ភ្នំពេញ ៖ បុរសម្នាក់បើករថយន្ត CHEVROLET ជ្រុលចង្កូតទៅបុកផ្ទាំងប៉ាណូ និង របងថ្មស្ថានីយ៍ប្រេងឥន្ធនៈសូគីម៉ិចបាក់មួយផ្ទាំងផុងរថយន្តកៀបជាប់ទៅមុខលែងរួចចំណែកអ្នកបើកបរបានបើកទ្វាររថយន្តរត់គេចខ្លួនបាត់ស្រមោល ។ហេតុការណ៍នេះកើតឡើងកាលពីវេលាម៉ោង៧យប់ ថ្ងៃទី១៣ វិច្ឆិកា២០១៤នៅចំណុចស្ថានីយ៍ប្រេង ឥន្ធនៈសូគីម៉ិច ស្ថិតនៅក្នុងសង្កាត់ទំនប់ទឹកខណ្ឌចំការមន ។
ប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុគេឃើញរថយន្តម៉ាកCHEVROLET ពណ៌ខ្មៅ មួយគ្រឿងពាក់ស្លាកលេខ4NIS995 បើកបរដោយបុរសមិនស្គាល់អត្តសញ្ញាណម្នាក់បានធ្វើដំណើរតែម្នាក់ឯងតាមផ្លូវព្រះមុនីរ៉េត ក្នុងទិសដៅពីលិចទៅកើតខណៈមកដល់ចំណុចកើតហេតុមិនដឹងជាយ៉ាងមេចរថយន្តក៏បានរេចង្កូតមកខាងឆ្វេងដៃជ្រុលទៅបុកផ្ទាំប៉ាណូ និងរបងថ្មស្ថានីយ៍ប្រេងឥន្ធនៈសូគីមិុចបាក់មួយផ្ទាំងផុងរថយន្តកៀបជាប់ទៅមុខលែងរួចចំណែកអ្នកបើកបរបានបើកទ្វាររថយន្តរត់គេចខ្លួនបាត់ស្រមោលដោយបន្សល់ទុកតែរថយន្តនៅនឹងកន្លែងកើតហេតុ ។
ក្រោយពេលកើតហេតុសមត្ថកិច្ចបានចុះមកពិនិត្យកន្លែងកើតហេតុ និងធ្វើការវាស់វែងបញ្ជូនរថយន្តបង្កខាងលើទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរងចាំម្ចាស់ចូលខ្លួនមកដោះស្រាយសងថ្លៃខូតខាតទៅខាងស្ថានីយ៍ប្រេងឥន្ធនសូគីម៉ិច៕
