ភ្នំពេញៈ នៅព្រលប់ល្ងាចនេះដែរ ប្រភពបានទម្លាយឲ្យដឹងថា តារាកំប្លែងដ៏មានប្រជាប្រិយភាព នាយ ពែកមី បានជួបគ្រោះថ្នាក់ចរាចរណ៍ នៅស្រុកដងទង់ ខេត្តកំពត ក៏ប៉ុន្តែបើតាមបទ សំភាសជាមួយនឹង តារាកំប្លែងរូបនេះបានប្រាប់អ្នកសារព័ត៌មានយើងតាមទូរស័ព្ទថា “លោកមិនបានជួបគ្រោះថ្នាក់ចរាចរណ៍ ដូចអ្វីដែលខាងសារព័ត៌មានក្នុងស្រុកមួយចុះផ្សាយ
នោះទេ ។ ធាតុពិតលោកបានធ្វើដំណើរ តាមឡានតួរីសមួយ ជាមួយនឹងការងារដើម្បីថតនៅទីនោះ តែដោយឃើញហេតុការណ៍គ្រោះថ្នាក់មួយ ក៏ឈប់មើល ប្រហែល ១៥ នាទី ទើបបន្តដំណើរទៀត” ។ បើទោះបីជាតារាកំប្លែងរូបនេះ អះអាងយ៉ាងដូច្នោះក្តី តែធាតុពិតប្រភពបានទម្លាយថា នាយពែកមី ពិតជាជួបគ្រោះថ្នាក់ចរាចរណ៍មែន ។
ដើម្បីបញ្ជាក់នូវចំណុចនេះ ប្រភពដែលកៀកកើយនឹងតារាកំប្លែងរូបនេះ បានបិទទូរស័ព្ទ អស់ ។ តែទោះជាយ៉ាងណា លោក ជួន សុវណ្ណវាសនា បានប្រាប់នៅវេលាម៉ោង ៨ និង ៣០ នាទីយប់ថ្ងៃទី ១២ ខែ វិច្ឆិកានេះ ថា “នាយពែកមី មិនបានជួបគ្រោះថ្នាក់ចរាចរណ៍នោះទេ ធាតុពិត ដោយសារតែមានគ្រោះថ្នាក់ចរាចរណ៍មួយ ពេលនោះ ខាងក្រុមការងារទៅថតនៅខេត្តកំពត ដែលរួមដំណើរដោយនាយពែកមី ក៏បានចុះមើល ទើបមានព័ត៌មានបំផ្លើសឡើង ថានាយពែកមី ជួបគ្រោះថ្នាក់ចរាចរណ៍ ” ។ លោកបានបញ្ជាក់ថែមទៀត នាយពែកមី មិនបានជួបគ្រោះថ្នាក់ចរាចរណ៍ឡើយ ៕
