ខេត្តស្ទឹងត្រែង៖ សមិទ្ធផលធំៗជាច្រើនត្រូវគេមើលឃើញថា បានរីកដុះដាលឡើងយ៉ាងស្គុះស្គាយ ក្រោមការអភិវឌ្ឍន៍យ៉ាងឆាប់រហ័ស បន្ទាប់ពីការចូលកាន់តំណែងជាអភិបាលខេត្តស្ទឹងត្រែងរបស់ លោក សរ សុពុត្រា ប្រមាណ ៩ខែកន្លងមកនេះ។
លោកអភិបាលខេត្តស្ទឹងត្រែង បានដឹកនាំរដ្ឋបាលខេត្ត ធ្វើដំណើរឆ្ពោះទៅកាន់គោលដៅអភិវឌ្ឍ ក្រោមការដឹកនាំ និងចង្អុរបង្ហាញរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នូវការកសាងហេដ្ឋារចនាសម្ព័ន្ធ ផ្លូវ ស្ពាន ការផ្គត់ផ្គង់អគ្គិសនី ប្រព័ន្ធទឹកស្អាត ដាក់ភ្លើងបំភ្លឺផ្លូវសាធារណៈ និងការកែលម្អសួនច្បារ ជាពិសេសការកសាងនូវសមិទ្ធផលមួយយ៉ាងថ្មីស្រឡាង គឺ “វេទិកានាគជ័យ និងទីលានតេជោសន្តិភាព” ដែលសម្រេចបានលើការស្ថាបនាប្រមាណ ៩៥ភាគរយ និងការដោះស្រាយបញ្ចប់វិបត្តិដីធ្លី ៣កន្លែង ដែលស្ថិតនៅចំកណ្តាលបេះដូងខេត្តស្ទឹងត្រែង (ផ្ទៃដីស្ទើរមួយចំហៀង នៃព្រះរាជដំណាក់ស្តេច ,ផ្ទៃដីស្រះឈូក នៅទល់មុខសណ្ឋាគារអង្គរមាស ,ផ្ទៃដីស្ថានយ៍ប្រេងឥន្ទនៈ នៅផ្នែកខាងមុខសាលាខេត្តស្ទឹងត្រែង) លើការកាន់កាប់របស់បុគ្គលឯកជន អស់រយៈពេលជាច្រើនឆ្នាំកន្លងមក ដីទាំងនោះត្រូវបានយកមកដាក់ជាសម្បត្តិរដ្ឋ សម្រាប់ប្រជាពលរដ្ឋខេត្តស្ទឹងត្រែង វិញនោះហើយ។
អភិបាលខេត្តស្ទឹងត្រែង លោក សរ សុពុត្រា មានប្រសាសន៍ ឱ្យដឹងកាលថ្ងៃ៣០មីនា២០២៥ ថា ក្រោយការដោះស្រាយបញ្ចប់ ក្រោមគោលការណ៍ “ឈ្នះ-ឈ្នះ” (គ្មានអ្នកចាញ់ គ្មានអ្នកឈ្នះ ហើយអ្នកឈ្នះពិតប្រាកដ គឺប្រជាជន ការបំបែកកំណត់ត្រានេះ ជាផ្លូវ ដើម្បីខេត្តស្ទឹងត្រែងកាន់តែស្អាត និងមានសណ្តាប់ធ្នាប់កាន់តែល្អប្រសើរថែមទៀត។
ក្រោយដំណោះស្រាយឈរលើគោលការណ៍ឈ្នះ-ឈ្នះ ដីមួយផ្នែកនៃព្រះរាជដំណាក់ស្តេច និងដីស្រះឈូក នៅទល់មុខសណ្ឋាគារអង្គរមាស ត្រូវបានចុះបញ្ជីដីធ្លីចេញប្លង់រឹងតម្កល់ទុកជាសម្បត្តិរដ្ឋ។ ដោយឡែក ផ្ទៃដីស្ថានីយ៍ប្រេងឥន្ទនៈ ក្នុងគ្រាបច្ចុប្បន្ន ក៏កំពុងពន្លឿនលើការចុះបញ្ជីដីធ្លី និងរុះរើស្ថានីយ៍ប្រេងនោះចេញ ដើម្បីប្រែក្លាយទីតាំងនោះ ឱ្យក្លាយជាសួនច្បារដ៏ប្រណិត សម្រាប់អន្ទងចិត្តប្រជាពលរដ្ឋក្នុងមូលដ្ឋាន ភ្ញៀវទេសចរជាតិ និងអន្តរជាតិ ចូលមកទស្សនាខេត្តស្ទឹងត្រែង កាន់តែមានចំនួនកើនឡើងទ្វេរដង។
