កំពង់ឆ្នាំង៖ជម្លោះពាក្យសំដីបានធ្វើអោយយុវជន២នាក់កាប់និងវាយគ្នាទៅវិញទៅមក រងរបួសធ្ងន់ចូលមន្ទីរពេទ្យដូចគ្នា ដោយសារមានទំនាស់ពាក្យសំដីបន្តិចបន្តួចនៅក្នុងពីធីរាំវង់ បុណ្យអកអំបុកនៅក្នុងវត្តស្វាយកាល់។ករណីនេះបានកើតឡើងនៅវេលាម៉ោង១១និង២០នាទីយប់ថ្ងៃទី១១ខែវិឆ្ឆិកា ឆ្នាំ២០១៤ នៅក្នុងភូមិស្វាយក្អែរ ឃុំចក ស្រុកបរិបូណ៌ ។
សមត្ថកិច្ចនគរបាលស្រុកបរិបូណ៌បាននិយាយអោយដឹងថា៖ ជនរងគ្រោះរងរបួសធ្ងន់ធ្ងរគឺជាជនបង្កមានឈ្មោះ ទុំ បារាំង អាយុ២៣ឆ្នាំ រស់នៅក្នុងស្វាយក្អែរ ជាកន្លែងកើតហេតុ ចំណែកភាគីម្ខាងទៀតមានឈ្មោះ រឿន រឹម អាយុ២៨ឆ្នាំ រស់នៅភូមិតាប៉ាង ឃុំចក ដែលនៅស្រុកក្នុងនោះមិនទាន់អស់ចំហាយបុណ្យអំទូកអកអំបុកនៅឡើយទេ។
នៅថ្ងៃកើតហេតុក្នុងវត្តស្វាយស្វាយកាល់ មានប្រារព្វពិធីបុណ្យអកអំបុក និងមានដាក់ធុងបាស់រាំលេងផងដែរ ចំណែកយុវជនស្ទាវទាំង២នាក់នៅភូមិខុសគ្នាក៏បានទៅលេងកំសាន្តដែរ។លុះយប់ជ្រៅពួកគេម្នាក់ៗស្រវឹងរៀងៗខ្លួននៅពេលចូលរាំញាក់ក៏ប៉ះសំដីគ្នាស្រាប់តែឈ្មោះ ទុំ បារាំង ដែលមានផ្ទះនៅក្បែរវត្ត បានទៅយកកាំបិតប៉័ងតោ មកកាប់ទៅលើឈ្មោះរឿន រឹម ជាច្រើនកាំបិត ភ្លាមនោះឈ្មោះរឿន រឹមបានតដៃវិញជាមួយដំបងមួយកំណាត់បណ្តាលអោយឈ្មោះ ទុំ បារាំង រងរបួសធ្ងន់វិញ។
បន្ទាប់ពួកត្រូវបានដឹកទៅសង្គ្រោះនៅមណ្ឌលសុខភាពស្រុកបរិបូណ៌ទាំង២នាក់ ប៉ុន្តែឈ្មោះទុំ បារាំង រងរបួសធ្ងន់ធ្ងរបានបន្តដឹកទៅសង្គ្រោះនៅមន្ទីរពេទ្យខេត្តទៀត ។នៅមណ្ឌលសុភាពស្រុកបរិបូណ៌ ឈ្មោះ រឿន រឹម ត្រូវគ្រូពេទ្យដេរ១០ថ្នេរនៅក្បាល ចំណែក ឈ្មោះ ទុំ បារាំង មកមន្ទីរពេទ្យខេត្តក្នុងសភាពធ្ងន់ធ្ងរ។ប្រភពដដែលបានបន្តថាៈ ទាំង២នាក់សុទ្ឋតែរងគ្រោះនិងដាក់ពាក្យប្តឹងដូចគ្នា ដែលពេលនេះសមត្ថកិច្ចជំនាញនគរបាលស្រុកនិងប៉ុស្តិកំពុងស្រាវជ្រាវកសាងសំណុំរឿងតាមនិតិវិធី៕
