ខេត្តសៀមរាប៖ ប៉ូលិសអន្តោប្រវេសន៍ខេត្តសៀមរាបបានឲ្យដឹងថា៖ បន្ទាប់ពីឃាត់ខ្លួនជនជាតិវៀតណាមបានចំនួន២៤នាក់ដែលឆ្លងដែនចូលមកស្នាក់នៅ និងបំរើការងារខុសច្បាប់ក្នុងខេត្តសៀមរាប ចំនួន២លើកបញ្ជូនទៅអគ្គស្នងការនគរបាលជាតិចាត់ការបន្តរួចមក ខាងប៉ូលិសអន្តោប្រវេសន៍
ខេត្ត និង ចេញប្រតិបត្តិការបន្តឲ្យដូចភ្លៀងរលឹម។ ស្នងការរងទទួលបន្ទុកអន្តោប្រវេសន៍នៃស្នងការនគរបាលខេត្តសៀមរាបលោកវរសេនីយ៍ឯក ចៅ ម៉ៅវីរៈ បានឲ្យដឹងនៅព្រឹកថ្ងៃទី១៧ខែវិច្ឆិកានេះថា ការចុះប្រតិបត្តិការនេះលោកបានសុំគោលការណ៍ពីអគ្គនាយកដ្ឋានអន្តោប្រវេសន៍ និង លោកស្នងការខេត្តដើម្បីចុះត្រួតពិនិត្យជនបរទេសដែលចូលមកស្នាក់នៅ និងបំរើការងារខុសច្បាប់ក្នុងខេត្ត។
លោកបន្តថា ការចុះប្រតិបត្តិការចំនួន២លើក យើងបានឃាត់ខ្លួនជនជាតិវៀតណាមសរុបចំនួន២៤នាក់ ក្នុងនោះលើកទី១/ នៅម៉ោង១៥ ថ្ងៃទី១២ខែវិច្ឆិកា បានចំនួន១៥នាក់ក្នុងព្រលានយន្តហោះ ដោយពួកគេឆ្លងកាត់តាមច្រកទ្វារអន្តរជាតិបាវិត មកធ្វើការឲ្យក្រុមហ៊ុនសំណង់មួយឈ្មោះ V.N ( ZAMIL STEEL) ជាក្រុមហ៊ុនម៉ៅការជួសជុល និងសាងសង់នៅក្នុងព្រលានយន្តហោះខេត្តសៀមរាប ហើយពួកគេមកធ្វើជាកម្មករសំណង់ អស់រយៈពេល២ខែមកហើយ ដោយទទួលប្រាក់កម្រៃក្នុងម្នាក់ៗបាន១៥ដុល្លាទៅ២០ដុល្លា ព្រមទាំងស្នាក់នៅ និងហូបចុកនៅទីនោះផងដែរ។
លោកបន្តទៀតថា ករណីទី២ នៅវេលាម៉ោង៩និង០០នាទីថ្ងៃទី១៥ខែវិច្ឆិកា នៅចំនុចសិប្បកម្មធ្វើតុទូចំនួន២កន្លែងឃាត់ខ្លួនបានចំនួន៩នាក់ ក្នុងភូមិចុងកៅស៊ូ សង្កាត់ស្លក្រាម ដោយទទួលបានប្រាក់ខែក្នុងម្នាក់ៗ ចាប់ពី ២០០ ទៅ៣០០ដុល្លា ក្នុង១ខែ ពួកគេឆ្លងដែនចូលតាមច្រកទ្វារអន្តរជាតិបាវិត មកក្នុងខេត្តសៀមរាប តាំងពីឆ្នាំ២០០៩មកដល់ពេលឃាត់ខ្លួន គឺពួកគេគ្មានលិខិតឆ្លងដែនឬឯកសារអ្វីទាំងអស់ ហើយក៏មិនចេះនិយាយភាសារខ្មែរដែរ។
លោក បន្ថែមទៀតថា ចំពោះជនអន្តោប្រវេសន៍ដែលឆ្លងដែនចូលមកបំរើការងារ និងស្នាក់នៅខុសច្បាប់ក្នុងខេត្តសៀមរាប កម្លាំងនគរបាលអន្តោប្រវេសន៍ នៅតែបន្តចុះស្រាវជ្រាវ និង ធ្វើការនាំខ្លួនបញ្ជូនទៅអគ្គនាយកដ្ឋានអន្តោប្រវេសន៍ដើម្បីរៀបចំឯកសារបញ្ជូនខ្លួនពួកគេទៅប្រទេសពួកគេវិញ។
យ៉ាងនេះក្តី នៅខេត្តសៀមរាបគឺជាខេត្តបេះដូងទេសចរណ៍ដ៏សំខាន់មួយរបស់ប្រទេសកម្ពុជា ហើយគេសង្កេតឃើញថា មានជនបរទេសជាច្រើន ពូជសាសន៍បានមកទេសចរណ៍និងស្នាក់នៅក្នុងខេត្តសៀមរាប ដោយមួយចំនួន ជាជនអន្តោប្រវេសន៍ខុសច្បាប់ ហើយអាជ្ញាធរជំនាញពាក់ពន្ធ័ គួរតែមានវិធានការរឹតបណ្តឹងបញ្ហានេះបន្ថែមទៀត ព្រោះបច្ចុប្បន្ននេះមានជនបរទេសមួយចំនួនបានមកស្នាក់នៅ និងធ្វើអាជីវកម្ម ហើយជនបរទេសខ្លះទៀតបង្កបញ្ហាជាច្រើនដល់អាជ្ញាធរនិងប្រជាពលរដ្ឋ ដោយពួកគេមានខ្សែអ្នកធំនៅពីក្រោយខ្នង ព្រមទាំងហ៊ានធ្វើអំពើខុសច្បាប់ប្រាសចាកទៅនឹងសីលធម៌ និងការរស់នៅរបស់ប្រទេសកម្ពុជា៕
