កំពង់ធំៈ ប្រជាពលរដ្ឋក្នុងភូមិក្បិល ឃុំសានគរ ស្រុកកំពង់ស្វាយ ខេត្តកំពង់ធំ បានលើកគ្នាមកសាលាស្រុក កំពង់ស្វាយ ដើម្បីប្តឹងទាមទារទួលដីកបខ្មោចមកវិញ ដោយសារតែមាកករណីមានជនខិលខូចមួយក្តាប់តូច បានឃុបឃិតគ្នាជាមួយអាជ្ញាធរស្រុក រំលោភរំលាយដីទូលកបខ្មោចរបស់ប្រជាពលរដ្ឋ យកមកធ្វើជាកម្មសិទ្ធផ្ទាល់ខ្លួន និងជាដីដែលពួកគាត់បានកប់ខ្មោចចាប់តាំងពីឆ្នាំ១៩៦៦ មុនសម័យសង្គ្រាម តែមកដល់សម័យតេជោ ជនខិលខូចបានលបលួចចង់ត្រាបាក់ដីទួលកប់ខ្មោចរបស់ប្រជាពលរដ្ឋ។
ប្រជាពលរដ្ឋ៤១គ្រួសារ បានកើតការមិនពេញចិត្តចំពោះលោក ម៉ៅ ដែលជាអ្នកភូមិជាមួយគ្នា បានរំលោភ យកដីរបស់ពួកគាត់ទើបបានលើកគ្នាមកជួបជុំនៅក្នុងសាលាស្រុកកំពង់ស្វាយ ដើម្បីឲ្យអាជ្ញាធរស្រុក ជួយរកយុត្តិធម៌ និងទាមទារដីទួលកប់ខ្មោចមកវិញដោយមិនព្រមជាដាច់ខាត មិនអោយបុគ្គលណាម្នាក់មក រំលោភយកជាដាច់ខាត ដោយសារតែទួល កប់ខ្មោចនេះប្រជាពលរដ្ឋ ដែលរស់នៅក្នុងភូមិ ក្បិល បាននាំគ្នាយកសាកសពមកកប់នៅទីទួលកប់ខ្មោចនេះជា៤០ភ្នូរហើយ ក្នុងផ្ទៃដីដែលមានទំហំ ៣៤មគុណ ៤១ តែត្រូវបានជនខិលខូចលបលួចរំលោភយកដី ទួលកប់ខ្មោចចំនួន ១៧ម.១០.៧ម ។
នៅក្នុងពាក្យបណ្តឹងរបស់លោកយាយ ចាន់ តន ភេទ ស្រី អាយុ ៨៥ឆ្នាំ បានអះអាងថា ចេតីយ៍ដែលបានកសាង នៅលើទីទួលកប់ខ្មោចនេះ គឺត្រូវបានកសាងឡើងចាប់តាំងពី ឆ្នាំ ១៩៦៦មកម្លេះ តែពេលនេះ គឺបានលេចចេញបុគ្គលឈ្មោះ អោម និងឈ្មោះ ម៉ៅ បាននាំគ្នារំលោភយកដីរបស់ពួកគាត់ លោកយាយបានបន្ត កាលដើមឡើយដីនេះគឺជាដីរបស់ឪពុករបស់លោកយាយ បានធ្វើចេតិយ៍កប់សពសាច់ញ្ញាតិ បងប្អូនក្រោយមកអ្នករស់នៅក្នុងភូមិ
ក៏បានមកសុំដីទួលនេះកប់ខ្មោចដែរ លុះក្រោយមកឪពុកលោកយាយក៏សម្រេចចិត្ត ទុកទីទួលកប់ខ្មោចនេះសម្រាប់បំរើផលប្រយោជន៍របស់អ្នកភូមិ ទើបបានប្រជាពលរដ្ឋដែលរស់នៅក្នុងភូមិ ក្បិល ឃុំសានគរស្គាល់ច្បាស់ថា ជាទីទួលកប់ខ្មោចរបស់ប្រជាពលរដ្ឋ ដូច្នេះក្នុងនាមប្រជាពលរដ្ឋដែលរស់ ក្នុងភូមិសូមសំណូមពរឲ្យអាជ្ញាធរមេត្តាជួយដោះស្រាយ និងមិនព្រមឲ្យដីនេះធ្លាក់ទៅលើបុគ្គលណាម្នាក់នោះទេ ហើយការទាមទារនេះ គឺជាការរក្សាទុកសម្រាប់បំរើផលប្រយោជន៍ រួមរបស់ប្រជាពលរដ្ឋ ។
ដោយ ប៊ុន រដ្ឋា
