សៀមរាប៖ ដោយមើលឃើញនូវផលលំបាករបស់បងប្អូនប្រជាពុទ្ធបរិស័ទ ក្នុងការធ្វើដំណើរមកកាន់ទីវត្ត នៅរដូវប្រាំង ដីហុយ និង រដូវស្សាបែកភក់ ធ្វើឲ្យប្រឡាក់សម្លៀកបំពាក់ពុទ្ធបរិស័ទនោះ ព្រះគ្រូវិចិត្រវង្សា ហែម គឹមសាន ញាតិធម្មោ ចៅអធិការវត្តប្រាសាទគោកចក និង គណៈកម្មការ អាចារ្យវត្ត ព្រមទាំងប្រជាពុទ្ធបរិស័ទជិត ឆ្ងាយ
បានធ្វើបុណ្យផ្កាប្រាក់ ប្រមូលបច្ច័យធ្វើការស្ថាបនាផ្លូវបេតុង ១ខ្សែ ប្រវែង២០០ម៉ែត្រ ដែលតភ្ជាប់ពីវិថីសម្តេចពិជ័យសេនា ទៀ បាញ់ ចូលទៅកាន់ទីវត្តប្រាសាទគោកចក ស្ថិតក្នុងភូមិ វាល សង្កាត់គោកចក ក្រុង ខេត្តសៀមរាប ។
តាមថេរដីកា របស់ព្រះគ្រូវិចិត្រវង្សា ហែម គឹមសាន ញាតិធម្មោ ចៅអធិការវត្តប្រាសាទគោកចក បានឲ្យដឹងថា ការស្ថាបនាផ្លូវបេតុង១ខ្សែ បណ្តោយ២០០ម៉ែត្រ ទទឹង ៦ម៉ែត្រ កម្រាស់ ០,២០ម៉ែត្រ ព្រមទាំងដាក់លូបង្ហូរទឹកប្រវែង២០០មផង ដែលគ្រោងចំណាយថវិកាប្រមាណជា ៥ម៉ឺនដុល្លាអាមេរិក ។ ព្រះគ្រូវិចិត្រវង្សាបានឲ្យដឹងទៀតថា បច្ច័យដែលទទួលបានពីបុណ្យផ្កាប្រាក់ មានប្រមាណជា២ម៉ឺនដុល្លាអាមេរិក ។ ដើមី្បឲ្យការស្ថាបនាផ្លូវបេតុងនេះ ឲ្យបានរួចរាល់នៅមុនសង្ក្រាន្តឆ្នាំថ្មីមកដល់ ព្រះគ្រូចៅអធិការ បានអំំពាវនាវដល់សប្បុរសជនជិតឆ្ងាយ សូមជួយបរិច្ចាគធនធានថវិកា ទៅតាមសទ្ធាជ្រះថ្លា ដើម្បីរួមចំណែកបំពេញនូវសេក្តីត្រូវការចាំបាច់របស់វត្ត ដោយខ្លះនូវបច្ច័យក្នុងការទូទាត់ថ្លៃសម្ភារៈ ក្នុងការស្ថាបនាផ្លូវមួយខ្សែនេះ ។
ព្រះអង្អបានមានថេរដីកាបន្តទៀតថា ការស្ថាបផ្លូវបេតុងនេះឡើង ក៏ផ្តើមចេញពីកម្លាំងសាមគ្គីគ្នាទាំងព្រះសង្ឃ គ្រហស្ថ ព្រមទាំងថ្នាក់ដឹកនាំ អាជ្ញាធរមូលដ្ឋាន សម្រាប់ធ្វើដំណើរ ដឹកជញ្ជូន និង ប្រកបការងារអាជីវកម្មដោយភាពងាយស្រួលសុខសាន្តនេះ ក៏ដោយសារប្រទេសជាតិមានសុខសន្តិភាពពេញលេញ មានការអភិវឌ្ឍ ដែលកើតចេញពីនយោបាយឈ្នះ-ឈ្នះរបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ។ ព្រះគ្រូវិចិត្រវង្សា ក៏បានគូសបញ្ជាក់ថា សកម្មភាពស្ថាបនាផ្លូវបេតុង ប្រវែង ២០០ម៉ែត្រនេះ នឹងស្ថាបនារួច រាល់នៅល្ងាចថ្ងៃទី ២៨ មីនានេះផងដែរ ។ក្នុងនោះដែរបងប្អូនប្រជាពលរដ្ឋ បានបង្ហាញអារម្មណ៍សប្បាយរីករាយជាមួយនឹងសមិទ្ធផលថ្មីនេះផងដែរ៕
