រោចស្រពបន្ថែម នៅដើមចុងរដូវវស្សា និងបន្តទៅរដូវប្រាំង ការថ្លែងបែបនេះក្នុងពិធីប្រគល់ទទួល
គម្រោងជីកអូរដំណាក់សង្កែ និងសាងសង់សំណង់សិល្បការ្យ ស្ថិតនៅក្នុងឃុំព្រែកក្របៅ ស្រុកកងមាស ខេត្តកំពង់ចាម នាព្រឹកថ្ងៃទី៣០ ខែមីនា ឆ្នាំ២០២៥ ក្រោមវត្តមានឯកឧត្តម ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានឱ្យដឹងថា គោលបំណងនៃការជីកអូរដំណាក់សង្កែ ដេីម្បីភ្ជាប់ចរន្តទឹកពីក្បាលក្រពើ ឱ្យហូរចូលតាមអូរដែលគ្រោងជីកមកស្រោចស្រពបន្ថែមលើផ្ទៃដី បង្កបង្កើនផលកសិកម្ម និងប្រើប្រាស់ប្រចាំថ្ងៃនៅឃុំព្រែកក្របៅ បង្កើនរដូវដាំដុះដំណាំកសិកម្ម (ដំណាំស្រូវប្រាំង) បង្កើតជាផ្លូវគមនាគមន៍សម្រាប់ធ្វើដំណើរក្នុងមូលដ្ឋាន បង្កើនប្រាក់ចំណូលដល់គ្រួសារកសិករក្នុងតំបន់អនុវត្តគម្រោង និងទប់ស្កាត់ការទន្ទ្រាន រំលោភយកដីអូរធ្វើជាកម្មសិទ្ធិផងដែរ ។
ឯកឧត្តមអភិបាលខេត្ត បានឱ្យដឹងទៀតថា បន្ទាប់ពីជីកអូរ និងសាងសង់សំណង់សិល្បការ្យ បានរួចរាល់តាមលក្ខណះបច្ចេកទេសរបស់ ក្រសួងធនធានទឹក និងឧតុនិយម អូរដំណាក់សង្កែរ នឹងនាំទឹកពីបឹងក្បាលក្រពើ មកស្រោចស្រពបន្ថែម នៅដើមរដូវ ចុងរដូវវស្សា និងបន្តទៅរដូវប្រាំង លើផ្ទៃដីបង្កបង្កើនផលកសិកម្ម ជូនប្រជាពលរដ្ឋ ក្នុងឃុំព្រែកក្របៅ ស្រុកកងមាស មានចំនួន ៨៥០គ្រួសារ ក្នុងនោះមានដំណាំស្រូវរដូវវស្សា ចំនួន ៣២០ហ.ត ស្រូវរដូវប្រាំង ចំនួន ១១០ហ.ត (នៅលើផ្ទៃដីដដែល) និងដំណាំរួមផ្សំ ចំនួន ៥០ហ.ត។ ចំណែក ភ្លឺអូរ ជាផ្លូវសម្រាប់ធ្វើដំណើរទំនាក់ទំនងពីមូលដ្ឋានទៅទីរួមខេត្ត-ក្រុងបានល្អប្រសើរ ៕
