កំពង់ឆ្នាំង៖ សមត្ថកិច្ចចម្រុះបានធ្វើការត្រួតពិនិត្យអាវុធជាតិផ្ទុះនៅក្នុងក្រុងកំពង់ឆ្នាំងបានជាបន្តបន្ទាប់ដើម្បីរឹតបណ្តឹងនូវសន្តិសុខសុវត្ថិភាព ជូនប្រជាពលរដ្ឋ ក្នុងឱកាសមានការប្រគុំតន្ត្រីសាធារណៈ។ការ
ត្រួតពិនិត្យអាវុធជាតិផ្ទុះនេះ បានធ្វើឡើង នៅយប់ថ្ងៃទី១៦ ខែវិច្ឆិកា ឆ្នាំ២០១៤ចាប់ពីម៉ោង៧យប់ រហូតដល់ម៉ោង១២កណ្តាលអាធ្រាតុ។
លោកឧត្តមសេនីយ៍ត្រី ប្រាក់ វុឌ្ឍី ស្នងការនៃស្នងការដ្ឋានខេត្តកំពង់ឆ្នាំងបានថ្លែងអោយដឹងថា៖ សន្តិសុខសុវត្ថិភាពនៅគ្រប់មូលដ្ឋាន គឺជាកត្តាចាំបាច់បំផុតសំរាប់ជីវភាពរស់នៅរបស់ប្រជាពលរដ្ឋ ដូច នេះទើបស្នងការដ្ឋាននគរបាលខេត្តកំពង់ឆ្នាំងបានសហការជាមួយបញ្ជារការដ្ឋានកងរាជអាវុធហត្ថខេត្ត ប្រើប្រាស់កំលាំងសរុបចំនួន៣៤នាក់ ដើម្បីរឹតបណ្តឹងត្រួតពិនិត្យអាវុធជាតិផ្ទុះទៅលើគ្រប់មធ្យោបាយធ្វើដំណើរនៅពេលយប់។ កិច្ចប្រតិបត្តការនេះ បានដាក់នៅ គោលដៅ២ចំណុចគោលដៅ ទី១គឺនៅចំណុចផ្លូវបែកជា៤ មុខហាងបូរី ស្ថិតក្នុងភូមិម៉ុងបារាំង សង្កាត់ប្អេរ និងគោលដៅទី២ ស្ថិតនៅផ្លូវបែកជា៤មុខធនាគារខេត្ត ស្ថិតក្នុងភូមិប្អេរ សង្កាត់ប្អេរ ក្រុងកំពង់ឆ្នាំង។
លោកឧត្តសេនីយ៍ត្រីបានអោយដឹងទៀតថា៖លទ្ធផលនៃការត្រួតពិនិត្យអាវុធជាតិផ្ទុះនៅក្នុងយប់ថ្ងៃទី ១៦ខែវិច្ឆិកា នោះគោលដៅទី១ សមត្ថកិច្ចចំរុះបានដកហូតបាន កាំបិតវែង២ កូនកាំបិតកៃចុងស្រួចចំនួន១ កន្ត្រៃ១ ពូថៅ១ ខ្នោះដៃ១គូ និងច្រវ៉ាក់ធំ១ខ្យែប្រវែងជាង១ម៉ែត្រ ចំណែកគោលដៅទី២ដកហូតបានតែពូថៅ១ និងខ្យែក្រវ៉ាត់ដាក់ក្បាលដែក១តែប៉ុណ្ណោះ ដែលក្រុមយុវជនមួយចំនួនបានដាក់តាមម៉ូតូទុកធ្វើ ជាអាវុធក្នុងពេល មានជម្លោះគ្នា។
គួរបញ្ជាក់ថា ចាប់ពីព្រះរាជពិធីបុណ្យអុំទូក អកអំបុក សំពះព្រះខែ និងអកអំបុកមកនៅក្នុង ខេត្តកំពង់ឆ្នាំង មានបើកកិច្ចប្រតិបត្តការឆែកឆេរ អាវុធជាតិផ្ទុះនេះជាបន្តបន្ទាប់ ដោយដកហូតបានមានកាំបិត
ដាវ ចំពាមកៅស៊ូ ដែកថ្នាំងអំពៅ ដែលអាចជាអាវុធសម្លាប់មនុស្សបាន ចំណែកជនដែលមានរបស់ទាំងនេះត្រូវបានធ្វើកាអប់រំនិងអោយត្រឡប់ទៅលំនៅដ្ឋានវិញ។
ករណីនេះត្រូវបានគេមើលឃើញថា ព្រោះតែក្នុងខែកន្លងមកនេះ មានករណីចោរលួចនិងចោរប្លន់ម៉ូតូ៤ទៅ៥គ្រឿងក្នុងក្រុងនិងក្នុងស្រុកមួយចំនួនទើបសមត្ថកិច្ចរឹងបណ្តឹងសន្តិសុខពេលយប់ និងទើបមានការត្រួតពិនិត្យអាវុធជាតិផ្ទុះជាបន្តបន្ទាប់ដូចខាងលើនេះ ដែលករណីនេះប្រជាពលរដ្ឋសូមគាំទ្រនិងសំណូមពរអោយរឹងបណ្តឹងសន្តិសុខដូចនេះអោយបានជាប្រចាំទើបជាការប្រសើរ៕
