ខេត្តព្រះវិហារ៖ ប្រសាសន៍ណែនាំរបស់ អភិបាលខេត្តព្រះវិហារ លោក គីម រិទ្ធី ខណៈដែលលោកអភិបាលខេត្ត បានអញ្ជើញជាអធិបតីក្នុងពិធីប្រកាសចូលកាន់តំណែង អភិបាលស្រុកឆែប នាថ្ងៃទី៣១ ខែមីនា ឆ្នាំ២០២៥ ដោយលោក ឃិត សុធារ៉ា អតីតអភិបាលរងក្រុងព្រះវិហារ ត្រូវបានតែងតាំង ជាអភិបាលស្រុកឆែប។
ពិធីនេះ ក៏មានការអញ្ជើញចួលរួមពីថ្នាក់ដឹកនាំខេត្ត មេបញ្ជការ នៃកងកម្លាំងប្រដាប់អាវុធទាំង៣ ប្រធាន-អនុប្រធានមន្ទីរ អង្គភាព ជុំវិញខេត្ត អភិបាលក្រុង-ស្រុក និងមន្ត្រីរាជការដែលមានការពាក់ព័ន្ធជាច្រើនរូបទៀតផងដែរ។
អភិបាលខេត្តព្រះវិហារ លោក គីម រិទ្ធី បានសម្តែងការអបអរសាទរ ចំពោះលោក ឃិត សុធារ៉ា អតីតអភិបាលក្រុងព្រះវិហារ ដែលត្រូវបានថ្នាក់ដឹកនាំ និងប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ផ្តល់សេចក្តីទុកចិត្ត តែងតាំងជាអភិបាលស្រុកឆែប នាពេលនេះ។
លោក គីម រិទ្ធី មានប្រសាសន៍ថា គោលការណ៍ក្នុងការតែងតាំងអភិបាលក្រុង-ស្រុក ដែលមានការអូសបន្លាយរយៈពេលយូរ គឺដោយសារត្រូវឆ្លងកាត់តាមដំណាក់កាលនីមួយៗ និងការវាយតម្លៃយ៉ាងយកចិត្តទុកដាក់ និងត្រឹមត្រូវ ពីថ្នាក់ក្រោម រហូតដល់ថ្នាក់លើ មុននឹងបញ្ជូនបញ្ជីឈ្មោះឆ្លងទៅក្រសួងមហាផ្ទៃ និងមានការសម្រេចឯកភាពពី សម្តេចនាយករដ្ឋមន្ត្រីកម្ពុជា។
លោកអភិបាលខេត្តព្រះវិហារ បានណែនាំលោក ឃិត សុធារ៉ា អភិបាលស្រុកឆែបថ្មី ត្រូវធ្វើជំរឿនឡើងវិញដល់មន្ត្រីរាជការ និងមន្ត្រីកិច្ចសន្យារបស់ខ្លួន ដែលបម្រើការការងារចាប់ពី១០ឆ្នាំឡើងទៅ ដែលពុំធ្លាប់ទទួលបានបណ្ណសរសើរ ឫមេដាយការងារទេ សូមស្នើសុំមេដាយការងារ ដើម្បីបំពាក់ជូនគាត់ ,ត្រូវពង្រឹងប្រព័ន្ធអប់រំនៅស្រុកឆែប ប្រព័ន្ធអប់រំនៅកំពង់ស្រឡៅ ជាប់ព្រំដែនឡាវ ថាតើមតេយ្យសិក្សាដំណើរការល្អ ឬអត់ មានគ្រូបង្រៀន ឬអត់ ទាំងសាលាបឋមសិក្សា អនុវិទ្យាល័យ និងវិទ្យាល័យ ,ត្រូវបន្តការសហការសាមគ្គីភាព ឯកភាពផ្ទៃក្នុងអង្គភាពឱ្យបានល្អ ជាមួយមន្ត្រីរាជការ កងកម្លាំងប្រដាប់អាវុធ និងអាជ្ញាធរមូលដ្ឋាន ដើម្បីធ្វើឱ្យអង្គភាពដំណើរការបានល្អ និងទទួលបានជោគជ័យ៕ដោយ៖ឡុង សំបូរ
