សៀមរាប៖ បើកការដ្ឋានស្ថាបនាផ្លូវក្រាលដីល្បាយគ្រួសមួយខែ្សប្រវែង ៥ពាន់៥២០ម៉ែត្រ ដែលស្ថាបនាដោយអង្គភាពវិស្វកម្ម សម្តេចអគ្គមហាធម្មពោធិសាល ជា ស៊ីម ចំណុះនាយកដ្ឋានវិស្វកម្ម ក្រសួងការពារជាតិ ដឹកនាំដោយឯកឧត្តមឧត្តមសេនីយ៍ឯក បណ្ឌិត ធន វិមានច័ន្ទ ស្ថិតនៅក្នុងឃុំល្វែងឬសី្ស ស្រុកជីក្រែង ខេត្តសៀមរាប ក្រោម
វត្តមានរបស់ឯកឧត្តមបណ្ឌិត នួន ដាញ៉ិល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ កាលពីរសៀលថ្ងៃទី៣១ខែមីនា ឆ្នាំ២០២៥ ។
មានប្រសាសន៍នោះដែរ ឯកឧត្តម ឧត្តមសេនីយ៍ឯក បណ្ឌិត ធន វិមានច័ន្ទ បានបញ្ជាក់ថា ការចុះត្រួតពិនិត្យ វាយតម្លៃ និង បញ្ចប់សុពលភាព លើការងារស្តារឡើងវិញផ្លូវ និង សាងសង់លូ ទាំងពីរគម្រោង ស្ថិតក្នុងឃុំល្វែងឬសី្ស ស្រុកជីក្រែង ខេត្តសៀមរាប ។ ក្នុងនោះគម្រោងទី១ កត្រូវបានស្តារឡើងវិញផ្លូវក្រាលដីល្បាយគ្រួស ១ខ្សែ ប្រវែង ៧ពាន់ម៉ែត្រ ទទឹង ៧ម៉ែត្រ កម្រាស់ ០,២ម៉ែត្រ ដោយស្ថាបនាលូមូល មុខ២ មាន១កន្លែង ,លូមូលមុខ១ មាន៣កន្លែងដាក់ផ្លាកឈ្មោះផ្លូវ ២កន្លែង ឆ្លងកាត់ភូមិ២ គឺភូមិចំបក់ខ្ពស់ ភូមិរូងថ្មី ក្នុង ឃុំល្វែងឬសី្ស (បានបញ្ចប់សុពលភាព) អនុវត្តដោយនាយកដ្ឋានវិស្វកម្ម ក្រសួងការពារជាតិ។ គម្រោងទី២ ក៏ត្រូវបានស្តារឡើងវិញផ្លូវក្រាលដីល្បាយគ្រួស ១ខ្សែ ប្រវែង៤ពាន់៥០០ ម៉ែត្រ មានទទឹង ៧ម៉ែត្រ កម្រាស់ ០,២ម និងសាងសង់លូប្រអប់មុខពីរ ចំនួន ២កន្លែង លូមូលមុខ៣ ចំនួន១កន្លែង លូមូលមុខ២ ចំនួន១កន្លែង និង លូមូលមុខមួយ ៣កន្លែង និង ដាក់ផ្លាកឈ្មោះផ្លូវ ២កន្លែង ដោយឆ្លងកាត់ភូមិ២ គឺភូមិល្វែងឬសី្ស ,ភូមិកកោះ ក្នុងឃុំល្វែងឬសី្សស្រុកជីក្រែ ដែលជាម្រោង ត្រូវបានធ្វើការប្រគល់១០០% ។
តាមការបញ្ជាក់របស់លោកមេឃុំល្វែងឬសី្ស នៅក្នុងពិធីបើកការដ្ឋានស្តារឡើងវិញផ្លូវក្រាលដីល្បាយគ្រួសប្រវែង ៥ពាន់ ៥២០ម៉ែត ស្ថិតនៅភូមិកកោះ ឃុំល្វែងឬសី្ស ស្រុកជីក្រែង ខេត្តសៀមរាប តភ្ជាប់ទៅភូមិអន្លង់ក្រាញ់ ឃុំពពក ស្រុក ស្ទោង ខេត្តកំពង់ធំ និង ផ្តល់ផលប្រយោជន៍ដល់សេដ្ឋកិច្ចរបស់ប្រជាពលរដ្ឋទៀតផង ។
មានប្រសាសន៍នោះដែរ ឯកឧត្តមបណ្ឌិត នួន ដាញ៉ិល ក៏បានធ្វើការណែនាំមួយចំនួន ដល់ក្រុមការងារ អង្គភាពវិស្វ កម្ម ក្នុងការស្ថាបនាផ្លូវ ត្រូវធ្វើការកែសម្រួលទៅតាមបច្ចេកទេសសាងសង់ផ្លូវ ដើមី្បធានាឲ្យបាននូវការបាក់ឬរលុះជើងទេ ដែលនាំធ្វើឲ្យផ្លូវងាយខូចខាត នៅពេលរដូវភ្លៀងធ្លាក់ គឺត្រូវធ្វើការដាំស្មៅនៅតាមជើងទេ ក្នុងការទប់ទឹកហូរច្រោះដី ។ ក្នុងការសំណេះសំណាលជាមួយប្រជាពលរដ្ឋឯកឧត្តមបណ្ឌិត ក៏បានលើកឡើងថា ស្ថិតនៅក្រោមម្លប់សុខសន្តិភាព ប្រទេសជាតិ យើងក៏មានការអភិវឌ្ឍន៍លើគ្រប់វិស័យ តាំងពីទីប្រជុំជនមកដល់ជនបទ ។ កត្តាសំខាន់នោះគឺហេដ្ឋារចនាសម្ព័ន្ធផ្លូវថ្នល់ ដែលជាសរសៃឈាមសេដ្ឋកិច្ចជាតិ ពិសេសសេដ្ឋកិច្ចរបស់បងប្អូនប្រជាពលរដ្ឋយើង (មានផ្លូវគឺមានក្តីសង្ឃឹម) ។ ដូច្នេះ យើងគ្រប់រូប ត្រូវអរគុណសន្តិភាព អរគុណនយោបាយឈ្នះ-ឈ្នះ,
ដឹងគុណជានិច្ចមគ្គទេសក៍ឯក សម្តេចតេជោ ហ៊ុន សែន និងប្រតិបត្តិករនៃនយោបាយឈ្នះ-ឈ្នះ ដែលបានបញ្ចប់សង្រ្គាមស៊ីវិលនៅកម្ពុជា ព្រមទាំងបង្កើតបានសន្តិភាព និងការបង្រួបបង្រួមទឹកដីពេញលេញ នៅកម្ពុជា នាំមកនូវការអភិវឌ្ឍន៍ ។ ឯកឧត្តមបណ្ឌិតរដ្ឋលេខាធិការ បានបន្តថា ក្រសួងអភិវឌ្ឍន៍ជនបទ ដែលជាសេនាធិការរាជរដ្ឋាភិបាល បាននឹងកំពុងផ្ដោតការយកចិត្តទុកដាក់យ៉ាងខ្លាំងលើការងារស្ថាបនាផ្លូវ ដោយបានគិតគូរពីភាពធន់ នឹងការប្រែប្រួលអាកាសធាតុ ដើម្បីការប្រើប្រាស់បានយូរអង្វែង ព្រោះផ្លូវពិតជាមានសារសំខាន់បំផុត ក្នុងការជម្រុញដំណើរអន្តរកម្មផ្នែកសេដ្ឋកិច្ច និងសង្គមកិច្ចនៅតំបន់ជនបទ និងកាត់បន្ថយគម្លាតរវាងតំបន់ជនបទ និង ទីប្រជុំជន និង ដើម្បផ្តល់ភាពងាយស្រួលក្នុងការធ្វើចរាចរណ៍ទៅមក ការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋក្នុងមូលដ្ឋាន ។ ឯកឧត្តមបណ្ឌិត នួន ដាញ៉ិល បានបញ្ជាក់ថា ផ្លូវ១ខ្សែបើកការដ្ឋាននាថ្ងៃនេះ បានតភ្ជាប់ពីឃុំល្វែងឬសី្ស ស្រុកជីក្រែង ខេត្តសៀមរាបទៅឃុំពពក ស្រុកស្ទោងខេត្តកំពង់ធំ ស្ថាបនាដោយអង្គភាពវិស្វកម្ម សម្តេចអគ្គមហាធម្មពោធិសាល ជា ស៊ីម ចំណុះនាយកដ្ឋានវិស្វកម្ម ក្រសួងការពារជាតិ និង បានជម្រុញដល់អាជ្ញាធរ មូលដ្ឋាន ត្រូវជួយសម្របសម្រួលសហការជាមួយក្រុមការងារស្ថាបនាផ្លូវនេះ ឲ្យដំណើរប្រព្រឹត្តទៅដោយរលូន ប្រកបដោយគុណភាព ប្រសិទ្ធភាព និង ឆាប់រហ័ស ។ ឯកឧត្តមបណ្ឌិតរដ្ឋលេខាធិការ ក៏បានធ្វើការណែនាំ និង ផ្តល់នូវបច្ចេកទេសល្អៗមួយចំនួន ដល់អង្គភាពវិស្វកម្ម ក្នុងការស្ថាបនាផ្លូវ សំណង់សិល្បៈការ្យ ដើមី្បធានានូវគុណភាព និងការប្រើប្រាស់ឲ្យបានយូរអង្វែង ។ ជាមួយគ្នានោះ ឯកឧត្តមបណ្ឌិត នួន ដាញ៉ិល បានអំពាវនាវឲ្យប្រជាពលរដ្ឋទាំងអស់ ដែលប្រើប្រាស់ផ្លូវ និងអ្នករស់នៅអមសងខាងផ្លូវ សូមមេត្តាជួយថែរក្សាផ្លូវនេះឲ្យបានល្អ ដើម្បីជាប្រយោជន៍រួមក៏ដូចជាការធ្វើចរាចរណ៍ត្រូវមានការប្រុងប្រយ័ត្នចៀសវាងគ្រោះថ្នាក់ចរាចរណ៍កើតឡើងជាយថាហេតុណាមួយ ៕
