ទិន្នន័យថ្មីមួយបង្ហាញថា និន្នាការធ្លាក់ថ្លៃនៃទីផ្សារទំនិញសកលលោក បានបន្តញ៉ាំងឱ្យប្រទេសចិនចាយវាយក្បិតក្បៀត ខណៈការនាំចូលកាន់តែច្រើនទ្បើងៗ អាចនឹងជួយដល់ចិនសន្សំសំចៃលើវិក័យបត្រនាំចូលខ្ពស់បំផុតស្រប ពេលតម្លៃទំនិញចុះថោក ។តាមតួលេខរបស់រដ្ឋបាលពន្ធ
គយទូទៅ បញ្ជាក់ថា ក្នុងរយៈពេល១០ខែដំបូងនៃឆ្នាំនេះ ប្រទេសចិនបាននាំចូលប្រេងឆៅចំនួន២៥២,៦លានតោន កើន៩,២%ធៀបនឹងឆ្នាំទៅ ។ ក្នុងនោះ តម្លៃនាំចូលជាមធ្យម៧៧៣ដុល្លារ ក្នុងមួយតោនធ្លាក់ថ្លៃ២,៤% ធៀបនឹងឆ្នាំ២០១៣ ។
បើគិតត្រឹមតែខែតុលា ប្រទេសចិននាំចូលប្រេងឆៅបាន២៤.១លានតោន ធ្លាក់ចុះ១២,៧% ពីខែកញ្ញា ចំណែកតម្លៃទឹកប្រាក់នាំចូល ក៏ធ្លាក់ចុះ១៦,៨% ឬស្មើនឹង១៧,០៥ពានលានដុល្លារ ។ ដោយទ្បែក គ្រឹះស្ថានហិរញ្ញវត្ថុ និងធនាគារធំមួយលើពិភពលោក HSBC បានលើកទ្បើងថា តម្លៃទំនិញសកល ពិសេសតម្លៃហាងឆេងប្រេងឆៅ បានបោះពួយចុះយ៉ាងគំហុកក្នុងខែតុលា ដែលបន្តធ្លាក់ចុះក្នុងរយៈពេល៤ខែសោះ ។
មួយវិញទៀត តម្លៃទំនិញធ្លាក់ថ្លៃបាននាំមកទាំងការផ្គត់ផ្គង់ខ្លាំង និងតម្រូវការចុះខ្សោយ ។ទោះជាយ៉ាងណា ចិនក៏ជាអ្នកនាំចូលសុទ្ធសាធដ៏ធំមួយនូវរ៉ែដែក និងប្រេងឆៅផងដែរ ។ ជាមួយនឹងបរិមាណនាំចូលសរុបក្នុងឆ្នាំ២០១៣ សម្រេចបាន១១,៣% (ប្រេងឆៅ) និង៥,៤% (រ៉ែដែក) ។ ប្រសិនបើតម្លៃទំនិញទាំង២មុខនេះ មានហាងឆេងដូចពេលថ្មីៗនេះពេញមួយឆ្នាំសម្រាប់នោះ ប្រទេសចិនអាចនឹងសន្សំសំចៃបាន៤,៥ពាន់លានដុល្លារ ក្នុងមួយខែធៀបនឹងឆ្នាំមុន ៕