ក្រោមការយកចិត្តទុកដាក់របស់ លោក សរ សុពុត្រា ដែលបានខិតខំកែលម្អក្រុង និងខេត្តស្ទឹងត្រែង ក្នុងនោះមាន កែលម្អបរិវេណ និងរបងព្រះរាជដំណាក់ កំពង់សាឡាង កងចក្រ និងសួនមាត់ទន្លេ ក៏ត្រូវបានគេរំពឹងទុកថា នឹងក្លាយជាខឿនសេដ្ឋកិច្ចដ៏រឹងមាំសំរាប់ប្រជាពលរដ្ឋ ទន្ទឹមនឹងការអភិវឌ្ឍន៍ដោយឈរលើស្មារតីស្នេហាជាតិ និងប្រជាជន ,លោក សរ សុពុត្រា បានដឹកនាំនាវាមួយនេះ ឆ្ពោះទៅរកគោលដៅកសាងយ៉ាងពិតប្រាកដ ដោយទទួលការគាំទ្រយ៉ាងក្រាស់ក្រែល ពីប្រជាពលរដ្ឋគ្រប់មជ្ឈដ្ឋាន ក្រោមម្លប់នៃសុខសន្តិភាព ស្ថេរភាពនយោបាយ ដែលមានសម្តេចអគ្គមហាសេនាបតីតេជោ ហ៊ុន សែន អគ្គមគ្គុទ្ទេសក៍ឯក ស្ថាបនិកសន្តិភាព និងជាប្រតិបត្តិករនយោបាយឈ្នះឈ្នះ នៃកម្ពុជា និងក្រោមការដឹកនាំប្រកបដោយថាមពល ស្វាហាប់ ប៉ិនប្រសប់ ឈ្លាសវៃ ចក្ខុវិស័យច្បាស់លាស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបាននិងកំពុងដឹកនាំអនុវត្តកម្មវិធីនយោបាយ យុទ្ធសាស្រ្តបញ្ចកោណដំណាក់កាលទី១ និងផែនការយុទ្ធសាស្រ្តអភិវឌ្ឍន៍លើគ្រប់វិស័យ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។
កិច្ចខិតខំប្រប្រែងប្រកបដោយការទទួលខុសត្រូវ របស់រដ្ឋបាលខេត្តស្ទឹងត្រែង ដែលដឹកនាំដោយ លោក សរ សុពុត្រា គឺជាការរួមចំណែកជាមួយ រាជរដ្ឋាភិបាល ក្នុងការរក្សាសុខសន្តិភាព ការពង្រឹង និងពង្រីកការអភិវឌ្ឍក្រុង-ស្រុក លើវិស័យសំខាន់ៗក្នុងខេត្ត តាមរយៈការដាក់ចេញផែនការអភិវឌ្ឍន៍ ៥ឆ្នាំ និងកម្មវិធីវិនិយោគ ៣ឆ្នាំរំកិលរបស់ រាជរដ្ឋាភិបាល និងរដ្ឋបាលខេត្តស្ទឹងត្រែង ប្រកបដោយបរិយាប័ន្ន សំដៅលើកកម្ពស់ជីវភាពគ្រួសារ និងការកាត់បន្ថយភាពក្រីក្រជូនប្រជាពលរដ្ឋ ដែលជាការរួមចំណែក សម្រេចបាននូវគោលដៅអភិវឌ្ឍន៍ជាតិ៕ដោយ៖ឡុង សំបូរ
